1 Jamanii baaha, buura hínú Ëgís rë túuƴë⁠ˈ⁠té kíní ɓëewë dékú ginna Rom ílíf wë rë ɓéeɓ. 2 Lahi kínë ɗéɓ baa ra, ɗeef Kiriñus daa kélfíi gini Sírí, 3 te ow fi ow ɓéeɓ saya⁠ˈ bíníyëh gina coosaana⁠ˈ ri ra. 4 Ɗi fi Suseef ɓal nampee koloh Nasaret di Galile, saañce Betle⁠ˈ⁠em di Yúdée, gina coosaana⁠ˈ Dawit ra, ndée ri non tali Dawit. 5 Na saañ Suseef bíníyëh rë, ɓani Maryaama ñéerúu. Ɗeef Maryaama húmú pokke loo. 6 Homi wa Betle⁠ˈ⁠em daaha, lowa hampe ; 7 ɗi saawohte koy ƴaal. Ɗi lëmëssé baakera ndíimú, fëníɗté rí mbalka ñamaa júr, bi ɗeef wa húmú ɗëmíh lasa na hanluu ayoh ya ra*2.7 Jamanii baaha, ɓëewë ginna luufa deyi baaha a júrë húmú mínú nee⁠ˈ lasa yínë. Ɗeefuu wa lasa na hanluu ra líiffé rë, Suseef a Maryaama húmú lasa na hom júrë rë..

8 Húmú lahte níirëh yí na nee⁠ˈ⁠u wohi yuppi wa luufi baaha. 9 Malaaka yínë di malaaka yi Koo-Yíkëe púlëhté waa na, niiñi ndami Yíkëe hawaante wa. Tígí daaha, wa tíitúté níi tíit. 10 Malaakaa won wa tih : « ⁠ ⁠Ngënë tíití⁠ ⁠! Mi ac wonon yii neɓpe keloh, yii ay sosil keeññi ɓëewë ɓéeɓ níi sosil. 11 Elgee woteh beh, di gin Dawit, lahte Sëmlëhí límɗúté rën, daa ri Kiristaa, daa ri Yíkëe. 12 Te ɗon ay rii yúhsée ɗeh : ɗon ay ot baakeri lëmësú ndíimú, fënɗú mbalka ñamaa júr.⁠ ⁠» 13 Malaakaa na woc wona, malaaka caak yípútée ríi ɗeefiɗ, wa na njooɓru Koope wonu tih : 14 « ⁠ ⁠Koo laha ndam di sunaa-sun, te ɓëewë ri faha⁠ˈ wa ra ɓéeɓ lah jaamma feey fa.⁠ ⁠»

15 Nimiluu malaaka ya sun-Koo ra, níirëh yë na wonantuu hanndal ki wa tih : « ⁠ ⁠Yen yíppí koloh yen saañ Betle⁠ˈ⁠em, yen ole yee lah ra, yee teeɓ yen Koo-Yíkëe rë.⁠ ⁠» 16 Wa yípútée koloh suute na saamu. Lahuu wa ra, wa olute Maryaama a Suseef, wa ɗeefute baakera fënɗúté mbalka ñamaa júr. 17 Oluu wa kúkëyë rë, wa ɓíllúté yee won wa malaakaa sun fi ra. 18 Ɓëewë keluu ɓíllí níirëh yë rë ɓéeɓ éemúté woni wa níi éem. 19 Ɗi fi Maryaama hampe iñƴaa ɓéeɓ afi, na níɓ në. 20 Níirëh yë anutee koloh na nimilu yuppi wa, na kañu Koope, na njooɓru ri di iña keluu wa te olute wa ra. Iña ɓéeɓ lahte ti ɗee húmú wona⁠ˈ wa malaakaa ra nen.

21 Nimila⁠ˈ bisa límú kúkëyë rë, wahtaa nay rii lecu ra lahte ; ɗi yerute tii Yéesú ti di húmú naha⁠ˈ ri malaakaa ɗeef yaafa pokay loo doom ra.

22 Hompe níi wahtaa waɗ waa púusúun rë lahte ti ɗee túuƴë⁠ˈ rí kootii Mëyíis rë nen. Tígí daaha, Suseef a Maryaama koluute kúrúté Yéesú Yerusalem, jébëlúté rí Koo-Yíkëe, 23 ndée bíníyúté di kootii Koo-Yíkëe bitih : « ⁠ ⁠Koy ki saawi ƴaali límú ɓéeɓ ay jébëlú Koo-Yíkëe.⁠ ⁠»✡2.23 Saame Kolohi koyyi Israyel Ésíp 13.2, 12, 15 ; Kíní ɓëy Israyel 18.15-16 24 Wa yeruute hawra na naha⁠ˈ kootii Koo-Yíkëe rë ɓal : hëtë ana mbée bëdú teem-teem ana†2.24 Kootaa húmú naha⁠ˈ hawiɗ har a hëtë mbée har a bëdú teem-teem, ndaa ɓëyí húmú lahay cadum har raa, ɗi mín yera⁠ˈ hëtë ana mbée bëdú teem-teem ana. Saame Tali Léwí 12.8..

25 Húmú lahte ɓëyí dék Yerusalem, ɗi hínú Simewoŋ. Ɗi júɓpé, gémpé Koope níi gém, te lahte yaakaar ayi ɓëe⁠ˈ nay sëmlée ɓëy Israyel ra. Ruuh-Peseŋ húmú haalte ri, 26 te teeɓpe ri biti ɗi ay ot Buura Koo-Yíkëe fal ri ra, balaa ri húl. 27 Ɗaaha, Ruuh-Peseŋ yeñce ri Faam fi gaani Koope. Kúrúu Suseef a Maryaama koy wa Yéesú paŋi yee naha⁠ˈ kootii Mëyíis rë, 28 Simewoŋ ɓeɓpe kúkëyë ɓoppe ri, símpé Koope na won tih : 29 « ⁠ ⁠Koo-Yíkëe, yee gap fu so⁠ˈ ra lahte woteh. Fu mín sëe yeris so⁠ˈ mi súrgúu mi húl, mi saañ a jaamma, 30 ndée mi tíkké íllí së⁠ˈ ngëeƴ sun fi Sëmlëhë wol fu ra, 31 te ɓëy ëldúnë ɓéeɓ ay rii ot. 32 Daa ri niiña nay tahe heetta feey fa ɓéeɓ yúh rë rë ; ɗi ay on ɓëewú, ɓëy tali Israyel ndam.⁠ ⁠» 33 Boffa a yaafa éemúté yee won Simewoŋ sun fi kúkëyë rë. 34 Simewoŋ ɗagiɗte wa antee won Maryaama yaafi Yéesú tih : « ⁠ ⁠Koope daa wol kúkëyí beh, kéenɗí a ɓéyrí ow caak Israyel. Ɗi ay hen tíinndëe te ɓëewë ay rii kaa⁠ˈ. 35 Ɗi ay tah ow caak teeɓa⁠ˈ yee hom nuffi wa ra ; te ɗo fi yaafa, fay lah yii ay roo misik keeñu níi misik.⁠ ⁠»

36 Húmú lahte yonentii ɓitiffe níi ɓitif hínú Aane ; ɗi koy Penuwel fa tali Aseer. Ɓani ƴaala húmú kooɗ ri hena⁠ˈ ri cafaƴ ra pesute kíil paana, ƴaala antee húl. 37 Kola⁠ˈ⁠te baaha, ɗi pesse níi ri lahte kíil sabay peeye a kíil iniil (84) te ri lahaatay ƴaal kay. Ɗi homa⁠ˈ Faam fi gaani Koope na⁠ˈ a elek oore, ɗage. 38 Ɗi laha⁠ˈ daaha ɗeeffe wa na, ɗi yampe na sím Koope, na won ɓëewë në sehaaluu biti Koope ay sëmlë⁠ˈ Yerusalem ra ɓéeɓ yii leŋke kúkëyë në.

39 Wocuu boffi Yéesú a yaafa paŋi yee naha⁠ˈ kootii Koo-Yíkëe rë, wa nimilute gin wa Nasaret di Galile. 40 Yéesú na ooɗ, afa na ɓaatti kúnsëh na won wonaɗ ɓaha. Ɗi húmú neɓpe nuf te Koope yeɗɗay ri.

41 Húmú lahaa kíil ɓéeɓ, boffi Yéesú a yaafa pay feedi PaagaYerusalem. 42 Laha⁠ˈ Yéesú kíil sabboo a kíil ana ra, wa ñéerúuté a ri suute feedin, di ɓaahuu wa ri. 43 Ɗúmë⁠ˈ feeda ra, ɓëewë në nimilu, ndaa Yéesú tasse Yerusalem te boffa a yaafa yíih yin na. 44 Wa habuu biti koon ɓani kooƴƴa ñéerúu rë daa homu, níi wa tílúté bis múlgús. Kanuu wa ri ra, wa na anuu rii saam mboko ya a kooƴƴa na. 45 Oluy wa ri ra, wa nimilute Yerusalem na saamu ri. 46 Waali éeyë fë, wa ɗeefu ri filiɓ Faam fi gaani Koope tookke yëeddëh yë në, na síkírëh wë, na meel wa. 47 Ɓëewë në síkírúu rí rë ɓéeɓ, éemúté ɗee ñaaña⁠ˈ ri ra a ɗee na lofa⁠ˈ ri won ra. 48 Boffa a yaafa éemúté níi éem oluu wa ri ra. Yaafa won ri daaha tih : « ⁠ ⁠Ɗo fu paga⁠ˈ fun yii bee ɗíh ? Funi boffu moku moko saamu níi mok.⁠ ⁠» 49 Ɗi won wa tih : « ⁠ ⁠Ɗon saamuu so⁠ˈ yih ? Ɗon yíih biti mi waɗti homa faam Baaso⁠ˈ a ?⁠ ⁠» 50 Ndaa wa yíih yee faha⁠ˈ ri waa won baa ra.

51 Yéesú kolohte ɓani wa nimilute Nasaret. Ɗi tassi ñeya⁠ˈ woni wa. Yaafa hampe iña lah ƴaa ra ɓéeɓ afi. 52 Yéesú na ooɗ, nufa na ɓaatti neɓ ; ɗi ɓaattee neɓa⁠ˈ Koope a ɓëewë.