Ukalata ughwa bhubhili ughwa
Yoohani
Shiisho shikutangila
Ukalata uyu akasimbighwa nu Yoohani yuuyo iiyughite ukuti ghwi songo ughwa chipanga. Shikulangisha ukuti ukalata uyu akasimbighwa mu chinja icha malongo mahaano na manna (90) bhwo uYeesu aapaapighwa. UYoohani akamusimbilagha umukolo yuuyo uChaala akamusala pamupeene na bhaana bhaake. Amashu agho, “Umukolo yuuyo uChaala akusalite pamupeene na bhaana bhaako” (1:1) ghakulangisha ukuti chipanga pamupeene na bhiitiki bhooshi.
Inyango iya kusimba ukalata uyu yikabha ya kubhasoka abhiitiki ukuti bhabhe maaso na bhamanyishi abha bhumyashi. Inyango inine yikabha ya kubhakumbusha ukukonga ululaghilo ulwa Yeesu luulwo lukuti, “Tughananaghe twibheene-bheene” (1:5).
1
Ukulamuka ukwa Yoohani
Ukalata uyu akufuma kukwangu une ni songo ughwa chipanga. Ingukusimbila ukalata uyu ughwe ghwe mukolo yuuyo uChaala akusalite pamupeene na bhaana bhaako* 1:1 Ghwe mukolo yuuyo uChaala akusalite pamupeene na bhaana bhaako Amashu agha ghakulingaania isha chipanga na bhiitiki. bhaabho imbaghanite nalooli. Indabhaghanite nimweneeshe, loole na bhala bhooshi bhaabho bhabhumeenye ubhwanalooli bhoope bhabhaghanite umwe nalooli. Tubhaghanite umwe ku nongwa iya kuti une pamupeene nuumwe tubhumeenye ubhwanalooli, soona ubhwanalooli ubhwo indibhubhange mu ndumbula shiitu bhwila na bhwila.
Tukusuuma ukuti ichisa nu lutengaano ukufuma kwa Taata uChaala na kwa Yeesu Kilisiti uMwana ghwake fibhange pamupeene nuutwe ku nongwa iya kuti tubhumeenye ubhwanalooli nu kuti bhatughanite.
Ifimanyisho ku sha lughano
Ingahobhoka leka bhwo ingupulika ukuti abhaana bhamu mu bhaana bhaako bhakubhukonga ubhwanalooli isa muumwo uChaala akatulaghila. Ghwe mukolo umughanighwa, ingukusuuma ukongaghe ululaghilo luulwo lukuti tughananaghe twibheene-bheene. Indakukusimbila ululaghilo ulupya, loole lula lula luulwo tukabha nalwo ukufuma kubhwandilo bhwo twamwitika uKilisiti. Ku sila iya kughanana twibheene-bheene, tukulangisha ukuti tukushikonga indaghilo isha Chaala. Paapo ukufuma kubhwandilo uChaala akatulaghila ukuti tughananaghe twibheene-bheene.
Isoki ku sha bhamanyishi abha bhumyashi
Abhamanyishi abha bhumyashi abhingi bhiisile mu chiisu. Abhamanyishi abho bhakubhashimbula abhandu ukuti bhwo uYeesu Kilisiti iisa pa chiisu ichi, atakabha nu mubhili ungati mundu. Umundu yuuyo akuyugha ulwo, mumyashi soona mulughu ughwa Kilisiti. Ku nongwa iyo, mubhange maaso na bhamanyishi abho ukuti manye bhabhashimbulaghe nu kuti imbombo yiinyu manye yibhe ya pabhuubhu. Paapo linga bhaabhashimbula, mutaamukapokeele umufwalo ghuughwo ghubhabhaghiile ukufuma kwa Chaala. Umundu ghweshi yuuyo atakufyitika ifimanyisho ifya Kilisiti soona atakwendelela ukufikonga ifimanyisho ifyo, umundu uyo atali pamupeene nu Chaala. Loole umundu ghweshi yuuyo akwendelela ukufyitika ifimanyisho ifya Kilisiti, ali pamupeene nu Taata uChaala nu Mwana ghwake. 10 Linga umundu yumo akwisa kukwinyu nu kumanyisha ifimanyisho fiifyo fili pashima ni fya Kilisiti, manye mumupokeelaghe mu nyumba shiinyu, soona manye mumulamukaghe ungati mwitiki munyiinyu. 11 Paapo umwitiki yuuyo akumupokeela nu kumulamuka umundu uyo ungati mwitiki munine, umwitiki uyo akwafwana pamupeene nu mundu uyo ukubhomba imbiibhi shaake.
Amashu agha bhumalilo
12 Indi nasho inyingi isha kubhasimbila, loole indakulonda ukushisimba mwa kalata uyu. Inguyugha ulwo ku nongwa iya kuti ingusubhaalila ukwisa kukwinyu ukuti tukomaane nu kuyughisania pamupeene. Ku sila iyo inditukahobhoke leka. 13 Abhaana abha mulumbu ghwako yuuyo uChaala amusalite bhakukulamuka.

*1:1 1:1 Ghwe mukolo yuuyo uChaala akusalite pamupeene na bhaana bhaako Amashu agha ghakulingaania isha chipanga na bhiitiki.