5
Nimili Yíkëe sehuun a teey
1 Koy-yaayyi ƴeh, di yii leŋke wahtaa a jamanaa nay nimile Yíkëe rë nék, miteh fun won ɗon yin na, 2 ndah ɗon yúhrúté affon biti yiin nay nimile Yíkëe rë ay beettiyaˈ ti lohoh elek nen. 3 Tígë nay habee ɓëewë biti homuute jaamma, lahuy dara yii sídúun wë rë, gina ay yípée bëp affi wa daaha, ti di na yíppí habaˈ loo ɓeleɓ nen. Ow ii naa mín fús. 4 Ndaa ɗon fi koy-yaayyi ƴeh, bi homuy ɗon ñúusë, bisi baa ii ron beetti ti di na beettiyaˈ lohoh nen. 5 Nagajek ɗon ɓéeɓ, ɗon nonu ɓëy niiña, ɗon tílúu naˈ. Yen nëníh ɓëy elga, ɓëy ñúusë. 6 Kon, yen ɓanuy neeˈ ti di na neeˈuu ɓëewí kayya nen ; yen yeelun yen teey. 7 Ɓëewë në neeˈu ra neeˈuu elek, ƴee na maniyu ra maniyuu elek, 8 ndaa yen fa na tílú naˈ ra, yen warun teey teeyo. Yen habun ngémë, yen fahaˈ ow wa hen búuɓ túl yen na, yen habaˈ yaakaari mújë baane haaˈaa yen na. 9 Ndée nagajek, Koope cagay biti ɗi ay kéeníɗ neebi sun fi yen, ɗi caŋ biti yen haal mújë nay onee Yéesú-Kiristaa Yíkëe rë. 10 Kiristaa húlíɗté yen. Ɗaaha, bisa nay rii nimile ra ɗeefa yen pesun peso mbée yen húlún húlë ɓéeɓ, yen ay pes a ɗi. 11 Kon ɓëetíi onantaˈ doole, ɗon tojantaˈ filiɓ ngémë ti di na pagantuu ɗon ɗi nen.
Iña míllúu wëe túuƴ ɗë
12 Koy-yaayyi ƴeh, leegi fun fahuu biti ɓëewë homu filiɓ fon na moku, Yíkëe nah wa níidí ɗon a líkíní ɗon ra, ɗon yeɗ wa cér. 13 Hëbí wë, ɗon fahaˈ wa níi fahaˈ ndah légéyí wë. Pésíi jaamma filiɓ fon.
14 Koy-yaayyi ƴeh, fun ee ron wonu ra ee : líkíní ɗëpësíɗɗë, ɗon ɓen ɓëewë neehu ra, ɗon habraˈ ɓëewë gooyu ra, ɗon mújíɗ ɓëewë ɓéeɓ. 15 Mëytíi yíllëntëˈ ɓos filiɓ fon ; sëemí wuna faraah hanndal kon a hanndal ki ɗoni ɓëewë ɓéeɓ. 16 Pésíi sos-keeñ faraah, 17 ɗon dékëˈ ɗaŋ. 18 Yii mín ɗon homaˈ ɓéeɓ ɗon sím Koope. Baa daa yee fahaˈ ri pesi ɗon fa nonu Yéesú-Kiristaa na ra. 19 Ngënë këeˈíi pagaɗɗi Ruuh-Peseŋ, 20 ngënë hégíi unna léhínú kolaˈ Koope na ra. 21 Kénsíi wë ɓéeɓ, ɗon ham ƴee wun ɗa ; 22 yii hente ɓos ɓéeɓ ɗon moytoh ri.
23 Ɗi fi Koope fa na onaˈ jaamma ra ladla ɗon ces ; ɗi níirë níɓɓën, níiɗ keeññon a faannon ɓéeɓ níi ow laheh yii wona ri ron, yiin nay nimile Yéesú-Kiristaa Yíkíi yen ɗa. 24 Koope fa dëek ɗon ɗa, yii won ɗi ɓéeɓ ɗi paŋ ri, te ri ay ron rii pagiree ɗaaha.
25 Koy-yaayyi ƴeh, lah ɗëgírí fun ɓal. 26 Lah wëddí fun koy-yaayya ɓéeɓ níi wodoh*5.26 Di ɓaahi ɓëewí ƴaaha, wa ƴahti wodoh ɓëewë mboko yi wa mbée ɓëewë meeru wa raa, wa fëenúu wë fëenëe.. 27 Mee ron rii won ra ee di tii Yíkëe, lah léhíní wë ɓéeɓ unni ƴah.
28 Yéesú-Kiristaa Yíkíi yen líhë rën mal !
*5:26 5.26 Di ɓaahi ɓëewí ƴaaha, wa ƴahti wodoh ɓëewë mboko yi wa mbée ɓëewë meeru wa raa, wa fëenúu wë fëenëe.