1 Ɩ man gyii nkɛ nkʋ nɩɩ Yesu bwii kpee Kapanum, nɩɩ asa ba nu fɛɛ ɔ baa ɔ bʋ kɩkpaara sʋ. 2 Nɩɩ asa kʋkyɔ ba ba bɔla tʋtɔ, nɩɩ ɔkpa man bɩla ɔ bʋ tɔ, halɩɩ kebunɔ gbaa, yɛgɛ Yesu ɩ tɔwɛ bamʋ abwaarɛsɩn. 3 Nɩɩ asa ana akʋ ba sʋla mʋgʋlɛ‐mʋgʋlɛ‐nyɩn boobi kʋ bɛɛ bɩya Yesu. 4 Amaa sakyɔ sʋ mʋ, ba man nyɛ ɔkpa, nɩɩ ba taa ɔnyɩn mʋ dii obu mʋ sʋsʋ, katɩn mʋ nɩɩ ba taa ɩsɛ nyalɛ munla mʋ sʋ, nɩɩ ba foti ɔbɔ opula mʋ nɩɩ Yesu bʋ mʋ kyɛɛkyɛɛ, nɩɩ ba kpɩlɩgaa ɔlɔpʋ mʋ, yɛgɛ ɔ dɛ mʋ kalan sʋ ba yɩla kasɛ. 5 Yesu maa wu kanan mʋ nɩɩ ba kɔɔlɛ mʋ gyii mʋ, nɩɩ ɔ tɔwɛ ɔnyɩn mʋ yɛ, “Mi‐bii, n taa fʋ alibi kɛɛ fʋ.”

6 Nɩɩ Ɩbwaarɛ nbara akaapʋpʋ akʋ mʋ nɩɩ ba tɛ tʋtɔ mʋ bɛɛ fɛ nfɛɛrɛ bamʋ amu tɔ yɛ, 7 “Mɩnɛ kʋtɔ nbusaa asɩn nɩɩ ɔnyɩn nɩmʋ ɩ tɔwɛ falɛ? Anɩmʋ ɩɩ taalɛ taa alibi ɛɛ kɛɛ tii Ɩbwaarɛ sʋ.”

8 Opula tɔ nɩɩ Yesu bɩɩ mʋ nfɛɛrɛ tɔ kʋtɔ mʋ nɩɩ bɛɛ fɛ, nɩɩ ɔ taasɛ bamʋ yɛ, “Mɩnɛ sʋ nɩɩ fɛn fɛ kanɩn nfɛɛrɛ? 9 Ɩmʋ ɩmɔɔ ɩ bʋsɩn kɩtɔwɛ? Fɛɛ n tɔwɛ mʋgʋlɛ‐mʋgʋlɛ mʋ yɛ, ‘N taa fʋ alibi kɛɛ fʋ,’ abɛɛ n tɔwɛ mʋ yɛ, ‘Kʋsʋ kɛ fʋ taa fʋ kalan natɛ?’ 10 N biti n kaapʋ fanɛ yɛ mɛ, Daadimaadi Obii‐nyɩnsa mʋ n sʋ ɔlʋn mʋ nɩɩ n taalɛ taa alibi kɛɛ dulinyaa nɩmʋ tɔ.” Ɩmʋ sʋ ɔ tɔwɛ mʋgʋlɛ‐mʋgʋlɛ mʋ yɛ, 11 “Mɛ ɩ tɔwɛ fʋ fɛɛ, kʋsʋ taa fʋ kalan kɛ fu kpewu.” 12 Nɩɩ ɔ kʋsʋ taa mʋ kalan waa bilen kpewu, yɛgɛ asa ba kɩɩ mʋ, nɩɩ i kyinkyin bamʋ gaa, nɩɩ ba yɩn Ɩbwaarɛ tɔwɛ fɛɛ, “An man pɩɩta wu falɛ asɩn nɩmʋ kakaakʋ.”

13 Yesu bwii kpee Galile ɔbʋn‐kaa, nɩɩ asa damantɛ ba ba mʋ asɛ, nɩɩ o piili ɛɛ kaapʋ bamʋ. 14 Maa kyʋn ee kpee mʋ, o wu Alifeyo mu‐bii Lewi maa tɛ lenpoo ɔkɔɔlɛkpa. Nɩɩ Yesu tɔwɛ mʋ yɛ, “Ba buu mɛ.” Nɩɩ Lewi kʋsʋ buu mʋ.

15 Ɩmʋ kamaa tɔ, Yesu maa mʋ abɩɩlapʋ ba tɛ bee gyii Lewi kɩkpaara sʋ, nɩɩ lenpoo akɔɔlɛpʋ yɛ alibi awaapʋ damantɛ ba buu mʋ, nɩɩ bamʋ gaalaagaa ba be tii mʋ sʋ bee gyii agyitɔ. 16 Nɩɩ nbara akaapʋpʋ mʋ nɩɩ ba gyɛ Farasii abi mʋ, ba maa wu fɛɛ Yesu maa alibi awaapʋ yɛ lenpoo akɔɔlɛpʋ ba maa gyii mʋ, ba taasɛ yɛ, “Mɩnɛ kʋtɔ sʋ nɩɩ maa falɛ asa ɩ tɛ bee gyii?”

17 Yesu nu kʋtɔ mʋ nɩɩ bɛɛ tɔwɛ mʋ, nɩɩ ɔ lɛɛ bamʋ kɔnɔ yɛ, “Bamʋ nɩɩ ba mɛɛ lɔ mʋ, be mee biti ɔkyɛpʋ, amɔɔ bamʋ nɩɩ bɛɛ lɔ. N man ba nɩn kɛ n ba tɩɩ adanbɩrasa awaapʋ, amɔɔ alibi awaapʋ.”

18 Gyɔn Okyugyeepu abɩɩlapʋ yɛ Farasii abi bee ŋmina kɔnɔ. Nɩɩ asa akʋ ba kpee Yesu asɛ naa taasɛ mʋ yɛ, “Mɩnɛ sʋ nɩɩ Gyɔn Okyugyeepu abɩɩlapʋ yɛ Farasii abi abɩɩlapʋ bee ŋmina kɔnɔ, nɩɩ fʋ abɩɩlapʋ mʋ bɩrɛ be mee ŋmina?”

19 Nɩɩ Yesu taasɛ bamʋ yɛ, “Kɩkyɩɩfɔ tɔ asa bɛɛ taalɛ ŋmina kɔnɔ yɛgɛ ɔkyɩɩfɔ mu‐kuli san ɔ bʋ bamʋ asɛ? Ɩ mɛɛ yɛ ɩ waa kanɩn. Fɛɛ ɔkyɩɩfɔ mu‐kuli san bʋ bamʋ asɛ falɛ. 20 Amaa saŋa kʋ ɩɩ ba nɩɩ bee biti ba taa ɔkyɩɩfɔ mu‐kuli mʋ lɩɩ bamʋ asɛ. Kanɩn saŋa maŋa tɔ nɩɩ bee biti ba ŋmina kɔnɔ.

21 “Ba mɛɛ taa kikyibi pʋpwɛ bɛɛ mata kaalɛ dɩdaa ɔbɔ, lɩɩ fɛɛ kii biti kɩ kyatɛ kaalɛ mʋ tii sʋ. 22 Kanɩn maŋa nɩɩ ɔkʋ mɛɛ taa nta pʋpwɛ waa kʋtɔbwaaya ɔwʋlɛ taakpe dɩdaa tɔ. Nɩɩ ɔ kan waa kanɩn, nɩɩ nta mʋ ɩɩ bɩlɛ mʋ, ii biti ɩ kyatɛ taakpe dɩdaa mʋ nyita, kɛ nta mʋ ɩ kyɛɛgɛ fɔyɩ. Amaa bɛɛ taa nta pʋpwɛ waa taakpe pʋpwɛ tɔ, kɛ ɩmʋ anyɔ mʋ ɩ man nyita.”

23 Kakɛ fʋʋtɛsa kʋ, nɩɩ Yesu maa mʋ abɩɩlapʋ ba naa alʋn kadɔɔ kʋ tɔ, nɩɩ mʋ abɩɩlapʋ ba piili bɛɛ gyayɩ alʋn mʋ ɩkʋ. 24 Nɩɩ Farasii abi mʋ ba yɛ, “Kɩɩ, mɩnɛ sʋ nɩɩ fʋ abɩɩlapʋ bɛɛ waa kʋtɔ mʋ nɩɩ ɩ man dɛ ɔkpa kakɛ fʋʋtɛsa?”

25 Nɩɩ Yesu lɛɛ bamʋ kɔnɔ yɛ, “Fan man pɩɩta kalɛ kʋtɔ mʋ nɩɩ Owura Dawidi maa mʋ kamaa tɔ abi ba waa saŋa mʋ nɩɩ akʋn a mɔɔ bamʋ mʋ nɩn? 26 Saŋa mʋ nɩɩ Abiyata kyɩna ɔ gyɛ Ɩbwaarɛ oseepu bɩlɩsa asɛ mʋ, Owura Dawidi loo Kabwaarɛ‐sunkpa obu mʋ tɔ naa taa bodobodo mʋ nɩɩ ba taa lɛɛ saraga sa Ɩbwaarɛ mʋ wɛ, nɩɩ ɔ sa mʋ kamaa tɔ abi, yɛgɛ ɩ man dɛ ɔkpa fɛɛ ba wɛ ɩmʋ, amɔɔ aseepu mʋ nkʋn.”

27 Nɩɩ Yesu tɔwɛ bamʋ fɛɛ, “Nyɩmɩsa kɩdanbɩrasa sʋ nɩɩ Ɩbwaarɛ waa kakɛ fʋʋtɛsa mʋ, man gyɛ nyɩmɩsa nɩɩ ba waa sa kakɛ fʋʋtɛsa mʋ sa. 28 Ɩmʋ sʋ mɛ, Daadimaadi Obii‐nyɩnsa mʋ n kyɔ kakɛ fʋʋtɛsa mʋ gbaa.”