Ukalata ku
Bhahibhuli
Shiisho shikutangila
Umusimbi ughwa kalata ughwa Bhahibhuli atakumanyikwa. Loole abhamanyi bhamu abha lishu ilya Chaala bhakwinongʼona ukuti umusimbi ughwa kalata uyu akabha ghwe yumo mu bhalongoshi abhosongo abha chipanga. Shikulangisha ukuti umusimbi ughwa kalata uyu akabha Mukilisiti yuuyo akabha mumanyi leka ughwa Lwitikano uLukuulu. Soona shikulangisha ukuti ukalata uyu akasimbighwa bhwo iNyumba iya Chaala iya mu kaaya aka Yelusaleemu yikaali ukupongolighwa mu chinja icha malongo mahaano na mabhili (70) bhwo uYeesu aapaapighwa.
Umusimbi akabhasimbilagha aBhakilisiti aBhayuuta bhaabho bhakataamighwanga na bhandu bhaabho bhakabhakaanikagha ku sha lwitiko lwabho. Yo yiiyo nongwa iyi umusimbi akabhakashanga mu lwitiko lwabho ku sila iya kulangisha ukuti uYeesu Kilisiti ghwa nalooli, soona ghwe yuuyo akusetula imbombo shooshi isha Chaala.
Inyango iya musimbi yikabha ya kulangisha ukuti uYeesu Mwana ghwa Chaala. Soona, uYeesu ghwi Songo ukukinda abhandumi bhaabho aBhayuuta bhakubhaghindika nu kukinda abhasololi bhooshi abha Lwitikano uLukuulu. Soona, umwene ghwi songo ukukinda uMoose yuuyo akabhapa aBhayuuta indaghilo ukufuma kwa Chaala, abhalongoshi na bhapuuti bhooshi. Ku sila iya Yeesu Kilisiti, abhandu bhooshi bhakupokeela ubhupoki ubhwa nalooli.
1
UChaala akuyugha nuutwe ukughendela ku Mwana ghwake
1 Ku mashiku agha bhwandilo ghala uChaala akayughagha na bhosekulu bhiitu ukughendela ku bhasololi* 1:1 Bhelenga ishu ilya Umusololi ku Mashu aMaheesha. bhaake. Akabhombagha ulwo akingi na ku sila inyingi. 2 Loole ku mashiku agha bhumalilo agha, uChaala akuyugha nuutwe ukughendela ku Mwana ghwake.† 1:2 UMwana ghwake Bhelenga ishu ilya UMwana ughwa Chaala ku Mashu aMaheesha. Ukughendela ku Mwana uyo, uChaala akapela kumwanya na pa chiisu ichi. Pabhumalilo, uMwana indiakapokeele utundu twoshi ukufuma kukwake. 3 UMwana uyo akulangisha muumwo uChaala akungʼangʼa ku bhukulumba, soona ghwe yuuyo chifwanikisho icha nalooli icha Chaala. Ku sila iya lishu lyake ilya maka, akupela utundu twoshi ukuti twendelelaghe ukubha isa muumwo tubheeliile. Akatwelufya imbiibhi shiitu, akabhuuka kumwanya nu kwikala ku kakono aka kumwisa aka Chaala ughwa Maka Ghooshi.
UYeesu ghwi Songo ukukinda abhandumi
4 Isa muumwo uChaala akamupa uMwana ghwake ingamu iya lughindiko ukukinda ingamu iya bhandumi, akamubhiika uMwana uyo ukubha ghwi Songo ukukinda abhandumi. 5 Paapo uChaala atakamubhuula ughwandumi naayumo amashu ghaagho akamubhuula uMwana ghwake akati,
“Ughwe ghwe Mwana ghwangu,
umuusughu naabha nee Ghuuso.”✡ 1:5 Sabhuli 2:7
Soona, uChaala atakamubhuula ughwandumi naayumo ukuti,
“Une indiimbe nee Ghwise,
ghwepe indiabhe Mwana ghwangu.”✡ 1:5 2 Samweli 7:14
6 Soona bhwo akumutuma uMwana ghwake yumoywene pa chiisu ichi, akati,
“Abhandumi bhooshi abha Chaala bhamwipuutaghe umwene.”✡ 1:6 Sabhuli 97:7
7 Soona bhwo umwene akuyugha isha bhandumi akati,
“Umwene akubhapa amaka abhandumi bhaake agha kusanuka ukubha ungati mbepo
na bhabhombi bhaake ukubha ungati mulilo.”✡ 1:7 Sabhuli 104:4
8 Loole bhwo akuyugha isha Mwana ghwake akati,
“Ghwe Chaala, ubhunyafyale bhwako bhwa bhwila na bhwila,
soona indiukabhalongoshange abhandu bhaako mu bhwanalooli.
9 Ughwe ubhughanite ubhwanalooli,
loole ubhubhengite ubhubhiibhi.
Yo yiiyo nongwa uChaala, uChaala ghwako,
akusalite ughwe nu kukupaka inyemba inyiisa
ukuti ubhe ghwe Songo
ukukinda abhanyiinyu bhooshi.”✡ 1:8-9 Sabhuli 45:6-7
10 Soona shisimbiighwe mu Masimbo aMeelu ukuti,
“Ughwe Malafyale, ghweghwe ukachipela ichiisu kubhwandilo,
soona ghweghwe ukapela na kumwanya ukubhombela utukono twako.
11 Utundu twoshi utwo inditukashile,
inditukayweluke ungati myenda,
loole ughwe indiukabheepo bhwila na bhwila.
12 Ughwe indiukatupetenganie utundu utwo
isa muumwo umundu akupetekengania umuselekesha,
indiukatusanushe ungati myenda.
Loole ughwe utaaukasanuke naalumo,
indiukabheepo bhwila na bhwila.”✡ 1:10-12 Sabhuli 102:25-27
13 UChaala atakamubhuula ughwandumi naayumo ukuti, “Ikala ku kakono kangu aka kumwisa, ukufika paapo indiingabhabhiike abhalughu bhaako paase pa tulundi twako.”‡ 1:13 Indiingabhabhiike abhalughu bhaako paase pa tulundi twako Kwo kuti, kubhapoota nu kubhalongosha abhalughu bhaake (Sabhuli 110:1). 14 Kali, abhandumi bho bhooni? Abhandumi mbepo shiisho shikumubhombelagha uChaala. Soona, umwene akushitumagha imbepo isho pakubhabhombela abhandu bhaabho indiakabhapoke.
*1:1 1:1 Bhelenga ishu ilya Umusololi ku Mashu aMaheesha.
†1:2 1:2 UMwana ghwake Bhelenga ishu ilya UMwana ughwa Chaala ku Mashu aMaheesha.
✡1:5 1:5 Sabhuli 2:7
✡1:5 1:5 2 Samweli 7:14
✡1:6 1:6 Sabhuli 97:7
✡1:7 1:7 Sabhuli 104:4
✡1:9 1:8-9 Sabhuli 45:6-7
✡1:12 1:10-12 Sabhuli 102:25-27
‡1:13 1:13 Indiingabhabhiike abhalughu bhaako paase pa tulundi twako Kwo kuti, kubhapoota nu kubhalongosha abhalughu bhaake (Sabhuli 110:1).