16
Pɔɔlɩ Afwaala
1 N biti n lɛɛ anɛ pɩɩkyɩɩ Fobe mʋ nɩɩ ɔ sʋ ɔwʋlɛ nɩmʋ ɛɛ bɩya fanɛ falɛ n kaapʋ fanɛ. Mʋ ɩ gyɛ Krisito abuupu mʋ nɩɩ ba bʋ Kenkireya, nɩɩ ɛɛ kyɛ bamʋ tɔ mʋ. 2 N kʋlɛ fanɛ, fan kɔɔlɛ mʋ Ɔnyɩrɩpɛ mʋ kɩtɩɩ tɔ sʋ, fɛɛ kanan mʋ nɩɩ ɩ dagaa fɛɛ Krisito abuupu ba kɩtaa abaa mʋ, kɛ fan sa mʋ nkyɛtɔ kʋmaa mʋ nɩɩ i tiri mʋ, lɩɩ fɛɛ ɔ kyɛ asa gaalaagaa tɔ nɩɩ ngbaa mɛ n tii sʋ.
3 Fan fwaala Prisila maa Akwila, mʋ nɩɩ n maa bamʋ an waa Yesu Krisito kusun mʋ. 4 Nɩɩ ba taga apʋ lɩɩ mɛ sʋ. Ɩ man gyɛ mɛ nkʋn ɩ fwaala bamʋ, amaa yɛ Krisito abi kʋbʋ‐kʋbʋ mʋ nɩɩ ba man gyɛ Gyiwu abi mʋ kpini bɛɛ fwaala bamʋ nsa yɛ kusun.
5 Fan fwaala Krisito kʋbʋ mʋ nɩɩ kɩɩ gyaŋɛ Prisila ana kɩkpaara sʋ mʋ.
Fan fwaala mɛ kyɛmɩnɛ danbɩrasa Epanetu. Mʋ ɩ gyɛ ɔmʋ nɩɩ ɔ da kɩkɔɔlɛ Yesu Krisito gyii Asiya ɔsʋwʋlɛ sʋ kpini.
6 Fan fwaala Mɛɛrɩ mʋ nɩɩ o sun kusun gaa sa fanɛ mʋ.
7 Fan fwaala Androniko maa Gyuniya, mɛ kʋʋpʋ ana mʋ nɩɩ ba tii maa bamʋ obu mʋ. Nɩɩ asa gaalaagaa be nyi bamʋ yɛ ɔdan Krisito asunpu mʋ tɔ, nɩɩ ba gyankpaa mɛ kɔɔlɛ Yesu Krisito gyii.
8 Fan fwaala Ampiliyatu mʋ nɩɩ n sʋ kebiti sa mʋ Ɔnyɩrɩpɛ tɔ.
9 Fan fwaala Ubano, anɛ bɩrɩsa kusun ɔwaapʋ Krisito tɔ, yɛ mɛ kyɛmɩnɛ danbɩrasa Sitakusi.
10 Fan fwaala Apelesi mʋ nɩɩ ɔ lɛɛ kaapʋ kesintin yɛ ɔ taa mʋ n‐yɩɩ sa Krisito.
Fan fwaala bamʋ nɩɩ ba bʋ Arisitobulu kɩkpaara sʋ kpini.
11 Fan fwaala mɛ kʋʋpʋ Herodiyon. Fan fwaala Nasiso kɩkpaara sʋ abi kpini mʋ nɩɩ ba gyɛ Ɔnyɩrɩpɛ lɛɛ mʋ.
12 Fan fwaala akyɩɩ nɩmʋ, Trifina maa Trifosa mʋ nɩɩ ba kpan bamʋ n‐yɩɩ sun Ɔnyɩrɩpɛ kusun mʋ.
Fan fwaala mɛ kyɛmɩnɛ danbɩrasa Pesi, nɩɩ ngbaa mʋ ɔ gyɛ ɔkyɩɩ mʋ nɩɩ ɔ kpan mʋ n‐yɩɩ waa Ɔnyɩrɩpɛ kusun mʋ.
13 Fan fwaala Ɔnyɩrɩpɛ kɩyaafɔlɛ Rufusi, yɛ mu‐nyi, mʋ nɩɩ ɔ taa mɛ waa mu‐bii kʋʋgɛsa.
14 Fan fwaala Asinkrito, yɛ Felegon yɛ Hemesi yɛ Patrobasi yɛ Hemesi yɛ Krisito abuupu mʋ nɩɩ ba bʋ bamʋ asɛ mʋ.
15 Fan fwaala Filologo yɛ Gyuliya yɛ Neresu maa mʋ pɩɩkyɩɩ yɛ Olipasi yɛ Krisito abuupu mʋ nɩɩ ba bʋ bamʋ asɛ mʋ kpini.
16 Fan taa kinyi‐bii afwaala fwaala abaa. Krisito kʋbʋ‐kʋbʋ mʋ kpini bɛɛ fwaala fanɛ.
17 Mɛ‐daa ana yɛ mi‐supu ana, n kʋlɛ fanɛ nɩn, kɛ fan kɩɩ danbɩrasa lɩɩ bamʋ nɩɩ bee biti ba bɩya nbarɩgɛ fanɛ tɔ, nɩɩ bɛɛ kpakyarɛ kɩbɩɩla mʋ nɩɩ ba kaapʋ fanɛ mʋ, nɩɩ ɩ yɛgɛ asa bee tutu bamʋ kɩkɔɔlɛ‐gyii tɔ. Fan lɛɛ fanɛ n‐yɩɩ lɩɩ bamʋ tɔ. 18 Kpalɩ fɛɛ bamʋ nɩɩ bɛɛ waa kanɩn mʋ, be mee sun anɛ‐Nyɩrɩpɛ Yesu Krisito, amaa bamʋ kɩpɩrɛ lɛɛ nɩɩ bee biti. Lɩɩ bamʋ ntɔwɛ danbɩrasa yɛ kɩgyaa‐bi sʋ mʋ, ba sʋ bɛɛ pɩna akɔɔlɛ‐gyipu mʋ nɩɩ ba man pɩɩ dan kɩkɔɔlɛ‐gyii tɔ. 19 Ɔkʋmaa nɩmʋ nu kanan mʋ nɩɩ fan taa fanɛ n‐yɩɩ sa Krisito mʋ. Kanɩn sʋ mi ansi i gyii fanɛ sʋ gaa. Amaa n biti fɛɛ fan baa fan gyɛ anyaasɩnpʋ lɩɩ kɩdanbɩrasa kɩwaa sʋ, kɛ fan lɛɛ fanɛ n‐yɩɩ lɩɩ alibi kɩwaa tɔ.
20 Ɩ mɛɛ yɛ ɩ kyɛɛrɛɛ nɩɩ Ɩbwaarɛ keyuula wuya mʋ, ii biti ɔ yɛgɛ kɛ fan gyii Sɩtaanɛ sʋ. Anɛ‐Nyɩrɩpɛ Yesu kabwaala mʋ kɩ baa kɩ bʋ fanɛ sʋ.
21 Mɛ bɩrɩsa osunsunpu Timoti ɩ fwaala fanɛ. Kanɩn maa nɩɩ mɛ kʋʋpʋ ana Lukiyo yɛ Gyason yɛ Sosipata gbaa bɛɛ fwaala fanɛ.
22 Mɛ Tetiyo mʋ nɩɩ n kyʋrɔɔ Pɔɔlɩ ɔwʋlɛ nɩmʋ, n fwaala fanɛ Ɔnyɩrɩpɛ kɩtɩɩ tɔ sʋ.
23 Gayusi mʋ nɩɩ ɔ gyɛ mɛ kɩkpaara wuya, nɩɩ Krisito abi gbaa bɛɛ gyaŋɛ mʋ kɩkpaara sʋ mʋ, ɩ fwaala fanɛ.
Erasitu mʋ nɩɩ ɔ gyɛ kadɛ mʋ tɔ afulee ɔkɩɩsʋpʋ yɛ anɛ‐supu Kwatu bɛɛ fwaala fanɛ. 24 (Anɛ‐Nyɩrɩpɛ Yesu Krisito kabwaala mʋ kɩ baa kɩ bʋ fanɛ asɛ. Amen.)
25 Fan yɛgɛ a taa bʋnyaa sa Ɩbwaarɛ, lɩɩ fɛɛ mʋ ɩ taalɛ yɛgɛ fan nyɛ ɔlʋn yɩlɛ fanɛ kɩkɔɔlɛ‐gyii mʋ tɔ, fɛɛ kanan mʋ nɩɩ n tɔwɛ Asɩn danbɩrasa mʋ lɩɩ Yesu Krisito sʋ mʋ. Kanɩn asɩn mʋ ɩ gyɛ kesintin asɩn mʋ nɩɩ ɩ baala lɩɩ koo dɩdaa mʋ. 26 Nɩɩ nbɩɩnbɩɩ ɩ bɔla Ɩbwaarɛ atɔwɛpʋ Asɩnkyan yɩlasa mʋ sʋ lɛɛ kaapʋ. Nɩɩ Ɩbwaarɛ mʋ nɩɩ ɔ tɛ kakpaa mʋ sa kɔnɔ, yɛ ba tɔwɛ kanɩn kesintin asɩn baalasa sa ndɛndɛmandɛ kpini, kɛ ba kɔɔlɛ Yesu Krisito gyii kɛ ba nu mʋ asɛ. 27 Lɩɩ Yesu Krisito sʋ mʋ, Ɩbwaarɛ kanyaasɩn wuya mʋ nkʋn nɩɩ bʋnyaa gyɛ mʋ lɛɛ kakpaa. Amen!