14
Húlí Saŋ Batis
(Saame Marka 6.14-29 ; Lúkkë 9.7-9)
1 Bín fë, bi hen tii Yéesú lëyëŋ gina, Erot gëernëerí Galile kelohte ban fi. 2 Ɗi won súrgë yí tígí daaha tih : « Ɓëeꞌ në keloh mi baa ra míntí hena Saŋ Batis ! Ɗi waɗti këllú këllë ɓúudé daa tah ɗi mín paŋ kimtaan. »
3 Bee daa yee húmú kat Saŋ Batis ra : Erot daa húmú habroh Saŋ, pokrohte ri, ɓekrohte ri kasu af Erojat, ɓeleɓ Fílíp koy-boffi ɗi fi Erot. 4 Yee tah ra, biti Saŋ húmú won ɗi bín fë tih : « Waal neh fu naafe ɓeleɓ koy-boffu ! » 5 Yii baa tahte Erot húmú fahaꞌ hawrohi húl, ndaa biti ɓëewë húmú habuu Saŋ yonente, tahte ri kaañay.
6 Nimilaꞌ bisa límú Erot kíilí baaha ra, ɗi cëgíɗté ndaje. Koy Erojat ɓeleɓ haalte na bec fíi haneella. Beja neɓaꞌte Erot 7 níi ri añohte biti yii meel ri kúkëyí ɓelaa ɓéeɓ, ɗi ay ri rii yeɗ. 8 Yaafa ɓekke ri nuf níi ɗi won Erot tih : « Tíké af Saŋ Batis sun waꞌ, fu yeɗ soꞌ ri. »
9-10 Keeñ buur ɗúmpé ces, ndaa bi añoh ri fíi haneella, tahte ri wolaꞌte lecrohi af Saŋ kasiin, komu kúkëyë. 11 Afa lecute tíkúté waꞌ, komute kúkëyí cafaƴ ka, kúkëyë kompe ri yaafi.
12 Filoon fi baaha, taalibe yi Saŋ ayute, ɓeyute ɓúudé fë hacute ri. Koluu wa hacada ra, wa suute Yéesú në, ɓíllúté rí yee lah ra.
Mbúurú yí iippa a jénní ana ya
(Saame Marka 6.30-44 ; Lúkkë 9.10-17 ; Saŋ 6.1-15)
13 Kelaꞌ Yéesú yee kat Saŋ ra, ɗi ɓeɓ gaal, na saañ saami tígí ɗaayte, wuloh ɓëewë. Namuu keloh dúukëlí ɓëewë biti Yéesú saañce ra, wa koluute ginni wa, ɓeyute kotti wa, ñeyute ɓúk laaha na téebírú rí. 14 Cépëꞌ Yéesú gaala ra, ɗi otte ɓëewí caakute níi caak. Tígí daaha, keeña ɗúmpé waa na ces, ɗi yampe na paƴ jéríɗɗë. 15 Ɗi hampe paƴi jéríɗɗë níi naꞌa na yëellëh. Tígí daaha, taalibe ya leɓuute ri wonu ri tih : « Wone ɓëewí ƴee saañ ginna leɓoh dee ra, wa saame yii túmún wë ɓúkkí wë, tígë homu yen dee ra lahay yin, te naꞌ ee saañ haale ra. » 16 Ɗi won wa tih : « Miteh ri ! Ɗon fi ƴah, yérí wë yii nay waa ñame. » 17 Wa wonu ri tih : « Fun lahuu mbúurú iip a jén ana dee kut. » 18 Ɗi won wa tih : « Këmí sëꞌ wë deh. » 19 Ɗi antee nah ɓëewë took feey sun fi gaaw fa. Ɗi ɓeɓpe mbúurú yí iippa a jénní ana ya, ɓéyíɗté afi yeelte sun, símpé Koope, antee lecsaꞌ mbúurëe, yeɗte wa taalibe ya, wa woruute wa ɓëewë. 20 Ɓëewë ɓéeɓ ñamute níi laalute. Négírúu wooñnjiida ra, wa líiffé dama sabboo a dama ana. 21 Ɓëewë ñamu na ra warutee mit ow ƴaal júnní iip (5.000), bokaay ɓeleɓɓa a tuŋka.
Tílí Yéesú sun fi mulaa
(Saame Marka 6.45-52 ; Saŋ 6.16-21)
22 Filoon fi baaha, Yéesú yíppée nah taalibe yi haal gaala, wa këllëh rí ɓúgí yíníi laaha naꞌ-naꞌ, ɗi fi baa ɗi pëkís ɓëewë paaƴ. 23 Pëkísëꞌ rí ɓëewë rë, ɗi hécëhté saañce ɗaŋ Koope sun fi daŋin. Elgi Koo ɗeef ɓani afi kut daa tasu hatni baaha.
24 Wahtaa homaꞌ ri daaha ra ɓéeɓ, ɗeef gaala haalu taalibe ya ra ín jaanndohte ngilaaw ma leelii laaha ra, mboowaanna na mokil wa. 25 Lahaꞌ hagada ra, Yéesú tíl tílë sun fi mulaa, na saañ ri ɗeefri wa ra. 26 Oluu wa ri na tíl sun fi mulaa, wa habuu biti koon yaa jíné ; wa tíitúté na fogu. 27 Ɗi yíppée wëe won tih : « Hëbí affon ! Ngënë tíití ! Yaa soꞌ ! »
28 Peer won ɗi tígí daaha tih : « Hena biti ɗi ɗo fi Yíkëe rëe, won soꞌ mi ñee sun fi mulaa mi ɗeefiɗ ɗo. » 29 Yéesú won ɗi tih : « Aye ! » Peer yíppée cép gaala, na tíl sun fi mulaa, yuliɗte ɗii na. 30 Ndaa olaꞌ ri biti ngilaaw ma lahte doole, ɗi tíitté na dal honoh, foŋke won tih : « Yíkëe, sëmlëꞌ sëꞌ ! » 31 Yéesú yíppée yeɗ yaꞌi hampe ri, antee rii won tih : « Fu néekíñëꞌ yih ? Ngémën tasaꞌte ee ! » 32 Wa ɓéeɓ ana anutee haal gaala, ngilaaw ma seemmite. 33 Tígí daaha, wa fa húmú filiɓ gaala ra ɓéeɓ ƴekute fíi Yéesú wonu tih : « Fu Koy Koope kaah ! »
Ɗee paƴuu ɓëewë Senesaret ra
(Saame Marka 6.53-56)
34 Húusúu wë laaha ra, wa teeruu Senesaret. 35 Yúhsúu ɓëewë dékú daaha Yéesú rë, wa wonute ri ɓëewë hatni baaha ɓéeɓ. Ɗi komute jéríɗɗë ɓéeɓ. 36 Ɓëewë na ɗagu ri biti jéríɗɗë leɓ wuti ƴaha nuf búubí kut. Te ɓëewë leɓu na ra ɓéeɓ wahute.