18
Anili ɓelaa ƴaali húl rë a aattiyoha
1 Filoon fe, Yéesú na teeɓ taalibe yi biti ow waɗti ɗaga Koope ɗago faraah ɓanti jëbël. Ɗi ñeyaˈte wa anili beh na léeh wë won tih : 2 « Lahte aattiyohi húmú gina kíilë ; ɗi neehay Koope te ɗi yeray ow cér. 3 Lahte ɓelii húmú gina ɓal ƴaala húlté, hom payaˈ payoo faraah ɗeefre aattiyoha, wone ri tih : “Aattiyaˈ funi kaaˈohi soˈ.” 4 Hente yii maañce, aattiyoha kaaˈaˈte síkírëhí ɓelaa. Hompe níi lahte bis, ɗi won nufi tih : “Kaah biti mi neehay Koo te mi yeray ow cér ; 5 ndaa may paŋ yee waɗ ɓelii bee na ñogol soˈ faraah bee ra. Henay baa ɗi ay dékée ac, te ɗi ay soo míllëˈ mokil níi mi tallee húl.” » 6 Ɗi fi Yíkëe antee ɓaat won tih : « Kélíi yee won aattiyohi ɓosi baa ra ! 7 Ɗon habuuy tígí daaha biti ɗi fi Koope ii yeɗ ɓëewë ri tanis wa ra kaah, wa fa na fogu ɗii na naˈ a elek ra a ? Ɗi ay waa yeris daa wa sehe a ? 8 Mee ron won ra ee bitih : ɗi ay waa yíppí yeɗ kaah. Ndaa soˈ mi Koy-ɓëeˈ mi ac raa, mbaa may ɗeef ngém feey fa ? »
Anili fariseŋa a yeekohi túmë
9 Yéesú antee ñeyaˈ anili beh na léeh ɓëewë habuu affi wa biti júɓúté íllí Koope te wonuy yin ɓëewí kayya ra, won tih : 10 « Húmú lahte ɓëewí ana yi haalu ɗaŋ Faam fi gaani Koope : ɓëyí yínëe fariseŋ, yínëe yeekoh túm. 11 Fariseŋa hom a afi na ɗaŋ Koope won tih : “Koope, mi na sím rë di yee maday mi a ɓëewí kayya ra : ƴee na lohu, ƴee na njaaliyuu a ɓëewí ɓossi kayya. Mi na sím rë di yee maday mi a yeekohi túmí bee ra. 12 Bis níi nimil ki bis, mi na oor na waal ana, te yii lah mi ɓéeɓ, woruun sabboo raa, mi yeɗ ɗo wodi yínëe.” 13 Ɗi fi yeekohi túmë hompe filoon, kaañay sah ɓéyíɗ afi, yampe na laɓ araali won tih : “Koope yérém sëˈ, soˈ mi bakaarohi beh.” » 14 Yéesú ɓaatte won tih : « Mee ron won ɗa ee bitih : nimilaˈ yeekohi túmë faam ra, Koope habaˈte ɗi fi baa ɓëyí júɓpé, ndaa habaay ri fariseŋa. Yúhí biti ɓëyí ɓéyíɗ afi ɓéeɓ ay cépírú, te ɓëyí cépíɗ afi ɓéeɓ ay ɓéyrú. »
Yéesú a tuŋka
(Saame Maccëe 19.13-15 ; Marka 10.13-16)
15 Filoon fi baaha, lahte ɓëewí homu komi Yéesú i kúkëy, fahuu biti ɗi tík yaˈ yi sun fi wa, barkel wa. Oluu taalibe ya yii baa ra, wa na wonu affi wa. 16 Ndaa Yéesú dëekrëhté tuŋka, won tih : « Yéɗɗí tuŋka ac soo na, ngënë këddíi wë ! Yúhí biti Nguur ki Koope saamɗu mani wa. 17 Mee ron won kaaf ka ra ee : ɓëyí habaay Koope buur ti ɗee habaˈ kúkëy Koope ra nen, ii hëelíɗ Nguur ki. »
Ɓëewë caaku alal ra a Nguur ki Koope
(Saame Maccëe 19.16-30 ; Marka 10.17-31)
18 Ow di kélfë yí yëwúɗɗë meelte Yéesú won tih : « Yëeddëhí baahi beh, mi waɗti paga yi níi mi lah pesa na ɗúméh rë ? » 19 Yéesú won ɗi tih : « Fu dëekëˈ sëˈ baah a ? Yi daa baah ? Henay Koope, lahay ɓëyí baahte. 20 Yen nimil yee meelaˈ fu koon ra ; fu yúh iña túuƴëˈ Koope ra maan ? “Ngënë mësíi njaaliyoh ; ngënë mësíi bëem ow ; ngënë mësíi loh ; ngënë mësíi feliɗ ow ; lah tëeppítíi baappon a yaayyon.”✡ 18.20 Saame Kolohi koyyi Israyel Ésíp 20.12-16 » 21 Ɓëeˈ won ɗi tih : « Ɓahaa, yii waɗ soˈ iñƴaa ɓéeɓ mi ñee na kúkëy kí sëˈ níi a ɗeh. » 22 Kelaˈ Yéesú unni ƴaa ra, ɗi won ɓëeˈ tih : « Fu tallaˈ yin yínë : paye fu yaay iña lahaˈ fu ra ɓéeɓ, fu woraˈ cadum fa ñëkíɗɗë. Hen ɗaaha raa, fay lah alal sun-Koo. Fu woc raa, fu ac fu ñee tal soˈ. » 23 Kelaˈ ɓëeˈ unni ƴah, bi caak ri alal níi caak, yaa misikke ri keeñi níi misik.
24 Olaˈ Yéesú biti yaa misikke ɓëeˈ rë, ɗi won tih : « Haal Nguur ki Koope kofeelte yíkëe yí alalla na ! 25 Géléem haal gúl kúuc daa lukki yooɓ biti yíkëe alal haal Nguur ki Koope. » 26 Ɓëewë në húmú síkírúu rí rë wonu tih : « Kon daa míntí múc ? » 27 Yéesú won tih : « Yii wooñ ow wooñeh Koope. »
28 Peer won tígí daaha tih : « Ɓahaa ole ! Fun helute iña húmú lahuu fun ra ɓéeɓ, fun ñeyute talu. » 29 Yéesú won wa tih : « Mee ron won kaaf ka ra ee : ɓëyí af Nguur ki Koope tah ri hel faami, ɓeleɓi, koy-yaayyi, boffi, yaafi mbée koyyi, 30 ɗi ay lah ƴi luk ƴaa caak fap di jamanee woteh beh, te fayu ɗi ay lah pesa na ɗúméh rë. »
Waali éeyë fë wonaˈ Yéesú biti ɗi ay húl, ɗi koloh ɓúudé rë
(Saame Maccëe 20.17-19 ; Marka 10.32-34)
31 Filoon fi baaha, Yéesú hécëhté ƴutuuɗ a taalibe yi sabboo a ana ya, won wa tih : « Síkíríi ! Yen ee suu Yerusalem ra ee, te iña bíníyú yonente ya sun fi soˈ mi Koy-ɓëeˈ rë ɓéeɓ ay lah. 32 May tíkú yaˈ yi ɓëewë yëwúɗ neh ra, te wa fi ƴaa ay soo ñaawal, solsaˈ soˈ, tuulsaˈ soˈ, 33 laɓisaˈ soˈ laraw, an soo hap húl. Te waali éeyë fë filoon fi húlí sëˈ, may koloh ɓúudé. » 34 Ndaa taalibe ya húmú yíih yee fahaˈ ri waa won ra ; wona kúnté affi wa.
Paƴi búumndë
(Saame Maccëe 20.29-34 ; Marka 10.46-52)
35 Na leɓoh Yéesú Yéríkëe rë, ɗeef lahte búumndí húmú took ɓúk waala na saraatoh. 36 Kelaˈ ri dúukëlí ɓëewë në gétú rë, ɗi meelaˈte yee lah ra. 37 Ɓëewë wonute ri biti Yéesú fi ɓëy Nasaret daa na ñee daaha. 38 Ɗi foŋke tígí daaha won tih : « Yéesú, sédí Dawit, yérém sëˈ ! » 39 Ɓëewë këllúu rë na wonu afa, fahuu biti ɗí héddëh, ndaa ri lukki foŋ na, na won tih : « Sédí Dawit, yérém sëˈ ! » 40 Tígí daaha, Yéesú caŋke, kallirohte ri. Ayaˈ ri ra, Yéesú meelte ri won tih : 41 « Fu fahaˈ biti mi pagira ro yih ? » Ɗi won tih : « Yíkëe, page níi íllí sëˈ wërsëh, mi mín ot ! » 42 Yéesú won ɗi tih : « Yeele, ngémú tahte fu wahte. » 43 Íllë yíppée wërsëh, ɗi na ot. Ɗi ñeete tal Yéesú na kañ Koope. Oluu ɓëewë yee lah ra, wa ɓéeɓ na kañu Koope.