4
Tílëdë fahaˈ Koope ra
1 Leegi nék koy-yaayyi ƴeh, fun teeɓute ron ɗee waruu ron pesaˈ níi ɗon neɓaˈ Koope ra, te fun yúhúté biti ɗon pesuu ɗaaha níi a ɗeh. Kon fun na líkínú ron te na ɗagu ron di tii Yéesú-Yíkëe biti ɗon ɓaatti ham híin, 2 ndée, ɗon yúhúté túuƴëˈ yë teeɓu fun ɗon ra, te wa ɗúhëˈ Yéesú-Yíkëe në. 3 Koope fahaˈ biti ɗon lan, te lani baa daa ri bitih : ɗon moytoh paŋ yii tappe njaaliyoh ɓéeɓ, 4 ow fi ow ɗon na ɓéeɓ ham afi sútërël faani, ñéerëˈ a lan*4.4 ow fi ow ɗon na ɓéeɓ ham afi sútërël faani, ñéerëˈ a lan :Lahte ɓëewí habuu ri ɗeh : ow fi ow ɗon na ɓéeɓ koloh saam ɓeleɓ raa, lah ñeyaa ri waal., 5 fah-ɓeleɓ ɓan ɗii kúrëelëh ti ɓëewë nëníh ɓëewí Koope ra nen, wa fa yíih Koope ra. 6 Ow ɓanay tooñ moroomi filiɓ yee wonu baa ra ndín leɓ yii daa ri lahaˈ ri. Fun húmú wonute ɗon biti Yíkëe ay keen sun fi ɓëyí paŋ mani pagaɗɗi ƴah. 7 Koope dëekëy yen paŋ yin ɓos, ɗi túuƴ yen lan. 8 Kon ɓëyí faaliyaay yee wonu baa ra, ɗeef ɗi faaliyaay won ow neh, ɗi faaliyaay Koope fa on ɗon Ruuh-Peseŋ ɗa.
9 Yii leŋke fahantaˈ hanndal kon, miteh ow won ɗon yin na, Koope yëedíɗté ɗon baaha níi wocce. 10 Daa ri yee teeɓu ɗon koy-yaayya Maseduwaan ɓéeɓ ɗë, ndaa kaaˈeeh fun won ɗon biti ɗon ɓaat yaˈ yon, 11 ɗon paŋ ɓéeɓ ɗon pesaˈ jaamma, ow fi ow ɗon na ɓéeɓ tooppitoh iñi afi, ɗon yuloh légéy ɗon kúɗ affon, ti di húmú wonuu fun ɗon ɗi nen. 12 Hen ɗaaha raa, ɓëewë gémúy rë ii ron yap te ɗon ii seh dara ow na.
Yiin nay nimile Yíkëe rë
13 Koy-yaayyi ƴeh, fun fahuu biti ɗon yúh yee homuu ɓëewë húlúu a ngémí wë Kiristaa na ra, ɗon ɓanti tík misiga keeññon níi lukus ti ɓëewí kayya lahuy yaakaar ra nen. 14 Yen gémú biti neh Yéesú húlté te ri kolohte ɓúudé ë ? Ti ɗaaha nen, yen gémúté biti ɓal Koope ay këlíɗ ɓëewë húlúu a ngémí wë Yéesú në rë. 15 Cëe fun ɓílíɗ ɗon yee won Yíkëe rë : ɓëewë nay lísée pes yen na níi a baaha ra, wa fa nay maasee nimili Yíkëe rë, wa ii këllëh ɓëewë húlú rë. 16 Yiin fin fa, wa ay keloh uni diŋke, un kélfë malaaka a un kúlúɓ ki Koope tiil, ɗi fi Yíkëe kolaˈ sun cépé. Bín fë rëe, ɓëewë húlúu a ngémí wë Kiristaa na ra nay ɗéɓée koloh, 17 ɓëewë nay lísée pes níi a baaha ra, anti ɓéyrú wa ñéerëˈ a wa filiɓ nérrë, wa teeˈee a Yíkëe sun. Hen ɗaa raa, yen fa gémú ɗii na ra ɓéeɓ yen hom a ɗi faw. 18 Kon, lah ënëntíi doole a unni ƴah.
*4:4 4.4 ow fi ow ɗon na ɓéeɓ ham afi sútërël faani, ñéerëˈ a lan :Lahte ɓëewí habuu ri ɗeh : ow fi ow ɗon na ɓéeɓ koloh saam ɓeleɓ raa, lah ñeyaa ri waal.