Téerëe ɗéɓpí bíníyú unna won Pool ɓëy Tesalonik ra
Kúnsëe
Pool daa bíní ɓëy ílí jaŋii Tesalonik unni ƴeh. Tesalonik nék, ɗi húmú gin gaan, bi hom hëbís muluɓ te lom a yaay húmú tílté në lool, haanoh ala ñéerëˈ a pagaɗ ɓos húmú caakke na ɓal. Ayaˈ Pool daaha ra, ɗi cëgíɗté goomal ɓëewí gémúté Yéesú daaha, ndaa ɗi maañay na ndah lahte yëwúɗɗí hatlute ri, ɗi kolohte saañce Bere (Saame Tílëdí apootarra 17.1-10).
Hompe níi filoon fe, ɗi hom Korente, Timoote fa ɓani na ñéerúu légéy rë ɗeeffe ri daaha léhínté rí yee ɓeyaˈ ri Tesalonik ra (3.6). Unna léhínú Pool ra sosil keeña soslo níi ɗi yampe na bíní unni ƴeh, kéyrëˈté wë ɓëy Tesalonik, na sím Koope di ɗee na yeeluu ɓëewë hatni baaha ɓëy Tesalonik, bee lofuu wa pesaɗ ra (1.7-10). Ɗi nérsëhté légéyë húmú légéy rí filiɓ fi wa ra, na won ɗee fahaˈ ri waa olaat ra. Ɗi gíníkké wë di yee na húmú halaatu wa sun fi kolohi ow ɓúudé rë.
Ɗi wonte wa :
- yii leŋke ɗee gémúu wë rë (1.2-10),
- yii leŋke tílëdí di Tesalonik (2.1-12),
- yii leŋke tílëdë fahaˈ Koope ra (4.1-12),
- a yii leŋke nimili Yíkëe (4.13 níi 5.11).
Ɓëyí fí jaŋi téeríi bee ɓéeɓ ay ot biti iña filiɓ mín yúun ɓëewë lahu nuf ana di yii leŋke ɗúmëení pesa ra. Ɗi ay yúh biti ɓal ɓëewë gémú Kiristaa na ra nonu ɓëy niiña, wa ham híin biti fayu raa, wani Yéesú nay home. Baa daa lukki lah solo !
1
Wodohi Pool ɓëy Tesalonik
1 Ɗon fi ɓëy ílí jaŋii Tesalonik fa nonu ɓëewí Baap-Koo a Yéesú-Kiristaa Yíkëe rë, soˈ mi Pool, funi Silaas a Timoote, fun na woduu ron. Koope líhë rën mal, on ɗon jaamma.
Ɗee gémúu ɓëy Tesalonik Yéesú në rë
2 Fun na símú Koope faraah ndah ɗon ɓéeɓ, fun mësúy ɗon hal filiɓ ɗaŋŋi fun. 3 Nuffi fun na koleeh ɗon na biti fun home ɗaŋi Koo, ɗi fi Boffi yen, di iña na pagu ron ndah gémë gémú ron Yéesú-Kiristaa Yíkëe rë, a pagaɗɗon ndah fahaˈ fahuu ron ri ra, a yaakaara dékúu rën lah ɗii na ra. 4 Koy-yaayyi ƴee Koope fahaˈte ron ƴee ra, fun yúhúté biti daa ri tanis ɗon, 5 ndah na waariyu fun ɗon Uni Neba ra, húmú teyay won doŋ, ndaa húmú ñéerëˈ a doole, a Ruuh-Peseŋ, a ngémí híinté. Ɗon olute ɗee húmú homuu fun ɗon na, komi ron yii wunte ɗon na ra maan ? 6 Te ɗon, ɗon ñeyute kotti fun a kotti Yíkëe bee tahuu ron Una ra. Tahuu ron ri ra nék, ɗon deƴute coono ndaa Ruuh-Peseŋ tahte keeññon sosse. 7 Ɗaaha, ɓëewë gémú te dékú Maseduwaan a Akaay ra ɓéeɓ yeeluu ɗon na. 8 Af ɗon tahte unni Yíkëe teyay Maseduwaan a Akaay doŋ, ndaa haslaˈte gina ɓéeɓ ndah gémë gémú ɗon Koope ra hente lëyëŋ. Kon miteh fun wonle yin na. 9 Ɓëewë gonluu sun fi ɗee habuu ɗon fun ayuu fun ɗon na ra. Wa na wonu ɓal sun fi ɗee súugúu ɗon yúullë ɗon yíssúuté Koope na, jaamiyohi ɗi fa na pes te daa kaaf ka ra 10 a sehaalohi kolaˈi Koohi Yéesú sun cép feey ra. Ɗi fi Yéesú fa ɗi këlíɗ ɗí ɓúudé rë, sëmlëˈté yen níi yen ay múc neebi Koope yiin bis-këem.