Ukalata ughwa Paabhuli kwa
Filimooni
Shiisho shikutangila
Ukalata uyu akasimbighwa nu Paabhuli, umutumighwa ughwa Yeesu Kilisiti. Akamusimbilagha umundu yumo yuuyo ingamu yaake akabha ghwi Filimooni (1:1, 19, 21). Shikulangisha ukuti uFilimooni akiikalagha mu kaaya aka Kolosaayi (Bhakolosaayi 4:9). Umundu uyo akabha mukabhi soona akabha na bhatumwa. UFilimooni akabha Mukilisiti, soona mu nyumba yaake mwo muumwo bhakabhungaanagha aBhakilisiti (1:2). UPaabhuli nu Filimooni bhakamanyana leka.
UPaabhuli akasimba ukalata uyu bhwo ali mu nyumba iya bhapinyighwa ku Looma kula, mu chinja icha malongo mahaano na limo ni fyinja fibhili (62) bhwo uYeesu Kilisiti aapaapighwa. Akasimba ukalata uyu ku nongwa iya mutumwa ughwa Filimooni yuuyo ingamu yaake akabha ghwi Oneesimo. Umutumwa uyo akiibha ifiliilo fimo kwa Filimooni (1:18), po akasobha. Mundaashi yaake akakomaana nu Paabhuli. Po uPaabhuli akamulumbilila iNongwa iNyiisa isha Yeesu Kilisiti, ghwepe akapinduka (1:10).
Ku fyinja fila linga umutumwa aasobha kwa songo ghwake, po linga bhaamukola, akalongighwanga ukughoghighwa. Ulu uOneesimo akalondagha ukughaluka kwa songo ghwake uFilimooni. Po uPaabhuli akamupa uOneesimo ukalata ukuti abhuuke naghwe kwa Filimooni. Mwa kalata uyo, uPaabhuli akumusuuma uFilimooni ukuti amupokeele uOneesimo ungati munine, soona ungati ghwi ghwamwabho mwa Kilisiti (1:16).
1
UPaabhuli akumulamuka uFilimooni
1 Une ni Paabhuli nee imbinyiighwe ku nongwa iya kulumbilila iNongwa iNyiisa isha Kilisiti uYeesu, ingukusimbila ughwe Filimooni. Une nu Tiimoti yuuyo ghwi ghwamwitu mwa Kilisiti, tukukulamuka ughwe ghwe uli mughanighwa soona mubhomba mbombo munyiitu. 2 Tukumulamuka nu mulumbu ghwitu uAfiya mwa Kilisiti nu mulwabhwite umunyiitu uAlikiipo pamupeene na bhiitiki bhaabho bhakukomaanagha mu nyumba yaako.
3 Ingusuuma ukuti ichisa nu lutengaano ukufuma kwa Taata uChaala na kwa Malafyale ghwitu uYeesu Kilisiti fibhange nuumwe mweshi.
Ulughano nu lwitiko ulwa Filimooni
4 Ghwe mughanighwa Filimooni, akabhalilo kooshi linga ingukwipuutila, ingumupaalisha uChaala 5 paapo ingupulika muumwo kumwitikila uMalafyale ghwitu uYeesu, nu lughano lwako ku bhiitiki abha Chaala.*1:5 Abhiitiki abha Chaala Bhelenga ishu ilya Abheelu ku Mashu aMaheesha. 6 Ingusuuma ukuti ulwitiko lwako luulwo luli pamupeene nuutwe lukwafwe ukuti ulumanye ngaani ulusayo luulwo uKilisiti atupiile. 7 Ghwe mwitiki munyiitu, ulughano lwako lwahobhosha leka nu kuungasha paapo ghwabhahobhosha leka abhiitiki mu ndumbula shaabho.
UPaabhuli akumusuuma uFilimooni ukuti amuhobhokele uOneesimo
8 Ku nongwa iyo, indi mwabhuke mwa Kilisiti ukukulaghila ukuti ubhombe shimo shiisho kulondighwa ukushibhomba. 9 Loole ingukusuuma ku nongwa iya lughano lwitu. Une ni Paabhuli ingubhomba ishi ungati mundu ghwi songo, soona yuuyo apinyiighwe mu nyumba iya bhapinyighwa ku nongwa iya Kilisiti uYeesu. 10 Ingukusuuma ukuti umwafwe uOneesimo†1:10 UOneesimo Kwo kuti, Yuuyo akwafwa. yuuyo ali ungati mwana kukwangu, paapo ingabha nee ghwise mu lwitiko bhwo indi mu nyumba iya bhapinyighwa. 11 UOneesimo atakabha ghwa kukwafwa lumo, loole ulu abhaghiile ukuunyaafwa leka une pamupeene nuughwe.
12 Pamupeene nu kuti imughanite leka uOneesimo ni ndumbula yangu yooshi, ulu ingumughalusha kukwako. 13 Ingamulondagha iikale nuune, apyanile pabhuyo bhwako ukuti aanyaafwange bhwo indi mu nyumba iya bhapinyighwa ku nongwa iya Nongwa iNyiisa. 14 Loole indakalondagha ukubhomba kooshi kala chishita bhwighane bhwako. Soona indakakufimbilishanga ukuti ghuunyaafwe, loole ingalondagha ubhombe ku bhwighane bhwako yughweghwe.
15 Lumo uChaala akamutiisha uOneesimo kukwako mu kabhalilo akapimba ukuti linga aaghaluka soona, ubhange naghwe akabhalilo kooshi. 16 Ukwandila ulu ataa mutumwashe, loole akinditeepo pa bhutumwa, ghwi ghwamwitu umughanighwa uMukilisiti. Une imughanite leka, loole ughwe indiumughane ukwongelaapo ungati mubhombi ghwako soona ungati ghwi ghwamwitu mwa Malafyale.
17 Linga kuumbiika une ukubha munyiinyu, po mupokeele uOneesimo isa muumwo ghwati ghuumbokeele une. 18 Linga akubhombiile akabhiibhi mu sila yooshi yila, pamu kumumelela kamu, po ghuumelelaghe une. 19 Ingusimba ukalata uyu na kakono kangu yuneene ukuti, “Une nee Paabhuli, indiingakutabhulile.” Loole manye ghwibhwange ukuti nuughwe ingukumelela ku nongwa iya bhwumi bhwako ubhupya ukubha Mukilisiti. 20 Ghwe ghwamwitu mu lwitiko, ku nongwa iya Malafyale, naapela, yisekeeshe indumbula yangu isa muumwo ingukusuuma, paapo tweshi tuli pamupeene mwa Kilisiti.
21 Ingukusimbila ukalata uyu paapo indi nu bhwanalooli ukuti indiubhombe shiisho ingusuumite, soona indiubhombe nu kukinda isho. 22 Pamupeene ni isho, ingusuuma ghuundondele ubhuyo ubhwa kufikila, paapo ingusubhaalila ukuti uChaala indiapulike inyipuuto shiinyu nu kuti indiaanyiitikishe ukuti niise imbateshe.
Ukulamuka nu kwipuuta ukwa Paabhuli ukwa bhumalilo
23 UEpafula akukulamuka. Apinyiighwe pamupeene nuune ku nongwa iya kuti ghwepe mukongi ughwa Kilisiti uYeesu. 24 Bhoope abhabhombi abhanyiitu uMaalika, uAlisitaako, uNdeema nu Luuka, bhakukulamuka. 25 Ingusuuma ukuti ichisa icha Malafyale ghwitu uYeesu Kilisiti chibhange pamupeene nuumwe mweshi.