1 Yéesú dëekké taalibe yi sabboo a ana yi, onte wa sañ-sañ líkëe yébítëh, paƴaa heet jér a heet misik ɓéeɓ. 2 Tii yi apootarri sabboo a ana yi ƴah, daa wa ƴeh⁠ ⁠: bee ɗéɓ ɗë, Simoŋ fa na wonuu Peer ra a Anndere koy-yaafi⁠ ⁠; Saak a Saŋ koyyi Sebede⁠ ⁠; 3 Fílíp a Bartalemi⁠ ⁠; Toomaa a Maccëe yeekohi túmë koon, Saak fi Alfe a Taddee⁠ ⁠; 4 Simoŋ fi jammbaara*10.4 jammbaara ⁠ ⁠: Mín hen ɓëyí far-farlohte kootii Mëyíis, mbée ɓëyí non ɓëewë na haaꞌuu nguur ki ɓëy Rom ra. a Yudaas Iskariyot fa míllëꞌtée yaay Yéesú rë.

5 Yéesú wol wa fi sabboo a ana yi ƴah, líkínté wë won wa tih⁠ ⁠: «⁠ ⁠Ngënë pëyí tígí lahay yëwúɗ. Ngënë pëyí ginni ɓëy Samari ɓal. 6 Yúlíi ɓëy Israyella na kay, wa fa madu harri múuƴú múuƴë nen ɗa. 7 Tígí ñee ron ɓéeɓ lah wëeríyí biti Nguur ki sun-Koo leɓohte, 8 ɗon paƴ jéríɗɗë a guuñiɗɗa, ɗon këlíɗ ɓëewë húlú rë, ɗon lík yébítëh yë. Ɗon meeluy waaf, kon ngënë méelíi waaf.

9 «⁠ ⁠Ɗon ƴahti saañ raa, ngënë kúrí pep hélíis yínë sah faannon. 10 Ngënë kúrëelíi nafa, búuɓ lofaa, ñafaɗ a duuɗ⁠ ⁠: ɓëewë ɗon na habruu wa ƴaa ra nay ron tooppitee. Ɓëyí légéy waɗtee yínlú opaꞌi. 11 Ɗon lah gin raa, lah sëemí ɓëyí tah hami ron haneel faami. Lah hëmí në níi bín koluun ron gini baaha ra. 12 Ɗon haal faam raa, lah ɗëgírí ɓëy faam fa jaamma. 13 Wa cal ri raa, jaammaa ɗagu ron ra ay ham. Wa caluy ri raa nék, jaammaa nimil ɗon na. 14 Te ɗon haal faam mbée gin, ɓëewë kaaꞌ hamon haneel, kaaꞌ síkírëhën rëe, lah ɗúhí daaha, ɗon paaŋ pënë mí kotton, teeɓi wa biti wa homuy kaah. 15 Mee ron won kaaf ka ra ee⁠ ⁠: yiin nay aattiyee Koope ɓëewë rë, daani ɓëy gini baaha ay luk bi ɓëy Sodom a bi ɓëy Gomoor misik.

16 «⁠ ⁠Síkíríi⁠ ⁠! Mee ron wol ra ee ti ndeŋŋi suu filiɓ i gúmú nen. Kon lah hëfí te ɗon sos ɓal. 17 Lah hélí nuf ɓëewë në⁠ ⁠: af soꞌ ay tah wa ay ron tëekíɗ këem filiɓ ílíƴƴë na ɗaguu yëwúɗɗë Koope ra, wa laɓ ɗon laraw. 18 Ɗon ay cëgírú fíi i gëernëer a fíi i buur, ɗon seede yee yúhú ron soo na ra fíi wë a fíi ɓëewí kayyi yëwúɗ neh caak. 19-20 Tíl níi ɗon kúrú këem rëe, ngënë sídíi⁠ ⁠: yee nay ron layee wahtii baaha teme ra, ii kolaꞌ ɗon na, ay kolee Ruuh-Peseŋ fa kolaꞌ Boffon na ra.

21 «⁠ ⁠Bín fë, ow ay yaay koy-yaafi hawroh ri húl, baap a koohi ɗaaha ɓal, tuŋka ay koloh sun fi baappi wa a yaayyi wa, hawroh wa húl. 22 Af soꞌ ay tah ɓëewë ɓéeɓ kaaꞌ ron, ndaa ɓëyí ham híin níi ɗúmëenë rëe, ay múc. 23 Ɗon lah gin ɗon moklu raa, hégíi ɗon saañ gin kay. Mee ron won kaaf ka ra ee⁠ ⁠: ɗon ii ɗúmël ginna Israyel ɓéeɓ, te soꞌ mi Koy-ɓëeꞌ mi nimileh. 24 Yoodoh lukeh yëeddëhí mín, te súrgë mínéh luk kélfíi gaan. 25 Yoodoh teemmaꞌ yëeddëhí mín ɗëe, baahte. Te súrgë teemmaꞌ kélfíi gaan ɗaa ɓal, baahte. Wa mín won soꞌ mi bee biti daa mi Belsebul buuri yébítëh yë rëe, wa lah ɗon fi ɓëy faam soꞌ na raa, wa ay ron wone yi⁠ ⁠?⁠ ⁠»

26 Yéesú ɓaatte won tih⁠ ⁠: «⁠ ⁠Di mín ríi man ɓéeɓ ngënë néehí ow. Yii laku ɓéeɓ ay olu, yii ɗapu ɓéeɓ ay yúhú. 27 Yii won mi ron las, lah ɗúhrí rí ëssín, yii mëddëꞌ mí ron, lah wëní rí këem. 28 Ngënë néehí ɓëewë na hawu ow húl rë, wa míníh yin coonaa fi ɓëeꞌ. Néehí Koope fa mín saŋku ow a coonaa fi ɓéeɓ safara ra kay. 29 Ndiit ana na yëeyíih fíttíŋ woo⁠ ⁠? Añcaŋ bi keen na ɓéeɓ ɗeef neɓaꞌ Boffon Koope neɓoo. 30 Ɗon nék, fen fi affon sah kídúté⁠ ⁠! 31 Kon ngënë sídíi yin, ɗon génú líir ndiit fap⁠ ⁠!

32 «⁠ ⁠Ɓëyí won fíi ɓëewë biti ri non ɓëewí sëꞌ, soꞌ ɓal may won fíi Baasoꞌ fa sunaa-sun biti ɓëyí baa non ɓëewí sëꞌ. 33 Ɓëyí won fíi ɓëewë biti ɗi yéeh sëꞌ nék, soꞌ ɓal may won fíi Baasoꞌ fa sunaa-sun biti mi yéeh ɓëyí bah.

34 «⁠ ⁠Ngënë hëbíi biti mi ac kúɗ jaamma feey fa. Ëe-ëeꞌ⁠ ⁠! Mi aay kúɗ jaamma, mi kúɗ haaꞌ. 35 Mi ac ɗaralsaꞌi koy ƴaal a boffi, koy ɓeleɓ a yaafi, ɓeleɓ a pacooli. 36 Ɓëy faammon nay hene kaaꞌoh yon.

37 «⁠ ⁠Ɓëyí lukki fahaꞌ boffi, yaafi mbée koohi níi wa génël rí sëꞌ, hen taalibeyi soꞌ jomute ɓëyí bah. 38 Ɓëyí enaay kurwahi ñee tal soꞌ, hen taalibeyi soꞌ jomute ɓëyí bah. 39 Ɓëyí núp húl, ay ñak ñíiní. Ɓëyí tah ñagi ñíiní af soꞌ nék, ay lah pesa na ɗúméh rë.

40 «⁠ ⁠Ɓëyí ham ɗon a yaꞌ ana, ɗeef ɗi ham soꞌ⁠ ⁠; te ɓëyí ham soꞌ, ɗeef ɗi ham ɓëeꞌ wol soꞌ ra. 41 Ɓëyí ham yonente a yaꞌ ana te habaa ri hena hen ɗi yonente ra, ɓëyí baa ay lahee waafi waɗ yonente. Ɓëyí ham ɓëyí júɓpé te habaa ri hena hen ɗi ɓëyí júɓpé rë, ɓëyí baa ay lahee waafi waɗ ɓëyí júɓpé. 42 Ɓëyí on ow di tuŋki ƴee muluɓ, wuti ƴaha muluɓ ƴutuuɗ raa sah, te onaa ri hena hen ɗi taalibeyi soꞌ ra, mee ron won kaaf ka ra ee biti ɓëyí baa ay liil waafi.⁠ ⁠»