27
Kúrí Yéesú fíi Pilaat
(Saame Marka 15.1 ; Lúkkë 23.1 ; Saŋ 18.28)
1 Yíilëꞌ Koo ɓaabin cúɓ, kélfë yí seeƴoh ya ɓéeɓ a ɓaha yi yëwúɗɗë tookute, fahuu hawrohi Yéesú húl. 2 Wa pokruute ri, komute ri gëernëer Pilaat.
Naadohi Yudaas
3 Yudaas fa yaay Yéesú rë, olaꞌ ri biti Yéesú aattiyuute húl rë, ɗi réeccíyëhté : ɗi payte nimiliri kélfë yí seeƴoh ya a ɓaha ya gina hanjarri sabay éeyë (30), 4 won wa tih : « Mi bakaaɗte di yee yaayaꞌ mi jaambura pagay yin bee na suu hawu húl rë ! » Wa wonu ri tih : « Waal fi fun yi na ? Baa saf ɗo ! » 5 Tígí daaha, Yudaas bette hélsë filiɓ Faam fi gaani Koope daaha, saañce pokke níh lúumí, naadohte. 6 Kélfë yí seeƴoh ya píyúté hélsë, anutee won tih : « Yen waruy boollaꞌ hélsí ƴeh a alal mi Faam fi gaana ; wa hélíis ñif. » 7 Tígí daaha, wa dëekúuté took, habute biti hélsë lomuu meey yugusohi yaaɗɗa ndín, hen hacaa yi doha-ndéemmë. 8 Daa tah níi a woteh, feey fi baa wonuu « Meeyi ñif ma ». 9 Yee húmú won yonente Yérémí rë lahaꞌte ɗah. Ɗi húmú won tih : « Wa ɓeyute hanjarri sabay éeyë yë (30), daa wa cadum fa wonantuu ri koyyi Israyel ra, 10 wa lomuute wa meey yugusohi yaaɗɗa, ti di nahaꞌ soꞌ ri Koo-Yíkëe nen. »✡27.10 Saame Sakari 11.12-13 ; Yérémí 32.6-9
Tígí Yéesú húl
(Saame Marka 15.2-15 ; Lúkkë 23.3-5, 13-25 ; Saŋ 18.33 níi 19.16)
11 Cagaꞌ Yéesú fíi gëernëer Pilaat ra, gëernëerë meelte ri won tih : « Daa fu buuri yëwúɗɗë ë ? » Yéesú won ɗi tih : « Fu wonte ri, daa mi ! » 12 Kélfë yí seeƴoh ya a ɓaha ya gina ayute na yabu ri yin caak filoon fe, ndaa ɗi tahay ɓúkí waa na. 13 Pilaat won ɗi tígí daaha tih : « Fu kelaay iña na wonu wa sun fu ɓéeɓ rë keloo a ? » 14 Ndaa Yéesú haagay ɓúkí waa na yínë sah na lof di iña yabu ri ra. Yaa kúnté af gëernëer pak.
15 Lahaa Paak ɓéeɓ, gëernëer ɗúhíɗ ow kasaa, bee fahuu ɓëy gina biti daa ri yeɗɗun ra. 16 Ɗeef lahte ɓëyí síiwté húmú kasaa, hínú Barabaas. 17 Pilaat meelte dúukëlí ɓëewë teeꞌuu daaha ra won tih : « Hanndal ki Barabaas a Yéesú fë në wonuu Kiristaa ra, ɗon fahuu biti mi ɗúhrírë ron wah waa na ? » 18 Ɗi fi Pilaat yúhté biti nagajek ɓëewë iñaanuu Yéesú iñaanoo daa tah wa kom ri ri. 19 Te payaꞌ ri níi tookke këem buur ra, ɓelaa liiltee wolaꞌ ɗii na woni biti ɗi ɓanti haal iñi ɓëyí júɓí bah, ndah ɗi heeƴce heeji téƴcé afa lool sun fi ɓëeꞌ elgin.
20 Di filiɓ ƴaaha ɓéeɓ, kélfë yí seeƴoh ya a ɓaha ya gina ɓekute dúukëlí ɓëewë nuf, nda wa won Pilaat biti Barabaas daa yeɗɗun, Yéesú hawu húl. 21 Pilaat meelaatte dúukëlí ɓëewë won tih : « Ɗon fahuu biti mi yeɗɗan wah wa fi ana ya ? » Wa ɓéyrúté unni wa sun wonu tih : « Fun fahuu Barabaas ! » 22 Pilaat cagohte wa won tih : « Mantee ɓal, kon Yéesú fë na wonuu Kiristaa ra, may rii hene ɗíh ? » Wa ɓéeɓ wonu tih : « Daaƴe ri kurwah ! » 23 Pilaat tahilte won tih : « A ri paŋ yii ɓosi bih ? » Ndaa wa ɓaatuutee ɗaañnjoh na wonu tih : « Daaƴe ri kurwah ! »
24 Olaꞌ Pilaat biti ɗi mínéh yin waa na, te wa ɓaatuu haayloh ɓaatoo ra, ɗi ɗaŋke muluɓ, na ɓooñnjoh fíi wë, won tih : « Mi lante yee nay yúfé ñif mi ɓëyí júɓí beh. Baa waal fon ! » 25 Wa ɓéeɓ tahute wonu tih : « Ñif mi keenan sun fi fun a sun fi koyyi fun ! » 26 Tígí daaha, Pilaat ɗúhríɗté wë Barabaas kasaa. Ɗi fi Yéesú nék, ɗi laɓirohte ri laraw, antee wa rii yeɗɗaꞌ wa daaƴe ri kurwah.
Këekkëlíi soldaarra Yéesú
(Saame Marka 15.16-20 ; Saŋ 19.2-3)
27 Filoon fi baaha, soldaarra ɓeyute Yéesú kúrúté rí faam gëernëer, wani kayya filiɓ ɓéeɓ gíiwúté rí. 28 Wa nísúté yéré yë faana, lofute ri paltu luum, 29 ɓeyute ñap yugusute baane, ɓekute afa, anutee rii ɓek kankaniit bëhëer yaꞌi ñamaa fi, na ƴeku fíyí na këekkílíyúu rí wonu tih : « Coleere buuri yëwúɗɗë ! » 30 Wa na tuulsuu ri, ɓeyute kankaniidi bëhëerë yaꞌi, na laɓisuu ri af. 31 Këekkëlíyúu wë rí níi wocce ra, wa nísúté paltaa faana, ɓekaatute ri búuɓɓí, na suu kúrí daaji kurwah.
Daaƴi Yéesú sun fi kurwaha
(Saame Marka 15.21-32 ; Lúkkë 23.26-43 ; Saŋ 19.17-24)
32 Ɗúhrúu soldaarra Yéesú gina, wa teeꞌuute a ɓëyí dék Siren hínú Simoŋ, wa enute ri kurwahi Yéesú. 33 Lahuu wa tígë në wonuu Golgotaa ra (daa ri : këeŋ-af), 34 wa yerute Yéesú béeñí boolluu a yii haayte hek, ndaa ɗíkísëꞌ rí wë rë, ɗi kaaꞌaꞌte han. 35 Daaha, wa daaƴute ri kurwaha. Filoon fi baaha, wa púlúfúté búuɓɓí, woruute wa hanndal ki wa, 36 anutee took na wohu ri. 37 Wa tíkúté unna won yee tah ɗi tíkú húl rë yeeddaꞌ ki afa sun. Unna won yii beh : « Ɓëyí bee daa Yéesú, buuri yëwúɗɗë. » 38 Lahte banndi ana yi daaƴaaluute kurwah ɓal hëbís Yéesú : ɓëyí yínëe paaꞌte ri yaꞌ ñamaa, yínëe paaꞌte ri yaꞌ sugu.
39 Ɓëewë na ñeyu hatni baa ra, na solu Yéesú, hégíƴé affi wa, 40 wone tih : « Ɗo fa won biti fay poo Faam fi gaani Koope, fu taɓahaat ɗi filiɓ waal éeyë rë, namee sëmlëꞌ afu ! Hena biti fu Koy Koope raa, nuule kurwaha ! » 41 Kélfë yí seeƴoh ya, yëeddëh yí kootii Mëyíis a ɓaha ya gina na ñaawlu ri ɓal wonu tih : 42 « Ɗi sëmlëꞌté i ow kay, ɗi antee mínéh sëmlëꞌ afi ! Ɗi henaꞌ buuri Israyel ɗíh ? Ɗi nuulan kurwaha book fun gém ɗii na ! 43 Won neh ɗi tík yaakaari Koope na, a biti daa ri Koohi a ? Hena biti Koope fahaꞌte ri raa, sëmlëe rí leegi ! » 44 Wa fi banndi ya daaƴu kurwah homute hëbísí rë ɓal na ñaawlu ri ti ɗaaha nen.
Húlí Yéesú
(Saame Marka 15.33-41 ; Lúkkë 23.44-49 ; Saŋ 19.28-30)
45 Lahaꞌ naꞌ leelu af ra, gina ɓéeɓ ñúussé túɗ níi mitte wahtu éeyë. 46 Wahtii éeyë fë, Yéesú ɗaasse foŋ won tih : « Eloyi, Eloyi, lama sabaktani ? »✡27.46 Saame Kañaa ya 22.2 Daa ri : Koope, Koope, fu súugëh sëꞌ yi taan ? 47 Lahte i ow di ɓëewë húmú daaha ra, keluu wa unni ƴah, wa wonu tih : « Ɗi ee dëek Éelí rë kan ! » 48 Ow di waa na yíppée múkë, ɓeɓpe líil sooppe ri bineegar, pokke ri af baaŋ bëhëer, yuliɗte ri ɓúk Yéesú na fahaꞌ hënndí. 49 Ɓëewí kayya na wonu tih : « Yéɗɗí yen olsoh nda Éelí ay ac sëmlëꞌí rëe. » 50 Tígí daaha, Yéesú ɗaasaatte foŋ, yeɗɗohte lússé.
51 Tígí daaha, rídíi ɓídí Faam fi gaani Koope ɗap tígí selaa níi sela ra, ɗaɗte dalaꞌte sun níi feey, ɓísëlsëꞌté ana. Wahtii baaha, feey fa na hégíƴëh, laꞌ yi gaanna na ɗarsaꞌ, 52 lahte luuyyi kúnsëhté, i ow caak di ɓëewí Koope këllúté ɓúudé, 53 ɗúhúté nuŋŋi wa. (Wa fa ɗúhú nuŋŋi wa ƴaaha ra, filoon fi bee këllúu Yéesú ɓúudé rë, wa haalute Yerusalem gini selaa níi ow caak olute wa sah.)
54 Kélfíi soldaara a ɓëewée ké rí në húmú wohu Yéesú rë, oluu wa hégíƴëhí feey fa a iña lah ɓéeɓ rë, tíitúté níi tíit, wonu tih : « Ɓëyí bee Koy Koope kaah ! » 55 Lahte i ɓeleɓ caak húmú cëehúuté na olsuu ; daa wa ɓeleɓɓa na húmú ñéerúu a Yéesú na tooppituu ri homaꞌ ri Galile níi a ɗee ra. 56 Mari fi ɓëy Makdalaa húmú waa na, a Mari yaafi Saak a Suseef, a yaafi koyyi Sebede.
Haji Yéesú
(Saame Marka 15.42-47 ; Lúkkë 23.50-56 ; Saŋ 19.38-42)
57 Sosaꞌ naꞌ ra, lahte ɓëyí caakke yin dék Arimate acce, ɗi hínú Suseef. Ɗi non taalibe yi Yéesú ɓal. 58 Ɗi payte meelte Pilaat ɓúudé fi Yéesú. Pilaat tahte, nahaꞌte biti ɗi yeru ri. 59 Suseef ɓeɓpe ɓúudé fë, payte líiwté rí a perkal has, 60 ɗappe ri kolom ki anuu yotu loo laꞌ, bi ɗi saamiɗ ɗi afi koon. Ɗi píníŋké laꞌ gaan kúnté nuŋa antee saañ. 61 Di filiɓ ƴaaha ɓéeɓ, Mari fi ɓëy Makdalaa a Mari fi yínëe homute tasute daaha, tookute jaannduute luuya.
62 Kéy fín fë, yiin bisa na hílsúu rë, kélfë yí seeƴoh ya a fariseŋŋa ñéerúuté, payute Pilaat na 63 wonu ri tih : « Gëernëer, fun nérsúuté biti na pesaꞌ felohi baa ra, ɗi húmú wonte biti waal éeyë filoon fi húlí, ɗi ay këllú ɓúudé. 64 Kon wohree luuya níi waali éeyë fë ; page níi taalibe yi ɓanti loh ɓúudé fë, anti wone ɓëewë filoon fe biti ɗi këlluté ɓúudé. Baa lah raa nay lukee ɓos fellee merees. » 65 Pilaat won wa tih : « Wohoh ya íníh në woo ? Ɓéyí wë wa woh luuya di fahuu ron ri ! »
66 Wa koluute suute luuyin, ñofute ílë pak leewute ri, tíkúté wohoh ya daaha.