10
1 Koy-yaayyi ƴeh, yee fahaꞌ mi keeñ soꞌ te daa yee na ɗaŋ mi Koope ra, daa ri biti yëwúɗɗë múc. 2 Soꞌ mi mín wëe seedeyiɗ biti wa pokuute Koope na níi pokoh, ndaa wa yíih waala. 3 Wa yíih yee tah Koope na habaꞌ ow ɓëyí júɓpé rë, wa anutee saamiɗ affi wa waali wa. Ɗaaha, wa kaaꞌuute ñee waala ɗaɗ Koope na tah ɗi habaꞌ ow ɓëyí júɓpé rë. 4 Kootaa ƴímëꞌ bee ayaꞌ Kiristaa ra, te ɓëyí fí gém ɗi fi baa na ɓéeɓ, Koope ay rii habaꞌ ɓëyí júɓpé.
Ɓëyí gém Yíkëe ɓéeɓ ay múc
5 Mëyíis húmú bíníté yii leŋke júbí kolaꞌ Kootaa, won tih : « Ɓëyí fí ñee túuƴëꞌ yí Kootaa, Kootaa ay on ɓëyí baa pes. »✡10.5 Saame Tali Léwí 18.5 6 Ndaa júɓë kolaꞌ ngém rë won yii beh : « Ngana won nufu bitih : “Daa nay lawe sun-Koo ?” »✡10.6 Saame Nérsí Kootaa 30.12 Baa madaꞌ biti ɓëyí baa fahaꞌ biti Kiristaa cép feey nen. 7 Ɗi wonaatte bitih : « Ngana won biti ɓal : “Daa nay cépé gin ɓëewë húlú rë ?” »✡10.7 Saame Nérsí Kootaa 30.13 Baa madaꞌ biti ɓëyí baa fahaꞌ këllí Kiristaa ɓúudé nen. 8 Júɓë kolaꞌ ngémë rë won yii beh : « Una ee hëbísú, ɗi ee ɓúkú te ri ee keeñu. »✡10.8 Saame Nérsí Kootaa 30.14 Uni baa daa ri Uni ngémë na waariyu fun ra. 9 Ɓëyí fí caŋ fíi ɓëewë ɓéeɓ, haaŋ ɓúkí won biti Yéesú daa Yíkëe te ri gém keeñi biti Koope këlíɗté rí ɓúudé, ɓëyí baa ay múc. 10 Gém ee keeñ, te Koope habaꞌ ow ɓëyí júɓpé ngémí ; ɓëyí fí gém fay rii ɗúhré ɗúhrë ɓúkú, te ɓëyí fí paŋ ɗi, Koope ay rii múcël. 11 Bíníyúté Téerëe bitih : « Ɓëyí fí gém ɗii na, fii sopoh. »✡10.11 Saame Isayii 28.16 12 Ɗaaha, yëwúɗɗë a heetti kayya ɓéeɓ yínë : wa ɓéeɓ daa boku Yíkëe fë ɓëyí fí dëek ɗí ɓéeɓ ɗi tiil ro, baah ɗoo na níi baah ra. 13 Nagajek, bíníyúté bitih : « Ɓëyí fí dëek Yíkëe ɓéeɓ ay múc. »✡10.13 Saame Suwel 3.5
14 Ow ay rii dëekée ɗí nék te gémëy rí ? Ow ay rii gémée ɗí te kéllëy ow na won ɗi ri ? Ow ay rii kelee ɗíh te waariyuy ri ? 15 Ay waareyuu ɗíh te lahay ɓëyí wolute yii baaha ? Bíníyúté Téerëe biti neh : « Aya na ayu ɓëewë kúrú Uni Neba ra daa neɓ yeel ! »✡10.15 Saame Isayii 52.7 16 Ndaa ɓëewë ɓéeɓ neh daa ñeyu yee won Uni Neba ra. Isayii won tih : « Yíkëe, daa gém yee wonu yen ra ? »✡10.16 Saame Isayii 53.1 17 Kon gém ɓeyuu yee na síkírëh ow una na waariyu ra, te una daa waaraa na waariyu Kiristaa ra.
18 Leegi mi meelaꞌ yii beh : Yëwúɗɗë keluuy Uni Neba keloo a ? Añcaŋ wa keluute ri ee ! Ndah bíníyúté Téerëe bitih :
« Unna líiwëlsëꞌté feey fa ɓéeɓ,
te tígí teem ow feey fa ɓéeɓ kelohte wa. »✡10.18 Saame Kañaa ya 19.5
19 Mi meelaat yin kay : wona laday affi ɓëy Israyel lado a ? Añcaŋ ɗéɓëenë, Mëyíis bíní Téerëe biti Koope won tih :
« May paŋ níi ɗon fi ɓëewí sëꞌ,
ɗon eeñnjaꞌ ɓëewí heedi wa tikkiyay,
keeññon haay heedi ɓëewí yúunúuy. »✡10.19 Saame Nérsí Kootaa 32.21
20 Isayii tíkëhté në, kaañce níi bíníté Téerëe biti Koope won tih :
« Ɓëewí në húmú sëemíh sëꞌ olute soꞌ,
mi feeñiyohte ɓëewí në húmú méelíih sëꞌ. »✡10.20 Saame Isayii 65.1
21 Ndaa yii leŋke ɓëy Israyel na, Koope won wa tih :
« Mi heeŋke yaꞌ soꞌ ma na dëek ɓëewí sëꞌ ɓaabin níi elgin,
wa kaaꞌuute keloh, wooñnjuute. »✡10.21 Saame Isayii 65.2
✡10:5 10.5 Saame Tali Léwí 18.5
✡10:6 10.6 Saame Nérsí Kootaa 30.12
✡10:7 10.7 Saame Nérsí Kootaa 30.13
✡10:8 10.8 Saame Nérsí Kootaa 30.14
✡10:11 10.11 Saame Isayii 28.16
✡10:13 10.13 Saame Suwel 3.5
✡10:15 10.15 Saame Isayii 52.7
✡10:16 10.16 Saame Isayii 53.1
✡10:18 10.18 Saame Kañaa ya 19.5
✡10:19 10.19 Saame Nérsí Kootaa 32.21
✡10:20 10.20 Saame Isayii 65.1
✡10:21 10.21 Saame Isayii 65.2