9
Paƴi lëfëñídë
(Saame Marka 2.1-12 ; Lúkkë 5.17-26)
1 Yéesú kolaꞌ daaha haalte gaal, húusëetté laaha nimilte gin wa. 2 Homaꞌ ri daaha ra, i ow komute ri lëfëñíɗ sun dil. Olaꞌ ri ɗee gémúu wë rí rë, ɗi won lëfëñídë tih : « Habe híin ƴaal kowa, fu baalute bakaaɗɗu. » 3 Lahte i ow di yëeddëh yí kootii Mëyíis, ƴi húmú daaha, na wonu nuffi wa tih : « Ɓëyí bee solte Koope. » 4 Bi yúh Yéesú yee hom nuffi wa ra, ɗi won wa tih : « Yi tah ɗon na lahu níɓ ɓos ? 5 Yi daa lukki yooɓ biti mi won ɓëyí beh : fu baalute bakaaɗɗu, mbée kolee fu tíl ? 6 Woteh ɗon ay yúh biti soꞌ mi Koy-ɓëeꞌ mi lahte sañ-sañi baalaa mi bakaaɗ feey fi beh ! » Ɗi won lëfëñídë tígí daaha tih : « Kolee fu pon dilu, fu saañ faam. » 7 Lëfëñídë kolohte, saañce faam. 8 Oluu ɓëewë yii baa ra, wa tíitú tíitë níi na kañu Koope, ona on ɗi ɓëewë sañ-sañi man ɗaa gaan ra.
Dëegí Yéesú Maccëe
(Saame Marka 2.13-17 ; Lúkkë 5.27-32)
9 Kolaꞌ Yéesú daaha na saañ ra, ɗi otte yeekoh túm húmú took tígë në légéyëꞌ rí rë ; ɗi hínú Maccëe. Yéesú won ɗi tih : « Kolee fu ñee tal soꞌ. » Maccëe yíppée koloh wa ñéerúuté.
10 Filoon fi baaha, Yéesú hom ñam faam Maccëe, i yeekoh túm a i bakaaroh kay ƴi caakute ayute, wani Yéesú a taalibe yi bokute na ñamu. 11 Oluu fariseŋŋa yii baaha ra, wa wonu taalibe yi Yéesú tih : « Yi tah yëeddëhën na bok ñam a yeekoh yi túmë a bakaaroh ya ? » 12 Kelaꞌ Yéesú yee wonu wa baa ra, ɗi won tih : « Jéríɗɗë daa sohluu paƴoh ndaa ɓëewë wahu ra neh. 13 Tílí ron saame yee fahaꞌ won unnee Koope ƴee ra : “Ɓëewë naaꞌ-keeñ ɓëewí kayya na, daa génël sëꞌ biti wa hawre soꞌ sarah kep.”✡9.13 Saame Oose 6.6 Kon bakaaroh ya daa tahu mi koloh, ndaa ɓëewë júɓú rë neh. »
Yéesú a oora
(Saame Marka 2.18-22 ; Lúkkë 5.33-39)
14 Tígí daaha taalibe yi Saŋ ayute Yéesú në wonu ri tih : « Funi fariseŋŋa na ooru, kon yi tah taalibe yu na ëeríh ? » 15 Ɗi won wa tih : « Bee kílëek lahte ra, ɗon habuu biti kooƴƴa warutee súfúñ te ɗeefa ɓëeꞌ kooɗ ɗa lís leelii wa a ? Ɗon halaatuy ri maan ? Funi taalibe yi soꞌ nék madu a ɓëeꞌ kooɗ baa ra hom a kooƴƴi ra nen. Bis ay lah, mi këllú leelii wa, tígí daaha wa ay oor.
16 « Ow na daafeeh búuɓ kíilíɗ a nuf píis has. Henun ɗaaha raa, nuf píisí hasa hécëh sun fi búubí kíildë rëe, ɗara ay lukee gaan na. 17 Te ow na soreh béeñí hasi anti dal poosaꞌ ɓal filiɓ mbúus hun*9.17 mbúus hun : Ɓëy gini baaha húmú túmúu han filiɓ mbúusí yugusuu hun. Hani túmú mbúus hun home poosaꞌ raa, mbúusë ɓaaysaꞌ ɓaaysoo. Ndaa mbúusë ɓaha raa, na mínlíléh ɓaaysoh. kíilíɗ. Henun ɗaaha raa, béeñë ay poo mbúusë, wa yúfëh, mbúusë yah. Béeñ has kay, hom soruu mbúus has. Henun ɗaaha raa, yin ii kat mbúusë te hana ii yúfëh. »
Yéesú luk jér a húl doole
(Saame Marka 5.21-43 ; Lúkkë 8.40-56)
18 Yéesú hom wona, lahte kélfíi yëwúdí acce yeɗɗohte kotti, won ɗi tih : « Ɓahaa, koy ki ɓelii soꞌ húlté koon, ndaa aye fu tík yaꞌu faana, ɗi ay koloh ! » 19 Yéesú kolohte, ɓani taalibe yi ñeyute tal ɓëeꞌ. 20-21 Ɗeef lahte ɓelii húmú në, hente kíil sabboo a kíil ana yi ɗi yúfëꞌ ñif. Ɗi húmú won nufi tih : « Na mi leɓa búubí rek, may wah ! » Ɗi acce ñeyaꞌte Yéesú filoon leɓpe nuf búubë. 22 Yíssëꞌ Yéesú otte ri ra, ɗi won ɗi tih : « Habe híin yaa ow ! Ngémú tahte fu wahte. » Wahtaa na wonaꞌ Yéesú ɗii na ra ɗi wahte. 23 Lahaꞌ Yéesú faam kélfíi yëwúdë, ɗi otte ɓëewë ƴee na fikilu†9.23 ƴee na fikilu : Di gerek, bíníyú ɗeh : ƴee na mbiipu. Yëwúɗɗë húmú lah luuy merees koon, wa waaƴe hacada raa, wa húmú fiisuu mbiip., ƴee na hawuu. 24 Ɗi won wa tih : « Këlíi tígë ! Kúkëyë húlëy, ɗi neeꞌ neeꞌo rek. » Ɓëewë yabute na ƴenu ri. 25 Ɗúhrúu ɓëewë ëssín rë, ɗi haalte lasa hampe yaꞌ kúkëyë, kúkëyë yíppée koloh. 26 Yaa hente lëyëŋ deyi baa ɓéeɓ.
Paƴi búumíɗɗí ana ya
27 Kolaꞌ Yéesú daa na saañ ɗa, búumíɗ ana ñeyute tala na fogu wonu tih : « Sédí Dawit, yérém fun ! » 28 Lahaꞌ ri faam níi búumíɗɗë leɓuute ri ra, ɗi won wa tih : « Ɗon gémúté biti mi mín paŋ yee nahu soꞌ ron ra a ? » Wa wonu ri tih : « Ahaŋkay ɓahaa, fun gémúté rí. » 29 Tígí daaha, ɗi leɓpe íllí wë, won wa tih : « Yee gémú ron ɗa hente. » 30 Íllí wë yíppée wërsëh, wa na olu. Yéesú digiɗte uni ɓaatte won wa tih : « Síkíríi sëꞌ ! Ow ɓanay yúh baaha. » 31 Kaaꞌeeh ɗúhúu wë rë, wa ñeyute deyi baa ɓéeɓ ɓíllúté yee paŋ Yéesú rë.
Paƴi ɓëyí lahaꞌ yébítëh fi kaddaꞌ ri won
32 Sayuu ɓëewí ana yi ƴaa ra, Yéesú komute ɓëyí lahaꞌ yébítëh fí kaddaꞌ ri won. 33 Ɗi líkké yébítëh fë, ɓëeꞌ dalaatte won. Ɓëewë ɓéeɓ éemúté, na wonu tih : « Moo ow ëllëy mani bee Israyel kan ! » 34 Ndaa wa fi fariseŋŋa wonu ɗi ñéerëꞌ a Seytaane buuri yébítëh yë, daa tah ɗi mín wëe lík.
Yérmí Yéesú mboolo ma
35 Yéesú ñeete ginna ɓéeɓ, na yëeddëꞌ filiɓ ílíƴƴë na ɗaguu yëwúɗɗë Koope ra, na waare Uni NebiNguur ki sun-Koo, na paƴ heet jér a heet misik ɓéeɓ. 36 Olaꞌ Yéesú dúukëlí ɓëewë na ayu ɗii na ra, keeña ɗúmpé waa na ces, ndah wa mokute te súfúñúté ti harri lahuy níirëh nen. 37 Tígí daaha, ɗi won taalibe yi tih : « Meeya laaɓpe te lecoh ya mítíh yin ; 38 kon ɗëgí yíkíi meeya ɓaat i lecoh, wa ac leja. »
✡9:13 9.13 Saame Oose 6.6
*9:17 9.17 mbúus hun : Ɓëy gini baaha húmú túmúu han filiɓ mbúusí yugusuu hun. Hani túmú mbúus hun home poosaꞌ raa, mbúusë ɓaaysaꞌ ɓaaysoo. Ndaa mbúusë ɓaha raa, na mínlíléh ɓaaysoh.
†9:23 9.23 ƴee na fikilu : Di gerek, bíníyú ɗeh : ƴee na mbiipu. Yëwúɗɗë húmú lah luuy merees koon, wa waaƴe hacada raa, wa húmú fiisuu mbiip.