15
Yéesú a ɓaahi caacca
(Saame Marka 7.1-23)
1 Jamanii baaha, i fariseŋ a i yëeddëh yí kootii Mëyíis koluu Yerusalem ayute wonu Yéesú tih : 2 « Yi tah taalibe yu në pëgíh yee ɓaahuu caacca ra ? Yi tah balaa wa ñam raa, wa na ɓëeñnjíih ɓooñnjohi ñeete waal ? » 3 Ɗi tahte won wa tih : « A ɗon, yi tah ɗon na tíkú túuƴëꞌ yí Koope dín, fahaꞌi hami ɓaah yon ? 4 Ɗon yúhúté biti neh Koope won tih : “Lah tëeppítíi baappon a yaayyon”✡15.4 Saame Kolohi koyyi Israyel Ésíp 20.12, te “ɓëyí won ɓos sun fi boffi mbée sun fi yaafi waɗti hawun húl”✡15.4 Saame Kolohi koyyi Israyel Ésíp 21.17 ë ? 5 Ndaa ɗon, ɗon yëeddúu biti yee waɗ ow ɓeɓ koon, tooppitaꞌ wa boffi mbée yaafi ra, ɗi won biti kut ɗi yeɗte wa Koope sarah raa, 6 ɓëyí baaha lahriray boffi mbée yaafi yin. Ɗaaha, ɗon nísúté iña túuƴëꞌ Koope ra, ɗon tíkúté ɓaah yon. 7 Wonnon teem ɓúkkën ! Yonente Isayii húmú wonaꞌ ron, te ri won kaah na bíní rí unee Koope bee ra :
8 “Kaña na kañu soꞌ ɓëewí ƴee ra teem ɓúkkí wë.
Yee hom keeññi wa ra haaƴaay a yee nahaꞌ mi ra.
9 Jaamiyoha na jaamiyuu wa soꞌ ra lahay njiriñ ;
iña na yëeddúu wë rë, ow doŋ daa sak wa.”✡15.9 Saame Isayii 29.13 »
10 Yéesú antee dëek ɓëewë ɓéeɓ won wa tih : « Síkíríi, te ɗon ɓek iñƴee affon ! 11 Iña na ñam ow ra neh daa na tah ɗi sobe ; yee na ɗúh ɓúgë rë kay, daa na tah ɗi sobe. »
12 Taalibe yi leɓuute ri filoon fe wonu ri tih : « Fu yúhté biti iña won fu ra neɓaay fariseŋŋa a ? » 13 Ɗi won wa tih : « Tal kilki Baasoꞌ fa sun yípëy rí, ay ɗofu. 14 Yéɗɗí wë : wa búumíɗɗí nooku i búumíɗ kay. Te búumíɗ nook búumíɗ rëe, wa ɓéeɓ ana ay keen ngas. »
15 Peer tahte won Yéesú tih : « Teeɓ fun yee na fahaꞌ fuu won sun fi yee na tah ow sobe ra. » 16 Ɗi won tih : « Ɗon fi ƴee nam, affon lahay daaha níi a ɗee ɓal a ? 17 Ɗon yíih biti iña na ñam ow ra ɓéeɓ haalaꞌ ɓúgë, saañ lowa, ɗúh faana a ? 18 Yii fús ɓúk ow nék, ɓëeꞌ ɗúhëꞌ rí nufi, te daa na tah ɗi sobe. 19 Nuf ow daa na komaꞌ iñi ɓossi ƴee ɓéeɓ : bëem ow, njaaliyoh a yii tappe njaaliyoh ɓéeɓ, loh, feliɗ ow a yah tii. 20 Iñƴaa daa na tah ow sobe, ndaa biti ow ñam te ri ɓooñnjeeh ɓooñnjohi ñeete waal, taheh ɗi sobe. »
Ngémí ɓelaa yëwúɗ neh ra
(Saame Marka 7.24-30)
21 Yéesú kolohte daaha, saañce deyi Tíir a Sidon. 22 Lahaꞌ ri ra, lahte ɓelii dék daaha, ɗi ɓëy Kanaan. Ɓelaa yíppée ac na téebílëh rí a foŋ won tih : « Yíkëe, sédí Dawit dímlëꞌ sëꞌ kan ! Koy soꞌ ɓeleɓ lahaꞌ yébítëh fi daa na mokil ri mokli misikke. » 23 Ndaa Yéesú tahay ɓúkí ɗii na. Taalibe ya leɓuute ri wonu ri tih : « Pëkísé ɓelii bee saañ ; ɗi na lek fun a foŋ. » 24 Yéesú tahte won tih : « Koope wol soꞌ ɓëy Israyel na kut, wa fa madu harri múuƴú múuƴë nen ra. » 25 Ɓelaa acce ƴekke fíyí won tih : « Yíkëe, dímlëꞌ sëꞌ kan ! » 26 Yéesú won ɗi tih : « Ɓosse biti ñami tuŋka yúfɗëe ɓuh*15.26 Yëwúɗɗë tíkú ɓëewë yëwúɗ neh ra ɓuh.. » 27 Ɓelaa loffe ri won tih : « Baa kaah ɓahaa, ndaa kaaꞌeeh ɓuh ñam ruuƴsiitta keenaꞌ yaꞌ yíkíi rë. » 28 Tígí daaha, Yéesú won ɗi tih : « Fu gaante ngém yaa ow ! Yee fahaꞌ fu ra lahte. » Wahtaa wonaꞌ ri unni ƴaa ra, kúkëyí ɓelaa wahte.
Ɓëewí caakka paƴ Yéesú rë
29 Yéesú kolohte deyi Tíir a Sidon daaha, nimilte ɓúk laahi Galile. Lahaꞌ ri ra, ɗi lappe sun daŋ tookke na. 30 Ɓëewí caakute ɗeefrute ri, ñéerúuté a ɓëewí ɓeeduu ɓeedoo, i búumíɗ, i lëfëñíɗ, i likiɗ a i ow kay caak ƴi jérú jérë. Wa komute Yéesú, ɗi paƴce wa. 31 Ɓëewë éemúté oluu wa likiɗɗa na wonu ra, lëfëñíɗɗë koluute na tílú, cérrí ɓëewë ɓeeduu ra mante ti merees nen, búumíɗɗë na yeelu, wa ɓéeɓ na kañu ndami Koope fi ɓëy Israyel.
Mbúurú yí paana ya a i koy jén
(Saame Marka 8.1-10)
32 Filoon fi baaha, Yéesú dëekké taalibe yi, won wa tih : « Mi yérémpé ɓëewí ƴeh ! Hente waal éeyë woteh wa ewu soo na, te wa lahluy yii ñamun wa. Mi mínéh wëe yeris wa sayaꞌ loo holoŋ, toñeh wa ay kohe waala biti wa ƴahti nimil ginni wa. » 33 Taalibe yi wonu ri tih : « Yii mín ñëmíɗ ɓëewí ƴee ɓéeɓ níi loo yi wa maƴ, yen ay waa ɗúhée dih luufi përéedí beh ? » 34 Yéesú meelte wa won tih : « Ɗon lahuu mbúurú ɗíh ? » Wa wonu ri tih : « Fun lahuu mbúurú paana a i jén ƴin-ƴin. »
35 Tígí daaha, ɗi wonte ɓëewë ɓéeɓ took feey. 36 Ɗi ɓeɓpe mbúurú yí paana ya a koy jénnë, símpé Koope, lecsaꞌte wa yeɗte taalibe yi, nahte wa woraꞌ wa ɓëewë. 37 Ɓëewë ɓéeɓ ñamute níi laalute. Négírúu wooñnjiida ra, wa líiffé dama paana. 38 Ɓëewë ñamu na ra henute ow ƴaal júnní iniil (4.000), bokaay ɓeleɓɓa a tuŋka.
39 Pëkísëꞌ Yéesú ɓëewë níi wa suute ra, ɗi haalte gaal, saañce deyi Magadan.