9
Koope a ɓëy Israyella tanis ɗi ra
1 Yee na saañ mi wone bee ra kaah. Ma na feleh ndah mi non Kiristaa na. Ruuh-Peseŋ fa na níiɗ sëꞌ rë a yee on soꞌ nuf soꞌ ra seedeyute baaha. 2 Mi lahte yii misikke soꞌ keeñ soꞌ, misiga kaaꞌaꞌte soo yeris. 3 Wuti Koope alak soꞌ, ɓísëꞌ sëꞌ a Kiristaa sah ndah mújí koy-yaayyee ke soꞌ funi wa boku heet ɗa koon, mi tahte. 4 Daa wa ɓëy Israyel : Koope daa tanis wa wa henute koyyi, teeɓpe wa ndami, pokke i yin caak hanndal ki ɓani wa, yeɗte wa Kootaa, teeɓpe wa ɗee nay rii jaamiyuu ra, gappe wa iña nay ri wa pagire ra. 5 Wa coosaanuu caaccee filoon húmú tanis Koope ra ; te Buura Koo fal ri ra ayaꞌ ri hente ow ra, non heedi wa, ɗi fa Koope ra te paaꞌ ɓéeɓ sun ɗa. Yen dékúun símí faraah. Ɗémíin !
6 Mi homay woni biti Koope pagay yee gapaꞌ ri ra déꞌ ! Paŋke ri naam, ndaa koyyi Israyel neh ɓéeɓ daa nonu heedi kah-kah fi Israyel ; 7 hen sédí Abraham rek taheh Koope habaꞌ ɓëyí baaha sédí kah-kah fi Abraham, ndah Koope won Abraham tih : « Tala gap mi ro ra ay ɗúhée Isaak na. »✡9.7 Saame Dalaana 21.12 8 Baa daa ri bitih : séttée ké Abraham límúu di pagaɗ ƴaal a ɓeleɓ ra ɓéeɓ neh daa koyyi Koope, ƴee límúu gapaꞌa gapaꞌ Koope ra daa koyyi kah-kah yi Koope. 9 Yee gapaꞌ Koope ra daa ri beh : « May nimil faamu wahtii bee kíirkí, te ay ɗeef ɓeleɓu Saara lah koy ƴaal. »✡9.9 Saame Dalaana 18.10 10 Koope teyay baa kep. Koyyi ana yi Rebekaa✡9.10 Saame Dalaana 24.1-67 ; 25.19-26 daa húmú boku boffa yínë neh a ? Boffi baaha ɗi Isaak fa daa ciffi yen ɗa neh a ? 11-12 Tuŋka húmú síis, ndaa balaa wa límú níi wa paŋ yin wun mbée yin ɓos, Koope won Rebekaa tih : « Ɓahaa nay hene súrgíi ñéedë. »✡9.11-12 Saame Dalaana 25.23 Ɗon ot Koope paŋ yii bah, biti ɗi tansaꞌ ow iñi wunna paŋ ɗi ra neh, ndaa ri tansaꞌ ɓëeꞌ neɓ ɗi ra nda yee koloh rii paŋ ra tílé saye. 13 Bíníyúté Téerëe bitih : « Mi fahaꞌ Yakop, mi kaaꞌaꞌte Esawuu. »✡9.13 Saame Malasi 1.2
14 Kon leegi yi nay habu woni bah ? Koope pagaꞌ iñi júɓëy ë ? Mi yaakaaray ri ! 15 Nagajek ɗi húmú won Mëyíis tih : « May yérmé ɓëyí neɓ soꞌ, may teeɓe naaꞌ-keeñ ɓëyí neɓ soꞌ. »✡9.15 Saame Kolohi koyyi Israyel Ésíp 33.19 16 Kon baa ñeyaay yee fahaꞌ ow ra, ñeyaay gëergëerlëhí, Koope daa na teeɓaꞌ naaꞌi keeñ kep. 17 Di bíníyúu rí Téerëe, Koope won buuri Ésíp tih : « Fu ot mi tëekíɗ ɗë fu hen buur biti kep mi ñeyaꞌ ɗoo na mi teeɓaꞌ doolii soꞌ, a biti tii soꞌ hen lëyëŋ feey fa ɓéeɓ. »✡9.17 Saame Kolohi koyyi Israyel Ésíp 9.16 18 Kon, di na teeɓaꞌ Koope naaꞌi keeñi ɓëyí neɓ ɗi, ɗi súhlëꞌ keeñ ɓëyí neɓ ɗi ɗaaha.
Haayi keeñ Koope a naaꞌi keeñi
19 Ñakay ow mín sëe won bitih : « Lahaꞌ ɗaaha raa kay, ɗi lahte yii wona ri yen a ? Daa mín kaaꞌ paŋ yii fahaꞌ Koope ow na ? » 20 Soꞌ may wone ɓëyí baa tee : daa fu wa níi fu tíkée Koope af te fu ow kep ? Yaaɗ mín won ɓëeꞌ moloŋ ɗi ra biti ɗee yugusuu ri ra neɓaay ri a ? 21 Yugusoh yaaɗ mín paŋ yii neɓaꞌ ri dépëh, te di filiɓ dépëhí ƴaaha, ɗi mín nëe moloŋ yaadi ay laasu a yaaɗ kay ɗee rek neh a ? 22 Kon Koope fahaꞌ teeɓaꞌi haayi keeñi a teeɓaꞌi katani daa tah ɗi hom yii maañce na mújíɗ ɓëewë keeña haay wa ra, wa fa cagute saŋku ra. 23 Ɗaaha, Koope fahaꞌ teeɓi ɓëewë ndami gaani, wa fi ɓëewë keeñi naaꞌ waa na ra, wa fa cagute bok ndami baaha ra. 24 Ɓëewí ƴaa wa yen fa ɗi dëek wë rë ! Ɗi dëekëey filiɓ fi yëwúɗɗë kep, ɗi dëekëꞌ filiɓ yëwúɗɗë a filiɓ heetti kayya ɓal. 25 Daa ri yee won ɗi filiɓ Téerëe bíní yonente Oose ra bitih :
« Ɓëewí húmú henuy ɓëewí sëꞌ,
may waa wonee ɓëewí sëꞌ,
te ɓëewë húmú fahaay mi keeñ soꞌ ra,
may waa wonee ƴee fahaꞌ mi keeñ soꞌ níi fahaꞌ ra.✡9.25 Saame Oose 2.25
26 Tígë në húmú wonaꞌ mi wa bitih :
“Ɗon ɓëewí sëꞌ neh” ra,
wa ay dëekúu koyyi Koope fa na pes ɗa. »✡9.26 Saame Oose 2.1
27 Ɗi fi yonente Isayii nék húmú ɓéyíɗté uni wonte yii leŋke ɓëy Israyel na won tih :
« Caakuu ɓëy Israyel níi ti peppi feey fa ɓúk kísí nen,
ɓëewë nay múcé filiɓ fi wa ra ii mit yin ;
28 ndah Koo-Yíkëe ay paŋ yee won ɗi ra
ɗee luk ɗii gaawaꞌ ra feey fa,
te ay waa paŋ ɓéeɓ. »✡9.28 Saame Isayii 10.22-23
29 Ɗi fi yonente Isayii húmú maañcee won bitih ɓal :
« Koo-Yíkëe Kélfíi gaana helay i ow tali yen koon,
tin yen ay made ti ɓëy Sodom a ɓëy Gomoor*9.29 Sodom a Gomoor : Wa ginni Koope húmú muuyilte wa. Saame Dalaana 19.23-28.koon nen. »✡9.29 Saame Isayii 1.9
Yëwúɗɗë kaaꞌuute yúhí Uni Neba
30 Kon leegi yi nay habu woni bah ? Heetti kayya saamuy júɓ íllí Koope ra, Koope habaꞌte wa ɓëewí júɓúté íllí, ndah ngémí wë ! 31 Ɓëy Israyella húmú ñeeꞌuu Kootaa na saamu júɓ faraah íllí Koope ra nék, liiluy yee na sehu wa Kootaa ra. 32 Baa haalaꞌ yih ? Haalaꞌ biti kep wa saamuy ñeyaꞌ ngémë nda wa júɓ íllí Koope. Wa tíkú yaakaari wa biti koon iña na pagu wa ra daa nay tahe wa júɓ íllí Koope, wa anutee keen sun fi « laꞌa na kabinaꞌ » ra, 33 daa ri bee bíníyú Téerëe rë bitih :
« Ëlsíi ! Mee yíp laꞌ Siyoŋ ra,
laꞌi na kabinaꞌ,
laꞌi gaani na kéenɗëꞌ,
ndaa ɓëyí fí gém ɗii na, fii sopoh. »✡9.33 Saame Isayii 28.16
✡9:7 9.7 Saame Dalaana 21.12
✡9:9 9.9 Saame Dalaana 18.10
✡9:10 9.10 Saame Dalaana 24.1-67 ; 25.19-26
✡9:11-12 9.11-12 Saame Dalaana 25.23
✡9:13 9.13 Saame Malasi 1.2
✡9:15 9.15 Saame Kolohi koyyi Israyel Ésíp 33.19
✡9:17 9.17 Saame Kolohi koyyi Israyel Ésíp 9.16
✡9:25 9.25 Saame Oose 2.25
✡9:26 9.26 Saame Oose 2.1
✡9:28 9.28 Saame Isayii 10.22-23
*9:29 9.29 Sodom a Gomoor : Wa ginni Koope húmú muuyilte wa. Saame Dalaana 19.23-28.
✡9:29 9.29 Saame Isayii 1.9
✡9:33 9.33 Saame Isayii 28.16