BALUWA YA PAULI KWA
FILIMONI
ULONGULELU
Chitabu chidokwa kwa Filimoni chayandikiwili na ndundami Pauli sula ya 1:1. Pauli aveli muchijaka paghaveyi akuyandika, ayi yikulangusha kucha ayandikili paghaveyi Loma. Leki payiva aveli Loma topi dachivi chiyandikiwa kucha myaka milongu sita na wumu chipindi pasovili kala Kilistu, achi ndi chipindi chichila chila chaveli chiyandikiwa chitabu cha Vakolosayi.
Mweni ayandikili baluwa ayi kwa mundu yumu yakemiwili Filimoni. Filimoni aveli yumu gati ya vandu yivamjumilili Kilistu na mweni aveli na mvanda. Pauli amuyandikilili kumuluva akotoo kumtova mvanda waki Onesimu yaveli kamtuva. Kwa malawu va Valoma yaveli telatela kwa Filimoni kumuwulagha Onesimu. Pauli awombili kwa kumdedeka na kumkola mawoku Filimoni ili amjumili Onesimu kucha mlongu yamjumilili Kilistu kandi amluvili Onesimu ajumishiwi kukimbanika pamu na Pauli sula ya 1:13-14.
Fivelili mugati kwa chikata
Pauli akumjambusha Filimoni sula ya 1:1-3.
Pambeli Pauli akumluvila Onesimu ili Filimoni amjumili Onesimu kucha mlongu kwa vandu yivamjumilili Kilistu sula ya 1:4-21.
Pauli akumalilila kwa kuvika lipala chayilatili kuvatyangila na kuvajambusha. sula ya 1:22-25.
1
1 Nenga Pauli, mvanda wa Kilistu Yesu, pamu na mlongu Timotewu.
Tukukuyandikila yuwi filimoni mgolafichuku muyetu yitukutama, 2 na lipinga lya vandu yivamjumilili Kilistu liyitang'ana mukaya yaku na yuwi muhaja Afiya na machonda muyetu Alikipu. 3 Tukuvaluvila usangi na kusika kwa Tati wetu Chapanga na kwa Bambu Yesu Kilistu.
Utami na ujumilwa wa Filimoni
4 Chipindi chosi pandiva ngudadava, ngukukumbuka yuwi Filimoni, pandimlumba Chapanga, 5 nongwa ngupikana chilongu cha ujumilwa wa yuwi kwa Bambu Yesu na utami waku kwa vandu va Chapanga vosi. 6 Ngukudadavila ili ujumilwa awu wuyihasha pamu na yufwi wutugoli tuvi na umanyi nendu na nemusi shetu situpata mukwilumba na Kilistu. 7 Mlongu utami waku wunyeghela seku ngomi na kungola liwoku nendu! Na yuwi kusakapusha ndima sha vandu va Chapanga.
Pauli akumluva Filimoni amtangi Unesimu
8 Hata leki ngaweshili kugola ngajila lyogha, mugati ya Kilistu kulamula kukuwombela chindu chiwudayila kugola, 9 lakini kwanongwa ya utami ngukuluva. Nenga Pauli, muvaha na ponopa ng'opiwa muchijaka kwanongwa ya Yesu Kilistu. 10 Ndina chindu chimu cha kuluva kwa Unesimu mwana wangu muujumilwa kwa kwilumba Kilistu, ndiva tati mundu wa chindima pandiveyi muchijaka. 11 Ndi Unesimu yuyula yula mweni chipindi chimu aveli akujakwa ha, lakini panopawu akujakwa kwa nenga na yuwi wuwowu. 12 Ponopa ngumulayisha kwa yuwi, mweni kucha ndima yangu. 13 Ngadayilili ayikali apa na nenga andangi badili ya yuwi pandiva muchijaka kwanongwa ya Chilongu cha Nyanyi. 14 Ngukung'ang'anika ha undangi, usangi wa yuwi wukuva ngimu wudayila umweni kwa kung'ang'anikiwa ha. Dagoli ha chindu chochosi ngajila kung'ombela.
15 Pamongapa Unesimu akawukili kwa yumwi dahili hela, ili uweshi kuva na mweni majuva vosi. 16 Ponopa mweni mvanda hela ha, ila ngiba ya mvanda, mweni mlongu wetu yitumtamili. Kwa nenga katawuka nendu, kwa yuwi daghavi katawuka munu, nongwa kava mundu kucha yufwi, kava kucha mlongu Mubambu. 17 Topi leki kumanya nenga kucha muyaku, mpokeli kucha wula wungambokilili nenga. 18 Leki akakuvifyili chindu, awu akavelili na nongwa kwa yuwi, topi uhighi nenga danguhombi. 19 Ponopa kwa liwoku lyangu ndimweni nguyandika chilongu achi kucha, nenga Pauli dahombi. Ndina ndambu ya kudeta kucha ukuhighiwa yuwi umweni baha na nenga. 20 Yina, mlongu wangu, ugoleli chilongu achi kwanongwa ya litawa lya Bambu, usikishi ndima yangu kucha mlongu Mukilistu. 21 Nguyandika ili mbati shuvililu kucha dawujumili chinuvili, kandi manya dawugoli fikomi ya afi findikuluva. 22 Pamu na fyosi afi, mundandili chumbagati cha kuwonja, kwanongwa ngushuvilila kucha kwa dadavu shenu, Chapanga dasangili nyisi kuvatyangila.
Jambu ya mwishu
23 Epafula, muwopiwa muyangu kwanongwa ya kumukimbanikila Yesu Kilistu, akuvajambusha. 24 Wuwula wula, vagolafichuku vayangu Maliku na Alisitaku na Dema na Luka vakuvajambusha.
25 Nguvaluvila mwavosi usangi wa Bambu Yesu Kilistu.