1 Koy-yaayyi ƴeh, ɗon fa ñeyu yee neɓaꞌ Ruuh-Peseŋ ra, ɗon ɗeef ow di koy-yaayya filiɓ ngémë tooñe raa, tíkí rí waal ɗon wonaꞌ a ri ndaŋka. Pëgí níi nék ɗon ɓanti ñee yee paŋ ɗi baa ra ɓal. 2 Lah hëbírëntíi filiɓ ennon. Ɗon ay ñeyee yee fahaꞌ Kiristaa ra ɗaaha. 3 Bee ow habaꞌte afi ow gaan ɗeefa ɗi tikkiyay yin ra, ɗi nofaꞌte afi⁠ ⁠! 4 Ow fi ow ɓéeɓ olsaa di na pesaꞌ ri⁠ ⁠; ɗi ot biti ri paŋke yii wunte raa, ɗi yúhíɗ ɗí afi, te ri ɓan ɗii olsaꞌ yii paŋ ow kay, 5 ndah ow fi ow ɓéeɓ waɗti enaa sayi.

6 Ɓëeꞌ na yoon unni Koope ra, woraa yii wuni lahaꞌ ri a ɓëeꞌ në yëedíɗ ɗí rë.

7 Ngënë nëfíi affon⁠ ⁠: Koo tahay biti ow yap ɗi. Yii soh ow ay lece ri. 8 Ɗi soha pesaꞌ yee neɓaꞌ ri ɗi fa ow kut ɗa raa, ɗi ay lece kúl kë. Ndaa ri soha paŋ yee neɓaꞌ Ruuh-Peseŋ ra raa, ɗi ay lece pesa na ɗúméh rë. 9 Yen ɓanuy tídëh paŋ yin wun⁠ ⁠! Yen yeɗɗuuy níi wahtaa lah raa, yen ay lec. 10 Kon wahtii mínúun ɗí yen rek, yen pagiɗ ɓëewë ɓéeɓ yin wun, níi lukaꞌ koy-yaayyi yen filiɓ ngémë.

11 Ɗon olute ɗee gúusëꞌ bínëe rë maan⁠ ⁠? Daa mi na anti hom bíní a yaꞌ soꞌ ɗeh. 12 Ɓëewë në fahuu ɗon yeñ lecoh ra, wa saamu tii doŋ pesi beh. Wa kaaꞌuu biti kut kurwahi Yéesú-Kiristaa tah wa moklu. 13 Wa fa na lecuu ƴaa ra na lukki ñéyíh yee won Kootaa ra sah faf⁠ ⁠; wa fahuu biti rek ɗon lecu ndín, wa lah yii damuun wa biti daa wa túuƴú ron tíinndëꞌí baa faannon. 14 Soꞌ nék, may mínée damaꞌ kurwahi Yéesú-Kiristaa Yíkëe. Daa ri tah ëldúnë húlté soo na, soꞌ ɓal mi húlté ëldúnë në. 15 Ow lecoh lecaay ɓéeɓ, lahay solo. Yee lah solo ra daa ri biti ɓëeꞌ lofisoh, hen mbínéef has. 16 Ɓëewë na tílúu kotti lofisohi baa ra ɓéeɓ, mi won wa tee⁠ ⁠: Koope ona wa jaammii, teeɓ wa naaꞌ-keeñ, boollaꞌ goomali ɓëewí*6.16 goomali ɓëewí ⁠ ⁠: Di gerek, bíníyú ɗeh⁠ ⁠: Israyel fi Koope. ɓéeɓ në. 17 Dalaꞌte woteh, ow ɓanay soo mokil, ndah faan soꞌ líiffé muuh yi gaañña gaañu mi ndah Yéesú rë. 18 Koy-yaayyi ƴeh, Yéesú-Kiristaa Yíkíi yen líhë rën mal⁠ ⁠! Ɗémíin⁠ ⁠!