Nchane (Ncane) 1 Timoti 1

Ŋwa wù fwe wù Bol gɛ̀ saŋ fɛ

Timoti

Fiɛɛ fì le a Ŋwa wu Timoti wù fwe wunɛ le

Ŋwa wunɛ le wù fwe wù Bol gɛ̀ saŋ fɛ chumu wumu wù jee che gɛ̀ bee Timoti le. Timoti gɛ̀ bee muh wu Kletu, wù gɛ̀ bee muh wu woŋ wu Ɛsia wù shige.

Mwɛɛ mù Bol saŋ kune mu a ŋwa we wù fwe wunɛ le, le muntɛde. Fì fwe, wu jɛme yo wu teefe lɛ bo yɛ̂ne kune n'yɛyɛ wù kooji gɛ antɛnɛɛ a bamii ba mbɛmɛ. Wunɛ n'yɛyɛ gɛ̀ bee lɛ, woŋ wù besabɛŋ yɛde kfunɛ le woŋ wu kimbefɛ, muh taŋlo wu gê wu kɛ̂mɛ Mbvusɛ, gɛh sege muh kee mwɛɛ mumu mù le nyilɛ le bɛ sege muh chee kinche kimi gɛh njɛ ki wu fâŋe ki wu jîi kfuu chi mwɛɛ mumu bɛ ki wu nyû njɛ wu kɛme kwɛse kɛnɛ jwɛŋsɛ sɛŋ.

Ŋwa wuyu jɛme tɛ kune no taŋlo Timoti gêe lɛme che a kintaashɛ ki bamii ba mbɛmɛ ntɛnɛɛ, bɛ no bamii bûune Nyo. Wu ka sɛŋe kfuu chi kiŋge kì bikwɛɛ bi bintaashɛ bi bamii ba mbɛmɛ mo bamii ba feeji bo gee chilɛme a bintaashɛ ntɛnɛɛ kɛme ki bo kɛ̂me. Kimɛsɛ, le wu teefe Timoti no wu taŋlo wu lɛ̂ne njɛ mwa lɛme wu Jiso Kletu wù joŋe.

Bikwɛɛ bi mwɛɛ mù le a Ŋwa wunɛ le

1:1-2 Fɛŋkɛɛ

1:3–3:16 Ntefɛ kune no bo gêe mwɛɛ a kintaashɛ le bɛ kune bachiji bikwɛɛ bi kintaashɛ

4:1–6:21 Ntefɛ kune no Timoti gêe lɛme che

1 Le mɛ wù Bol, nle mwa ntuŋ wu Kletu Jiso no Nyo wù le Mbvusɛ wese besabɛŋ bɛ Kletu Jiso wù besabɛŋ gɛɛde bvufee yi ye ye le, gɛ jɛmɛ lɛ mɛ nyûme.

2 Nsaŋe ŋwa wunɛ fɛ wo le Timoti wù le mwa yaŋ wù nchiɛɛŋ yi mbɛmɛ le.

Nyo wù Chii bɛ Kletu Jiso wù Tada wese besabɛŋ, bo dûnyɛ fitele fì joŋe wo le, bo kôo yii fɛ wo le, bo nyâ wo bɛ nyiɛgee.

Lɛ Timoti chîde ban'yɛyɛ ba chimbiaŋ

3 No ŋgɛ̀ ŋku chiaaŋ wo le sege ŋgɛ̀ ŋgɛɛne Masɛdonia, lɛ wo shɛ̂ɛ wo nyû Ɛfɛsu, ŋka ŋkude chiaaŋ lɛ wo nyûme gɛh yo wu lɛ wo chîde bamii baa ba yɛyi kfuu chi n'yɛyɛ wumu wù yeye. 4 Wo chîde tɛ lɛ keefɛ bo jôde kife kiboo bo jeese yi mumaŋa le mo yi ajee a bachiji chikfuu chi bamii a bo to bo taŋe ba gɛɛne gɛh lo yu fwe wo kage gɛ. Munɛ le mwɛɛ mù too gɛh nyu bɛ bambejɛ, nyu gɛ bɛ ntaŋ wù wu Nyo wù bii mbɛmɛ le gɛ. 5 Fishaŋ, fi fiɛɛ fì nduu finɛ le ki ŋgê lɛ bamii kɛ̂me kiŋkoŋɛ kì jade fɛ muntele mù yuude le, bɛ kì jade fɛ fitele fì muh wù gee fiɛɛ fì ya sage gɛ wu gɛ, mo kì jade fɛ fitele fì nchiɛɛŋ fì muh leese yi Nyo le. 6 Bamii bamu le bo chinɛ wa yinɛ je le bo jiine wa bo gɛɛne nyu yi banjɛmɛ ba achiji le. 7 Bo goone ki bo nyûme bamii ba yɛyi bamii bɛ banchi ba Nyo, geenɛ bo kee gɛ fiɛɛ fì bo jɛme kune fi kɛnɛ kinyi ki fiɛɛ fì bo bɛɛnyi yi fi le gɛ.

8 Besabɛŋ kee lɛ nchi wu Nyo le fiɛɛ fì joŋe, nɛ muh jode nchi wuyu a je yì kooji le, no wu kɛme ki wu jôde. 9 Besabɛŋ kee tɛ lɛ gɛ ba gɛ̀ gɛle nchi fɛ bamii ba le chaaŋ le gɛ. Ba gɛ̀ gɛle nyume fɛ bamii ba ŋgode banchi le, bɛ ba tɛɛme bikwɛɛ le, mo ba faŋe Nyo, mo ba gee bimbefɛ, mo ba yuude gɛ, mo bamii ba chiaase fiɛɛ kune Nyo, mo ba yuuyi bachiji baboo, kɛnɛ babwee baboo, mo ba yuuyi bamii bamu. 10 Le tɛ fɛ bikɛse bɛ bilɛŋsɛ, ba jaŋe kinjaŋ, mo fɛ bilɛŋsɛ ba gime fɛ bamu le. Le tɛ fɛ bamii ba choŋe bamii bo gɛɛne bɛ bo le, kɛnɛ ba mbiane chimbiaŋ le, kɛnɛ ba kane lɛ bo sɛŋe nchiɛɛŋ bo kane bo mbiane lo. Nyume tɛ fɛ ba gee mo nyume la fì bii gɛ n'yɛyɛ wù kooji le gɛ. 11 N'yɛyɛ wunɛ bii saaka wù joŋe wù kuge wù le wu Nyo wù ba bɛɛŋse le. Saaka wuyu le wu ba gɛ̀ nya chiaaŋ yaŋ le.

Bol nya kiyone fɛ Tada le yi yii yì wu gɛ̀ kolɛ fɛ wu le

12 Nnyaa kiyone fɛ Kletu Jiso wu Tada wese besabɛŋ wù le wu nya mɛ bvuŋga ki nlɛne lɛme che. Wu gɛ̀ bee wu jiŋɛ mɛ wu yɛŋ lɛ nle ŋkojɛ, wu mo wu baa mɛ lɛ nlɛ̂ne. 13 Mo no ŋgɛ̀ nshee nyume fweele njɛme jɛ́ yì befe kune wu, mboone bikaa a bamii be jiŋ, mɛ naanyi bo, geenɛ wu gɛ̀ koo yii fɛ mɛne, nje ŋgɛ̀ ŋgee yi kijibɛ le ŋkɛme gɛ wa mbɛmɛ gɛ. 14 Tada wese besabɛŋ gɛ̀ dunyɛ kiŋkoŋɛ ke yi ye yaŋ le nyume gɛ kì wɛɛ gɛ, wu ge ŋkɛme mbɛmɛ bɛ kiŋkoŋɛ no muh wù le yi Kletu Jiso le to wu kɛme. 15 Njɛmɛ wù lɛ Kletu Jiso gɛ̀ to yi nshɛŋ le ki wu bvûsɛ bamii ba befe, le lo nchiɛɛŋ. Le njɛme wù kooji wù muh wuchii bɛ̂ɛŋ wu mâŋɛ gɛ. Mɛ kibɛɛ nle lo nfoŋ kimbefɛ. 16 Geenɛ, Tada gɛ̀ koo yii fɛ mɛne, mɛ wù le nfoŋ kimbefɛ wu lɛ Jiso Kletu dûnyɛ yi ye yaŋ le, yii yì wu koode bɛ bamii yì kage gɛ. Nle noo njɛ njiŋɛ fɛ bamii ba lé ba bɛ̂ɛŋ wu le, bo gê bo kɛ̂mɛ kinche kì kage gɛ. 17 Nyo le Nfoŋ wù nchensɛŋ wù kage gɛ, gɛ taŋlo wu kwe gɛ, gɛ taŋlo ba yɛŋ wu le gɛ. Mɛ gɛh wu maa wù le Nyo. Besabɛŋ nyâa ŋgvunɛ wu le, besabɛŋ bɛ̂ɛŋse jee che, segechii chi kage gɛ. Fi nyûme noo.

Lɛme chì Timoti le wu lɛ̂ne

18 Timoti mwa yaŋ, mɛ nyaa njɛme wunɛ chiaaŋ yo le, mbii nyu mwɛɛ mù bamii gɛ̀ jɛmɛ wa kune wo njɛ bamii ba teede bantuŋ ba Nyo, wu lɛ mu gê mu fî wo, wo tûŋ jɛŋ yì joŋe. 19 Wo lɛ̂me gɛh yi mbɛmɛ wo le, wo yêge fiɛɛ fì chuule fì fitele fiuŋ jɛme wo le. Bamii bamu le bo chinɛ wa ki bo yêge fiɛɛ fì fitele fiboo jɛme bo le, bo mo bo gwe yi mbɛmɛ wuboo le njɛ fitima fi a joo fɛ fi bweeyɛ. 20 A ŋgoo yiboo le, le Amenayu bɛ Alɛksanda. Nle nya wa bo banɛ chiaaŋ yi Sataŋ le, wu lɛ bo kɛ̂mɛ bvufee, bo lû bɛ jee chi Nyo chì bo chɛŋe bɛ chi.