Nchane (Ncane) 2 Tɛsalonika 3

Bol lɛgɛ lɛ bamii ba mbɛmɛ bûune fɛ bo le

1 Ki mɛɛse, booŋ ba bwee wese, bɛŋ bûune fɛ bee le. Bɛŋ bûune lɛ jɛ yi Tada jiɛnyi yi gɛɛne fwe chige chige, bamii ŋgvuune jɛ yiyu gɛh no bɛŋ gɛ̀ gee. 2 Bɛŋ bûune tɛ lɛ bee ge be bonɛ chiaaŋ yi bamii ba kɛme muntele mù mbefe bò gee mwɛɛ mù mbefe le, nje gɛ nyu bamii bachii bò le bo lee fitele yi Kletu le gɛ. 3 Geenɛ Tada to wu lɛme gɛh yi jɛ ye le. Wu lé wu gê wu nyâ bɛŋ bɛ bvuŋga, wu ka wu baŋe bɛŋ lɛ keefɛ bɛŋ gê bɛŋ lee chiaaŋ yi muh wu kimbefɛ le gɛ. 4 Tada le wu fɛ bee gɛɛ bvufee bwesa yi ye yene lɛ bɛŋ gee wa nyu fiɛɛ fì bee duu, bɛŋ le bɛŋ mɛ gɛh bɛŋ gee. 5 Noo bee lɛge lɛ Tada leesɛ muntele mwɛna mu nyume yi kiŋkoŋɛ ki Nyo le wu ka wu ge bɛŋ kaane shɛ́ŋ no Kletu gɛ̀ kaane.

Muh kɛme ki wu lɛ̂ŋ fɛ wu ji

6 Booŋ ba bwee wese, bee duu lo bɛŋ le a jee chi Tada wese besabɛŋ wù Jiso Kletu le lɛ, bɛŋ bvûuse ye yene a booŋ ba bwe wese ntɛnɛɛ baa ba laame gɛh lo bo ya chee gɛ bo bii kinche kì bee gɛ̀ dunyɛ bɛŋ le gɛ. 7 Njɛme nɛ, nje bɛŋ kibɛɛ kee no bɛŋ kɛme ki bɛŋ bêge bɛ bee. Gɛ bee gɛ̀ laame sege bee gɛ̀ bee besabɛŋ gɛ. 8 Gɛ bee gɛ̀ jii fiɛɛ fi muh njɛ bee laŋe sɛŋ gɛ. Bee gɛ̀ lɛne bee bunyi antaŋ bɛ fɛnshɛ wu lɛ keefɛ bee gɛɛ bvujijɛ yi muh lɛ bɛŋ le gɛ. 9 Gɛ bee gɛ̀ gee noo lɛ gɛ bee gɛ kijusɛ kesa ki bee biide mwɛɛ bɛŋ le gɛ. Fi gɛ̀ bee wu lɛ bee duunyi, yi gee chesa le wu lɛ bɛŋ bêge bɛ bee. 10 Bɛŋ kêe lɛ sege bee gɛ̀ bee besabɛŋ, bee gɛ̀ nya nchi wunɛ bɛŋ le lɛ, “Muh nɛ le lɛ gɛ wu lɛ̂ne gɛ, keefɛ ba nyâ wu bɛ fiɛɛ fijile gɛ.” 11 Njɛme nɛ nje bee yuge lɛ bɛŋ bamu shiide bɛŋ laame lo bɛŋ lɛne gɛ, bɛŋ jiɛnyi gɛh lo bɛŋ leese de fɛ mwɛɛ mu bamii bamu le. 12 Bobaa bamii bee duu bee ka chiise lo bo le a jee chi Tada Jiso Kletu le lɛ bo shii fɛkuu bo lɛne ki bo kɛme fiɛɛ fì bo jîi. 13 Fɛ bɛŋ le booŋ ba bwee wese, keefɛ bɛŋ kɛ̂ bɛŋ wɛɛyi ki bɛŋ gêe gee chì joŋe gɛ.

14 Nɛ muh faŋ ki wu yû fiɛɛ fì bee jɛme a ŋwa wunɛ le, bɛŋ gɛɛ njiŋɛ yi wu le. Keefɛ bɛŋ kɛ̂me lo fiɛɛ fì bɛŋ ge bɛ wɛɛ muh gɛ, wu lɛ wu kɛ̂me bvuya. 15 Geenɛ, keefɛ bɛŋ jôde wu njɛ muh wu kimbanɛ gɛ. Bɛŋ teefe lo wu njɛ mwa bwe wene.

N'yɛsɛ wù fɛkimɛsɛ

16 Tada wù le wu nyiɛgee nyâa bɛŋ bɛ nyiɛgee segechii a jé le yichii. Tada nyûme bena bo bachii.

17 Mɛ wù Bol nsaŋe n'yɛsɛ wunɛ bɛ kibo kaŋ. Finɛ le njiŋɛ waŋ wù ŋgee a baŋwa baŋ le bachii. Nyume gɛh no nto nsaŋe. 18 Kiŋkoŋɛ ki Tada wese besabɛŋ wù Jiso Kletu nyûme bɛ besabɛŋ bachii.