28
Kolohi Yéesú ɓúudé
(Saame Marka 16.1-10 ; Lúkkë 24.1-12 ; Saŋ 20.1, 11-18)
1 Ɗúmëꞌ bisa na hílsúu yëwúɗɗë rë, dímëesë ɓaabin cúɓ, Mari fi ɓëy Makdalaa a Mari fi yínëe suute kénsëhí luuyi Yéesú. 2 Ɗee a ɗeh, feey fa na hégíƴëh hégíƴëhí misikke : malaaka di malaaka yi Koo-Yíkëe kolaꞌte sun céppé, acce píníŋké laꞌa kúnúu luuya ra hatin, tookke sun. 3 Malaakaa niiñ niiño níi na tiriñ ; búubí naaꞌ naaꞌo níi na tak. 4 Wohoh ya tíitú tíitë níi na saaku, keenute ti húlíɗ nen. 5 Tígí daaha malaakaa won ɓeleɓɓa tih : « Ngënë tíití ! Mi yúhté biti ɗon saamu Yéesú fë húmú daaƴu kurwaha ra. 6 Ɗi íníh deh, ɗi këllúté ɓúudé ti ɗee húmú wonaꞌ ri ra nen. Ëyí ɗon olsoh tígë húmú fënɗú rí rë. 7 Yípíi pay ɗon won taalibe yi biti ɗi këllúté ɓúudé, te ri këllëhté rën Galile. Ɗon ay rii olee dín fë. Unni soꞌ ƴaa koon. »
8 Ɓeleɓɓa yípútée koloh luuya a tíitëe yí wë, ndaa keeññi wa sosse níi sos, wa múkëyúté komi taalibe ya wona. 9 Ɗee a ɗeh, Yéesú na ac téebílëhí wë, won wa tih : « Cëlíi paŋ ! » Ɓeleɓɓa leɓuute ri, yabaaluute kotta, na jaamiyuu ri. 10 Ɗi won wa tígí daaha tih : « Ngënë tíití ! Pëyí ɗon won koy-yaayyi soꞌ saañ Galile : wa ay soo olee dín fë. »
11 Homuu ɓeleɓɓa waala wa na suu ra, lahte soldaarri nonu ƴee na húmú wohu luuya ra, na nimilu ginin léhíní kélfë yí seeƴoh ya iña lah ƴaa ra ɓéeɓ. 12 Wa fi kélfë yí seeƴoh ya namutee dëek ɓaha ya gina, wa gonlute níi pokute, anutee yeɗ soldaarra juur hélíis, 13 wonu wa tih : « Lah wëní ɓëewë biti taalibe yi Yéesú daa ayu elek lohute ɓúudé fí ɗeef ɗon na neeꞌu. 14 Woni baa tíl níi síit nuf gëernëer rëe, fun ay yúh ɗee nay fun ɗii nofantee níi ɗon ɗúh në rë. » 15 Soldaarra ɓeyute hélsë, pagute yee nahu wa ra. Woni wa líiwëlsëꞌté filiɓ fi yëwúɗɗë, te lísúu wonu níi a ɗeh.
Feeñiyohi Yéesú taalibe yi
(Saame Marka 16.14-18 ; Lúkkë 24.36-49 ; Saŋ 20.19-23 ; Tílëdí apootarra 1.6-8)
16 Léhínúu wë ɓeleɓɓa ra, taalibe yi sabboo a yínë yë koluute suute Galile, lawute daŋa húmú tíisëꞌ wë Yéesú rë. 17 Séenúu wë rí, wa yabute na jaamiyuu ri. Filiɓ fi baaha ɓéeɓ, lahte ƴi lahute nuf ana ɗii na. 18 Tígí daaha, Yéesú leɓohte wa, won wa tih : « Mi onute sañ-sañi pagaa mi yin ɓéeɓ sun a feey : 19 kon pëyí ɗon haal ginna ëldúnë ɓéeɓ, ɗon saamiɗ soꞌ i taalibe, ɗon bëtís wë di tii Boffa, tii Koy ka a tii Ruuh-Peseŋ, 20 te ɗon yëedíɗ wë, wa ñee iña won mi ɗon ra ɓéeɓ. Yúhí biti mee leeloon faraah níi kiri fi kirih. »