1 Mɛ‐daa ana yɛ mi‐supu ana, nɩɩ fanɛ tɔ ɔkʋ kan tɩyɛ alibi tɔ mʋ, fanɛ mʋ nɩɩ fan buu Ɩbwaarɛ Kayaayu mʋ ɔkpa kyɛɛkyɛɛ sʋ mʋ, fan taa kebiti kyɛ mʋ tɔ, kɛ o bwii ba ɔkpa danbɩrasa mʋ sʋ. Amaa fan kɩɩ fanɛ n‐yɩɩ sʋ danbɩrasa, kɛ Sɩtaanɛ ɔ man nyɛ ɔkpa tʋʋ fanɛ gbaa fanɛ tɔ kɩɩ. 2 Fan yɛgɛ fanɛ bɩrɩsa ana asɩn ɩ baa ɩ gyɛ fanɛ asɩn. Nɩɩ fan kan waa kanɩn mʋ, ɩmʋ ɩɩ kaapʋ fɛɛ fen gyii Krisito nbara nɩmʋ sʋ. 3 Nɩɩ ɔkʋ kan fɛ nfɛɛrɛ yɛ ɔ gyɛ kʋtɔ kʋ, yɛgɛ ɔ man gyɛ sɛhn mʋ, ɛɛ pɩna mʋ n‐yɩɩ nɩn. 4 Ɔkʋmaa nɩmʋ ɔ kɩɩ kanan mʋ nɩɩ mʋ gbaa‐gbaa mʋ awaasa i du. Nɩɩ ɩ kan ɩ bʋrɔn mʋ, kanɩn bɩrɛ ɛɛ taalɛ kaapʋ mʋ n‐yɩɩ lɩɩ mʋ awaasa mʋ sʋ, yɛgɛ ɔ man taa mʋ n‐yɩɩ kaala ɔkʋ lɛɛ. 5 Lɩɩ fɛɛ ɩ dagaa ɔkʋmaa nɩmʋ maa sʋla mʋ gbaa‐gbaa mʋ kasʋla.

6 Ɔkʋmaa mʋ nɩɩ bɛɛ kaapʋ mʋ abwaarɛsɩn mʋ, ɩ dagaa maa kyɛ mʋ ɔkaapʋpʋ mʋ tɔ, lɩɩ atɔ danbɩrasa mʋ nɩɩ ɔ sʋ mʋ.

7 Fan man pɩna fanɛ n‐yɩɩ. Ɔkʋ mɛɛ taalɛ sisii Ɩbwaarɛ. Kʋtɔ kʋmaa mʋ nɩɩ nyɩmɩsa duu mʋ, kɩmʋ nɩɩ ɛɛ tɩŋɛ. 8 Ɔkʋmaa mʋ nɩɩ ee duu kɛ o gyii mu alibi kayɩɩ‐wʋlɛ ansi mʋ, mʋ kayɩɩ‐wʋlɛ maŋa tɔ nɩɩ ee biti ɔ tɩŋɛ lewu, nɩɩ ɔkʋmaa mʋ nɩɩ ee duu kɛ o gyii Kayaayu mu ansi mʋ, Kayaayu maŋa tɔ nɩɩ ee biti ɔ nyɛ nkpa kakpaa. 9 A man yɛgɛ kɩdanbɩrasa kɩwaa o fii anɛ, lɩɩ fɛɛ nɩɩ an man kan yɛgɛ ɩmʋ kɩwaa mʋ, kakaakʋ an biti a ba gyii ɩmʋ tɔnɔ. 10 Ɩmʋ sʋ fɛɛ kanan mʋ nɩɩ an nyɛ ɩmʋ ɔkpa falɛ, fan yɛgɛ kɛ a waa kɩdanbɩrasa sa asa kpini, fɔnfɔn bamʋ nɩɩ ba gyɛ anɛ bɩrɩsa ana akɔɔlɛ‐gyipu mʋ.

11 Yɛ fan wu akyʋrɔɔ‐bi lala nɩmʋ? Mɛ gbaa‐gbaa mɛ kɩbaa nɩɩ n taa kyʋrɔɔ ɩmʋ nfɩɩ bɩya fanɛ!

12 Bamʋ nɩɩ bee biti yɛ asa ba wu bamʋ ifuli sʋ kɩdanbɩrasa mʋ, ɩɩ nyan fanɛ yɛ fan tɩŋɛ fanɛ iduu. Kʋtɔ mʋ sʋ nɩɩ bɛɛ waa kanɩn ɩ gyɛ yɛ, be mee biti ba tɔwɛ Krisito kelewu oyu laasa mʋ sʋ asɩn, kɛ ɔkʋ nyanla bamʋ. 13 Halɩɩ Gyiwu abi ba maa buu iduu kɩtɩn gbaa mʋ, be mee buu Gyiwu abi nbara mʋ. Amaa bee biti yɛ fan tɩŋɛ fanɛ iduu, kɛ ba nyɛ kaapʋ bamʋ n‐yɩɩ yɛ fan nu bamʋ katɔwɛ. 14 Amaa mɛ bɩrɛ, n mɛɛ kaapʋ mɛ n‐yɩɩ, amɔɔ anɛ‐Nyɩrɩpɛ Yesu Krisito kelewu oyu laasa mʋ sʋ nkʋn, nɩɩ kɩmʋ sʋ nɩɩ dulinyaa atɔ man gyɛ sɛhn mi ansi sʋ, nɩɩ ngbaa n man bɩla n gyɛ sɛhn dulinyaa tɔ. 15 Nɩɩ nyɩmɩsa tɩn oduu oo, ɔ man tɩn oduu nɩn oo, man gyɛ ɩmʋ i tiri. Kʋtɔ mʋ nɩɩ ki tiri mʋ ɩ gyɛ fɛɛ Krisito sa anɛ kɩbaabʋtɔ pʋpwɛ. 16 Nɩɩ bamʋ nɩɩ ba sʋ kɩbaabʋtɔ pʋpwɛ nɩɩ bee buu ɩmʋ asɩn mʋ, Ɩbwaarɛ keyuula yɛ mʋ kʋwɛɛ kuwu i bun bamʋ sʋ, yɛ bamʋ nɩɩ ba gyɛ mʋ lɛɛ mʋ kpini sʋ.

17 Lɩɩ ndaga ɩɩ sʋ ii kpee mʋ, ɔkʋ ɩ gyɛ ɔkʋ ɔ man bɩla sa mɛ tɔɔrɔɔ, lɩɩ fɛɛ alɔpanɛ mʋ nɩɩ n nyɛ lɩɩ Yesu sʋ mʋ, ɩɩ kaapʋ fɛɛ n gyɛ mʋ lɛɛ.

18 Mɛ‐daa ana yɛ mi‐supu ana, anɛ‐Nyɩrɩpɛ Yesu Krisito kabwaala mʋ kɩ baa kɩ bʋ fanɛ kpini asɛ. Amen.