20
Tígë ɗúhëˈ sañ-sañi Yéesú rë
(Saame Maccëe 21.23-27 ; Marka 11.27-33)
1 Lahte bis, ɗeef Yéesú na yëeddëˈ filiɓ Faam fi gaani Koope, na waare Uni Neba, kélfë yí seeƴoh ya, yëeddëh yí kootii Mëyíis a ɓaha ya ɗeefute ri daaha, 2 wonu ri tih : « Won fun sañ-saña na pagaˈ fu iña na paŋ fu ra. Daa nah ro paŋi wa ? » 3 Ɗi won wa tih : « Soˈ ɓal may ron meel yin yínë. Wëní sëˈ : 4 bëtsë në húmú bëtís Saŋ ɓëewë rë, Koope daa húmú nah ri mbée ɓëewë ? » 5 Tígí daaha, wa na wonantuu hanndal ki wa tih : « Yen won biti Koope daa nah ri raa, ɗi ay yen meel yee tah níi yen gémúy iña won Saŋ ɗa. 6 Te yen won biti ɓëewë daa nahu ri raa, ɓëewë ay yen tap laˈ níi yen húl, ndée wa ɓéeɓ gémúté biti Saŋ yonente. » 7 Wa wonu Yéesú tígí daaha tih : « Fun yíih ɓëeˈ nah ri bëtís rë. » 8 Ɗi nampee waa won tih : « Kon soˈ ɓal, mii ron won ɓëeˈ yeɗ soˈ sañ-saña na pagaˈ mi wa ra. »
Anili línëh yí reseñña sohooru ra
(Saame Maccëe 21.33-46 ; Marka 12.1-12)
9 Filoon fi baaha, Yéesú ñeyaˈte ɓëewë anil na léeh wë won tih : « Lahaˈ ɓëyí húmú yíp meey reseñ, yeraˈte ri ndalu, antee saañ ɓaaɓi ɗi ay naa maañ. 10 Nonaˈ reseña ra, ɗi wolte súrgë línëh yë në, nda wa yeɗ ɗi wodi. Ndaa lahaˈ ri ra, línëh yë habute ri, laɓute ri laɓɓi misikke, anutee rii yeris ɗi nimilaˈte yaˈ holoŋ. 11 Yíkíi meeya wolaatte súrgë kay. Lahaˈ ri ra, wa laɓute ri laɓɓi misikke, solute ri solli misikke, anutee rii yeris nimilaˈte yaˈ holoŋ. 12 Ɗi wolaatte súrgë kay. Lahaˈ ɗi fi baa ra ɓal, wa gaañute ri gaaññi misikke anutee rii ɗúhíɗ meeya.
13 « Yíkíi meeya won tígí daaha tih : “May page yih ? Mi ot na ! May wole koy kee ke soˈ fahaˈ mi níi fahaˈ ra ; mín hen wa yeɗ ɗi cér.” 14 Ndaa séenúu línëh yë koy ka, wa wonu hanndal ki wa tih : “Lamoha abee kan ! Ëyí yen hap ɗi húl, meeya hen bi yen.” 15 Lahaˈ ri ra, wa yípútée ríi ham, ɗúhrúté rí meeya, hawute ri húl. »
Tígí daaha, Yéesú won ɓëewë tih : « Yíkíi meeya ay page línëh yí ƴaa yih ? 16 Ɗi ay aye ayo, hap wa ɓéeɓ húl, anti saam i línëh kay, yeɗ wa meeya. » Keluu ɓëewë unni ƴaa ra, wa wonu tih : « Yii baa ɗamaayti lah ! »
17 Yéesú yeelte wa níi antee won tih : « Bíníyúté Téerëe bitih :
“Laˈa habuu taɓahoh ya
biti lahay njiriñ ra
daa míllëˈ ham lasa.”✡ 20.17 Saame Kañaa ya 118.22
« Unee ke Téerëe baa fahaˈ won yih ? » 18 Yéesú ɓaatte won tih : « Ɓëyí baɓoh laˈi baa ɓéeɓ ay korsaˈ, te laˈa keen sun ow ay rii ɗakaƴaˈ. »
Túmí buur
(Saame Maccëe 22.15-22 ; Marka 12.13-17)
19 Yúhúu yëeddëh yí kootii Mëyíis a kélfë yí seeƴoh ya biti Yéesú yuliɗ anili baa sun fi wa ra, wa na saamu ɗee nay wa rii habee wahtii baaha ra, ndaa wa kaañuy ɓëewë. 20 Tígí daaha, wa koluute olsohi Yéesú, yejute i ow tala. Ɓëewë në ɓënɓënɗúu, ayuute ti ɓëewí júɓúté nen, na fahuu fíirí Yéesú di won. Wa húmú saamu yii ay mín tah gëernëer keen sun fi Yéesú. 21 Wa wonu ri tih : « Ɓahaa, fun yúhúté biti fu wonaˈ kaah : fu yëeddëˈ yee nahaˈ Koope ra kah-kah. Fu na yeeleeh ow jëmmíi. 22 Kon won fun nda kootii yen onaˈte biti Sesaar* 20.22 Sesaar :Bín fë, ɓëyí húmú hen buur di Rom ɓéeɓ dëekúu ɗaaha. yeru túm mbée onaay. » 23 Ndaa bi yúh Yéesú yee nuffi wa, ɗi won wa tih : 24 « Téeɓí sëˈ hélíis hanjar noo. » Yeruu ri hanjara, ɗi meelte wa won tih : « Netli wa a tii wa daa na ? » Wa wonu ri tih : « Ƴi Sesaar. » 25 Yéesú won wa tígí daaha tih : « Kon yérí Sesaar yee lahaˈ ri ra, ɗon yeɗ Koope yee lahaˈ ri ra ! » 26 Wa míníh ríi ham di iña won ɗi fíi ɓëewë rë. Yee won ɗi ra kay éemíl wë éemílë níi tahte wa lahluy yii wonun wa.
Yii leŋke koloh ɓúudé
(Saame Maccëe 22.23-33 ; Marka 12.18-27)
27 Filoon fi baaha, i saduseŋ, wa fa wonu biti koloh ɓúudé lahay ra, ayute Yéesú në, 28 wonu ri tih : « Ɓahaa, Mëyíis húmú túuƴcé yen bitih, ɓëyí húl hel ɓeleɓ te ɗeef ɓani ɓelaa liiluyti lah koy, ñéedë waɗtee lam ɓelaa, saamiɗ ɓahii tal. 29 Te kíilë, húmú lahte koy-yaay paana : bee ɓaha waa na ra kooɗte, ɓani ɓelaa liiluyti lah koy, ɗi húlté. 30 Bee ñee na ra kooɗte ɓelaa, yee kat ɓahaa ra katte ri. 31 Ɓëyí éeyë fë ñeyilte kotta húlté. Na hen ɗaaha níi wa fi paana ya ɓéeɓ ñeyute kooda, húlúté te ow lahay na koy. 32 Filoon fe, ɗi fi ɓelaa tahte ɓal húlté. 33 Kon leegi, yiin nay kolee ɓëewë ɓúudé rë, daa nay lahee ɓelaa waa na te wa ɓéeɓ koorute ri ? »
34 Yéesú won wa tih : « Ɓëewë feey fi bee na koorantuu ; 35 ndaa ɓëewë yéŋké biti Koope otte biti wa warutee koloh ɓúudé, wa haal pesa na ac ra, bín fë rëe, wa ii koorantaˈ. 36 Wa ii míníl húl, wa ay madee a malaaka ya. Wa ay hene koyyi Koope, bi nay ri waa këllé ɓúudé. 37 Biti ɓëewë húlú rë ay këllú ɓúudé, Mëyíis teeɓaˈte na yii lante filiɓ Téerëe na won ɗi Koo-Yíkëe filiɓ dúufë na njaaroh ra biti daa ri “Koope fi Abraham, Koope fi Isaak, Koope fi Yakop” ra. »✡ 20.37 Saame Kolohi koyyi Israyel Ésíp 3.6 38 Yéesú ɓaatte won tih : « Kon Koope, ɗi Koope fi ɓëewë húlú rë neh, ɗi Koope fi ɓëewë na pesu ra ; ndée di ɗii na, wa fi éeyë yí ƴaa ɓéeɓ lísúu pes. »
39 I ow di yëeddëh yí kootii Mëyíis ɓeyute una tígí daaha wonu ri tih : « Ɓahaa, wonu ñeete waal. » 40 Ow kaañlay rii meelil yin kay.
Buura Koo fal ri ra yi Dawit na ?
(Saame Maccëe 22.41-46 ; 23.1-36 ; Marka 12.35-40)
41 Yéesú ɓaatte won ɓëewë tih : « Ow mínëˈ won biti Buura Koo fal ri ra sédí Dawit ɗíh ? 42 Ɗi fi Dawit won filiɓ téerëe lahaˈ ƴeekaa yi kañaa ya ra tih : “Koo-Yíkëe won Yíkíi sëˈ tih : Tooke hëbís sëˈ, yaˈi ñamaa fi soˈ deh, 43 níi bín nëy míi yíssée kaaˈoh yu hen tíkëe yí kottu ra.”✡ 20.43 Saame Kañaa ya 110.1 44 Ɗi fi Dawit dëekëˈ rí Yíkëe rëe, kon Buura Koo fal ri ra mínëˈ hen sédí ɗíh ? »
45 Bi na síkírúu rí ɓëewë ɓéeɓ, Yéesú won taalibe yi tih : 46 « Lah mëytíi yëeddëh yí kootii Mëyíis, wa fa tílëesúu a búuɓ gaan, te wa fahuu biti wa woduun a yaˈ ana këemmë rë. Wa tookuu ñaanna këllëh di ílíƴƴë na ɗaguu yëwúɗɗë Koope ra, te daa wa na ɗéɓúu ñam biti ndaje lah. 47 Daa wa lukuu maañ ɗaŋ ndah teeɓaˈi affi wa, te añcaŋ, daa wa na ɓeyu alalli ɓeleɓɓa ƴaalli wa húlú rë. Daani wa nay lukee misik. »