1 Koy-yaayyi ƴeh, ɗon yúhrúté affon biti sah aya húmú ayu fun ginon ɗa pëtíh neh. 2 Ɗon yúhúté biti ɓal, balaa baaha fun maluute sol te fun ñeyute mok di Fílíp. Ayuu fun ginon ɗa ɓal, fun maluute tolof tolof caak daaha, ndaa Koope habra⁠ˈ⁠te fun níi fun waariyute ron Uni Neba te fun neehuy na dara. 3 Te na waariyu fun ɗa ɓéeɓ, fun tíkúy wonni fun sun fi yii lahay, fun tíɓúy në nuf ɓos, te fun saamuy na nofa⁠ˈ ow. 4 Fun kay, fun waariyuu Uni Neba ɗee faha⁠ˈ ri Koope ra. Ɗi otte biti fun mínú rí, daa tah ɗi déŋéen fun ɗi. Fun saamuy yii neɓa⁠ˈ ow, fun saamu yii neɓa⁠ˈ Koope, ɗi fa na olsoh níɓɓí fun ra. 5 Ɗon yúhúté biti fun mësúy jay ow, te fun mësúy ñeya⁠ˈ wonni fun fun saame yin ow na. Koope yúhté baaha⁠ ⁠! 6 Fun saamuy kañ ow na : ɗon na neh te ow kay na neh ; 7 te añcaŋ, fun mínú ron cagoh koon ɗon paŋ yee fahuu fun ɗa ndah fun apootarriKiristaa, ndaa fun paguy ri⁠ ⁠! Fun kay, fun sosu soso filiɓ fon ti ɓelii na tooppitoh koyyi nen. 8 Pokoha pokuu fun ɗon na ra tahte fun húmú teyuy waarii ron Uni Nebi Koope kep, fun bokute a ɗon pes, ndah fun fahuute ron níi faha⁠ˈ.

9 Koy-yaayyi ƴeh, ɗon nérsúuté ɗee húmú mokuu fun níi mok ɗa maan ? Fun húmú légéyúu yii ñamun fun légéyëe na⁠ˈ a elek, kaa⁠ˈ fun mokil ow yínë sah ɗon na, na húmú waariyu fun ɗon Uni Nebi Koope ra. 10 Ɗon mínú fun ɗii seedeyiɗ, te Koope mín fun ɗii seedeyiɗ ɓal biti ɗee tílúu fun a ɗon fa gémú rë lante, júɓpé te tíkëhté waal. 11 Ɗon yúhúté biti ɗee tílúu fun a ow fi ow ɗon na ra ɓéeɓ, man hanndal baap a koyyi nen : 12 fun líkínúté ron te fun onute ron doole, fun caguute ɗon nda ɗon pes pesada neɓa⁠ˈ Koope, ɗi fa na dëek ɗon, ɗon non Nguur ki a ndami ra.

13 Yee tah fun ay dékée símí Koope ra biti ɓal : liiluu ron Un Koope fa komu fun ɗon ɗa, ɗon habute ri, te ɗon habuuy ri ti di na habuu un ow kese nen. Ɗon habuu ri biti ɗi Un Koope, te ri Un Koope kaah. Una ee paŋ yii wunte ɗon fa gémú Yéesú në rë. 14 Koy-yaayyi ƴeh, ɗon ñeyute kotti ɓëy ílí jaŋii Yúdée yë gémú Koope te nonu Yéesú-Kiristaa na ra ndah di mokluu wa yëwúɗɗë, ɓëy ginon mokluu ron ɗaaha ɓal. 15 Wa fi yëwúɗɗë hawute yonente ya húl, hawute Yéesú-Yíkëe, moklute fun níi mokil. Wa neɓuuy Koope, fahiruy ow yin wun, 16 kadduute fun waarii heetti kayya Una mín tah wa múc ɗë. Wa homute na ɓaatuu bakaaɗ rek na suu níi bakaaɗɗi wa mitte, neebi Koope keente sun fi wa.

17 Koy-yaayyi ƴeh, fun nék fun húmú koluute ɗon na fun suute, ndaa fun sayuy faraah. Fun húmú lahuy fehey saañi fun, ndaa keeññi fun húmú kolaay ɗon na. Fun húmú kosuuy biti fun ay ron tíkíl íl, tahte lahay yii paguy fun nda yii baa mín lah⁠ ⁠! 18 Fun húmú habute biti nagajek fun ay nimil ginon, te so⁠ˈ mi Pool mi étíɗté rí i waal, ndaa Seytaane daa na yah waali fun. 19 Kon henay ɗon moos, heneh ow kay⁠ ⁠! Ɗon daa yaakaari fun, ɗon daa sësɗú keeññi fun te ɗon daa baanii ndama nay teeɓee biti fun ɓagute níi fun damoh fíi Yéesú-Yíkëe yiin nay rii aye ra. 20 Wa ɗon kay⁠ ⁠! Ɗon daa ndami fun, te ɗon daa sësɗú keeññi fun.