4
Saami Seytaane fíirí Yéesú
(Saame Marka 1.12-13 ; Lúkkë 4.1-13)
1 Filoon fi baaha, Ruuh-Peseŋ yeñce Yéesú luufa, nda Seytaane saam fíirí. 2 Ɗi hompe dín fë, túmëy yin loyi níi hente waal sabay iniil (40), ñamay naꞌ ñamay elek ; yaabi misikke míllëꞌté ríi ham. 3 Tígí daaha, Seytaane acce won ɗi tih : « Hena biti fu Koy Koope kaah raa, túuƴé laꞌ yí ƴee yíssëh ñam. » 4 Yéesú won ri tih : « Bíníyúté Téerëe bitih : “Ow pesaꞌ ñam neh kut. Yii na won Koope ɓéeɓ ow mín ɗíi pesaꞌ.”✡4.4 Saame Nérsí Kootaa 8.3 »
5 Tígí daaha, Seytaane kúɗté rí Yerusalem gini selaa, cëgíɗté rí jibi Faam fi gaani Koope, 6 antee rii won tih : « Hena biti fu Koy Koope kaah raa, yeɗɗee feey. Bíníyúy Téerëe biti Koope ay nah malaaka yi níirú, wa meeɓ ro teŋel, toñeh fay kabinee laꞌ✡4.6 Saame Kañaa ya 91.11-12 woo ? » 7 Yéesú won ɗi tih : « Bíníyúté Téerëe biti ɓal : “Koo-Yíkëe daa Koope fu, ngana saam olsohi.”✡4.7 Saame Nérsí Kootaa 6.16 »
8 Seytaane ɓeyilte Yéesú kúɗté rí daŋi utte níi ut, teeɓpe ri ginna ëldúnë ɓéeɓ a ɗee wunaꞌ wa ra, 9 antee rii won tih : « Fu ƴek fíi sëꞌ fu jaamiyoh soꞌ raa, mi yeɗ ɗo wa ɓéeɓ. » 10 Yéesú won ɗi tígí daaha tih : « Gété dín Seytaane ! Bíníyúté Téerëe bitih : “Fay ƴekre Koo-Yíkëe daa Koope fu ra te fay jaamiyee ri kut.”✡4.10 Saame Nérsí Kootaa 6.13 »
11 Seytaane kolaꞌ daaha saañce. Malaaka ya yípútée ac na tooppituu Yéesú.
Nimili Yéesú Galile
(Saame Marka 1.14-15 ; Lúkkë 4.14-15)
12 Hompe níi Yéesú kelohte biti Saŋ ɓekute kasu. Ɗi kolaꞌ daaha saañce Galile. 13 Lahaꞌ ri ra, ɗi homay Nasaret, ɗi saañ Kafarnawum gina hom ɓúk laahi Galile ra di deyi Sabuloŋ a Neftali. 14 Yii baa lahaꞌte ɗah ti ɗee húmú wonaꞌ yonente Isayii ra nen bitih :
15 « Deyi Sabuloŋ a Neftali homu ɓúk laaha ra,
deya hom hatni yíníi Yurdeŋ ra,
Galile fa dékú ɓëewë yëwúɗ neh ra !
16 Ɓëewë húmú pesuu ñúusë rë
olute niiñi hente saw.
Ɓëewë húmú pesuu tígí ñúusë hom kúl kë rë,
lahte niiñi púlté waa na ! »✡4.16 Saame Isayii 8.23 níi 9.1
17 Kolaꞌte baaha, Yéesú dalte waarii ɓëewë na won tih : « Lëfí pesaɗ ! Nguur ki sun-Koo leɓohte. »
Taalibe ya ɗéɓpí dëek Yéesú rë
(Saame Marka 1.16-20 ; Lúkkë 5.1-11)
18 Lahte bis, Yéesú hom tílëesëh ɓúk laahi Galile, ɗi otte ow ana : Simoŋ fa na wonuu Peer ra a Anndere koy-yaafi na bacu mbaali wa laaha. Wa húmú i seeɓoh. 19 Ɗi dëekké wë won wa tih : « Ñéyí tal soꞌ mi yëedíɗ ɗon, ɗon hen seeɓoh ow. » 20 Wa yípútée hel mbaalli wa, ñeyute tala.
21 Tílëꞌ Yéesú níi lahte fíi rë, ɗi otte koy-yaay ana kay : Saak a Saŋ koyyi Sebede, ɓani boffi wa homute filiɓ gaali wa, na yugusu mbaalli wa. Ɗi dëekké wë, 22 wa yípútée hel gaala daaha a boffi wa, ñeyute tala.
23 Yéesú ñeete Galile ɓéeɓ, na yëeddëꞌ filiɓ ílíƴƴë na ɗaguu yëwúɗɗë Koope ra, na waare Uni Nebi Nguur ki sun-Koo, na paƴ heet jér a heet misik ɓéeɓ. 24 Tiyi hente lëyëŋ filiɓ Sírí ɓéeɓ. Ɗi komute jéríɗɗë ɓéeɓ, ƴi maduy jér : ƴee lahuu yébítëh, ƴee lahuu jérí kéenɗëꞌ wë kéenɗëe, ƴee i lëfëñíɗ. Ɗi paƴce wa ɓéeɓ. 25 Ow caak ñeyuu tal Yéesú : ƴee koluu Galile, ƴee gina na wonuu Gin-taah-sabboo ra, ƴee Yerusalem a ginni kayya Yúdée ɓéeɓ, ƴee ginna énfí laahi Yurdeŋ.