19
Haali Yéesú faam Sase
1 Yéesú haalte Yéríkëe na húus gina. 2 Daaha, húmú lahte ɓëyí hínú Sase ; daa ri kélfíi yeekoh yi túmë, ɗi húmú yíkëe alal. 3 Ɗi húmú fahaˈ oli Yéesú, ndaa bi lúh rí, ɗi mínéh ríi ot af caagi ɓëewë. 4 Ɗi yíppée múkë, këllëhté, lappe tal kilik, fahaˈi oli Yéesú fë ay ñeye daaha ra. 5 Lahaˈ Yéesú tígí daaha ra, ɗi ɓéyíɗté afi won Sase tih : « Yípée cép Sase ; mi waɗti hanlire ro woteh. » 6 Sase yíppée cép, kúɗté rí faami, hampe ri haneel a sos-keeñ. 7 Ɓëewë maasuu ra ɓéeɓ, yaa neɓaay wa, tahte wa na wonu tih : « Ɓëyée ay hanlire bakaaroh a ? » 8 Sase kolohte, won Yéesú tih : « Síkírée noo Yíkëe, may on ñëkíɗɗë hatni yíníi alal mi soˈ ɓéeɓ, te ɓëyí mi liiltee rii nofaˈ mi ɓeɓpe hélsí ɓéeɓ, may rii nimiliɗ teemi wa iniil. » 9 Yéesú won ɗi tih : « Ɓëy faam fi bee múcúté woteh. Íi, ɓëyí bee ɓal non séttí Abraham. 10 Yúhí biti soˈ mi Koy-ɓëeˈ, mi ac saami ɓëeˈ múuƴ ɗë, mi sëmlëˈ rí. »
Anili kélfëe déŋéen súrgë yí hélíis rë
(Saame Maccëe 25.14-30)
11 Ɓëewë homute na síkírúu rí. Bi leɓuu wa Yerusalem, te ɓëewë habuu biti Nguur ki Koope leŋ cép, ɗi ñeyaˈte wa anili beh na léeh wë 12 won tih : « Húmú lahte ɓëyí non tal kélfë, ɗi hom koloh saañi gini wulte nda ri lah dín fë falu buuri gin wa raa, ɗi nimil. 13 Balaa ri saañ, ɗi dëekrëhté ow sabboo di súrgë yí, yeɗte ow di waa na ɓéeɓ hanjar úrís yínë, antee waa won tih : “Ɓéyí hélsí ƴeh, ɗon légéyëˈ wë níi bín nimilaa mi ra.”
14 « Ɓëyí bah, ɓëy gin wa húmú fahuuy ri, daa tah sayaˈ ri ra, wa yejute i ow filooni nda ɓëewí ƴaa lah raa, won biti wa fahuuy ɓëyí baa buur. 15 Kaaˈeeh ɓëeˈ falute buur, nimilte gin wa. Ayaˈ ri ra, ɗi dëekrëhté súrgë yë ɗi húmú déŋéen wë úrísë rë, yúhí iña tíkëh sun ra. 16 Ɓëeˈ ɗéɓpí ac ɗa won tih : “Ɓahaa, mi lahte hanjar úrís sabboo sun fi bee déŋéen fú sëˈ rë.” 17 Buura won ɗi tih : “Eera ! Fu súrgíi wunte ! Hém daa fu ñee woni soˈ, fu paŋke yii ƴutuudi baa raa, mi yeɗte ro fu kúɗ gin sabboo.” 18 Súrgíi ana fa acce, won tih : “Ɓahaa, mi lahte hanjar úrís iip sun fi bee déŋéen fú sëˈ rë.” 19 Buura won ɗi fi baaha tih : “Ɗo ɓal, mi yeɗte ro fu kúɗ gin iip.” 20 Súrgë kay acce won tih : “Ɓahaa, úrsë déŋéen fú sëˈ rë abeh ; mi húmú jok ri líil, mi ɗappe ri. 21 Súhë súh fú keeñ ra daa tah mi kaañay ro. Fu ɓeyaˈ yii fu yefay ri, te fu lecaˈ yii fu sohay ri.” 22 Buura won ɗi tih : “Fu súrgíi ɓosse ! May roo aattiyee unna won fu ra. Fu won neh mi ɓëyí súhté keeñ, mi ɓeyaˈ yii mi yefay ri, te mi lecaˈ yii mi sohay ri a ? 23 Kon haalaˈ yi níi fu wëtɗëey hélsí sëˈ ? Tin bee nimilaˈ mi bee ra mi laheh na yii tíkëh sun a ?”
24 « Ɗi antee won súrgë yë húmú daaha ra tih : “Nëefí bee ɗii na, ɗon yeɗ ɗi ɓëeˈ lahaˈ sabboo ra.” 25 Wa wonu ri tih : “Ɓahaa, ɓëyí baa liiltee lah úrís sabboo níi wocce !” 26 Ɗi won wa tih : “Mee ron won ɗa ee bitih : ɓëyí ham yee yeru ri ra a yaˈ ana ay ɓaatu. Ɓëyí pagay yii baaha nék, yii ƴutuuda lahaˈ ri ra sah ay naafu. 27 Di yii leŋke kaaˈoh yee ke soˈ fahuuy biti mi hen buuri wa ra, këlí wë deh, ɗon hap wa húl fíi sëˈ.” »
Haali Yéesú Yerusalem
(Saame Maccëe 21.1-11 ; Marka 11.1-11 ; Saŋ 12.12-19)
28 Wonaˈ Yéesú níi wocce ra, ɗi këllëhté ɓëewë, wa ñéerúuté, ɗi na saañ Yerusalem. 29 Tílëˈ rí níi leɓohte Betfase a Betani, hëbís daŋi Ëlíiffë rë, ɗi wolte ow ana di taalibe yi 30 won wa tih : « Pëyí gina fíi bín. Ɗon haale na raa, ɗon ay naa ɗeef cúmbúr mbaam poku, bi ow yëegírëy rí. Lah pëkísí rí, ɗon kom soˈ ri deh. 31 Ow meel ɗon yee tah ɗon na pëkísú rí rëe, lah wëní rí biti Yíkëe daa sohlaˈ ri. »
32 Taalibe ya koluu daaha suute. Lahuu wa ra, wa ɗeefu iña ti ɗee wonaˈ wa Yéesú rë nen. 33 Wa homu pëkísí cúmbúrë, yíkëe yë wonu wa tih : « Yi tah ɗon na pëkísú cúmbúrë ? » 34 Wa wonu tih : « Yíkëe daa sohlaˈ ri. »
35 Wa anutee kom Yéesú cúmbúrë, larute sabidoorri wa sun, habruute Yéesú yaagohte. 36 Ɗi na saañ, ɓëewë ɓeyute sabidoorri wa larute waala.
37 Leɓaˈ ri Yerusalem, na cép daŋi Ëlíiffë rë, keeññi mboolo mi taalibe ya ɓéeɓ sosse níi sos, wa ɓéyrúté unni wa sun na njooɓu Koope di kimtaanna olu wa ra ɓéeɓ 38 na wonu tih : « Koo-Yíkëe barkela buura ɗi wol ri ra ! Jaamma laha sun, Koo laha ndam di sunaa-sun ! »✡19.38 Saame Kañaa ya 118.26 39 Lahte fariseŋŋi húmú ɓëewë në, na wonu Yéesú tih : « Ɓahaa, wone taalibe yu héddëh ! » 40 Yéesú won wa tih : « Mee ron won ɗa biti wa héddëh rëe, laˈ ya ay waa tah ! »
Yee nay kate Yerusalem ra
41 Ɓaataˈ Yéesú leɓoh Yerusalem níi rí otte ri ra, ɗi na looy af yee nay kate gina a ɓëewë filiɓ ra, 42 na won tih : « Ɗon fi ɓëy Yerusalem, ɗon yúh yee nay ron one jaamma bisee woteh bee ra koon ! Ndaa mas, ɗon míníh ríi ot. 43 Ay lah jamanii yéŋké biti kaaˈoh yon ay ron geel, hac jul míirë, ƴégítëh rí, an ɗon yejoh haaˈ. 44 Wa ay hap ɓëewë ɓéeɓ húl, ɗakaƴaˈ gina níi laˈ ii tíkëh sun laˈ. Ƴaa ɓéeɓ biti ɗon yúhsúuy wahtaa ac Koope sëmlëˈën rë. »
Yëeddëˈí Yéesú filiɓ Faam fi gaani Koope
(Saame Maccëe 21.12-17 ; Marka 11.15-19 ; Saŋ 2.13-22)
45 Lahaˈ Yéesú gina níi ɗi haalte baylii Faam fi gaani Koope ra, ɗi yampe na lík yaayoh ya homu na ra, 46 na won wa tih : « Koo wonay Téerëe bitih : “Faam soˈ ac faam ɗagaa”✡19.46 Saame Isayii 56.7 a ? Ndaa ɗon yíssúté rí “faam lohoh”✡19.46 Saame Yérémí 7.11 ! »
47 Yéesú homaˈ Faam fi gaana faraah yëeddée. Kélfë yí seeƴoh ya, yëeddëh yí kootii Mëyíis a ɓaha ya gina na saamu hawi húl, 48 ndaa wa húmú yíih ɗee nay wa rii pagee ra, af biti ɓëy gina ɓéeɓ húmú síkírúu rí nuffi wa.