11
Koope yeɗɗay ɓëy Israyel
1 Kon cëe mi meelaat yin yínë kay : ƴaha ɗaaha raa, daa ri biti Koope yerisse ɓëy Israyel ɓëewí ë ? Mi yaakaaray ri ! Moo soꞌ mi bee mi ɓëy Israyel ee ! Mi coosaanaꞌ Abraham na, mi non tali Beŋsame ee ! 2 Koope yeɗɗay ɓëewée ké rí ɗi maañ waa tanis ɗa déꞌ ! Ɗon yúhú yee bíníyú Téerëe, na hëwrëꞌ yonente Éelí ɓëy Israyel a Koope ra maan ? Ɗi húmú won tih : 3 « Yíkëe, wa hawute yonente yu húl, horsuute ílíƴƴë na hawruu fu ra. Daa mi tas ee kut te wa ee fahuu ɓegi ñíin sëꞌ feey ra. »✡11.3 Saame 1 Buurra 19.10, 14 4 Koope lof ri yi nék ? Koope won ɗi tih : « Mi yefiɗte af soꞌ ow júnní paana (7.000), daa wa ɓëewë mësɗúy ƴekiɗ ala fa na wonuu Baal ra. »✡11.4 Saame 1 Buurra 19.18 5 Ti ɗaaha nen ɓal, di jamanaa homu yen woteh bee ra, tasse ɓëewí caakuy, ƴi fí yúhté biti mali Koope daa tah wa tansu. 6 Mali Koope tah wa tansu raa kay, kon wa tansuuy biti wa pagu iñi wunte. Ƴaha baa koon ɗeef mala tah wa tansu ra mal neh !
7 Yen ay wone yi kon ? Ow caak di ɓëy Israyel liiluy yee na húmú saamu wa ra. Ƴee fu yéŋké biti Koope daa tanis wa ra kep daa liilu ri. Wa fi kayya nék, keeññi wa súhrúté 8 ti di bíníyúu rí Téerëe nen bitih :
« Koope túlílté affi wa :
dappe íllí wë,
dappe nuffi wa,
níi a woteh. »✡11.8 Saame Nérsí Kootaa 29.3 ; Isayii 6.10
9 Ɗi fi Dawit won ti ɓal :
« Looni wa ƴaha fíir waa na,
ƴaha fíirí ñaallu wa,
ƴaha laꞌi na kéenɗëꞌ waa na,
nda Koope daan wa.
10 Koope dapa íllí wë toñeh wa ay ole.
Ɗi dékëe séfí wë yii ɓítté níi ɓít. »✡11.10 Saame Kañaa ya 69.23-24
11 Mi meelaꞌ yin yínë : Kabinuu yëwúɗɗë rë, wa kabinuu nda wa keen hom daaha faraah aa yih ? Mi yaakaaray ri ! Ndaa nék, Koope ñeyaꞌ tooñi wa múclí heetti kayya nda wa fi yëwúɗɗë ɓosaꞌ heetti ƴaaha íl. 12 Af tooñi yëwúɗ caak daa tooñu ri, tah ɓëewë feey fa lah iñi wunte, keena keenu wa ra tah heetta ɓéeɓ lah iñi wunni gaante raa kay, kon ay lah iñi wunni lukki gaan biti wa non mújë níi mit sëk !
Mújí heetti kayya
13 Soꞌ mi won ɗon na leegi ɗon fa yëwúɗ neh ra : daa mi apootari ɓëewë yëwúɗ neh ra, te légéyë yeɗ soꞌ Koope ra, mi ɓek ri keeñ soꞌ. 14 Ɗon ot mi ɓek ri keeñ soꞌ, mi fahaꞌ biti ɓëy heedi fun ɓosaꞌ ron íl, nda lah ƴi múc waa na. 15 Nagajek, húmú yeɗɗaꞌ Koope yëwúɗɗë rë, heetta feey ɓéeɓ a Koope júɓúuté. Koope tahaat wa raa, yi nay lahe nék ? Baa daa ri kolaꞌ kúl kë nimil pesa neh a ?
16 Koope jébëlú buŋ mbúurú rëe, ɗeef mún më yugusuu mbúurëe rë ɓéeɓ selate neh a ? Koope daa lahaa níillí kilka raa, yaꞌ ya ƴii neh a ? 17 Heedi Israyel man ti tal ëlíifí hom meey, Koope lecce na i yaꞌ nen. Lecaꞌ Koope yaꞌ yi ƴaa ra nék, ɗi saam i yaꞌ ëlíif-luuf, ƴi cëllúu a ɗon fi heetti kayya, tokaꞌte yaꞌ yi ëlíifë hom meeya ra. Leegi, ɗon fi heetti kayya, ɗon pesuu ñif ma hom níillí ëlíifí baaha ra. 18 Ngënë héefí yaꞌ yi ëlíifë. Ɗon neh daa kúrú níillë, wa fi níillë daa kúrú rën. Kon ɗon lahute yii nay ron gaan-gaanlee a ?
19 Mín hen ɗon won bitih : « Yaꞌ yi ëlíifë lecute nda fun toku tígí wë ! » 20 Ɗon won ɗi raa ɗeef kaah. Gémëyë gémúy wë rë nék daa tah wa lecu ; te ɗon, gémë gémú ɗon ɗa daa tah ɗon hen gíŋ tígë húmú wë rë. Ndaa ngënë gëen-gëenlíi në múk nék ! Mëytíi affon moytoo kay, 21 ndah Koope baalay yëwúɗɗë daa yaꞌ yi ëlíifë meeya raa, lah ɗon fi yaꞌ yi ëlíifë luufa raa, taheh ow won. 22 Ëlsíi ɗee naaꞌaꞌ Koope keeñ a ɗee híinëꞌ rí rë : ɓëewë keenu ra, ɗi híinté waa na, ɗi ay naaꞌ-keeñ ɗon na biti ɗon pokoh ɗee naaꞌaꞌ ri keeñ ra. Henay bah, ɗon ɓal ɗon ay lecu ti yaꞌ kilik nen. 23 Te wa fi yëwúɗɗë, wa koloh yee homuu wa ra wa gém rëe, wa ay nimiliru toku tígë húmú koluu wa ra, ndah Koope mín wëe tokaat. 24 Ɗon fi heetti kayya, ɗon daa yaꞌ yi tal ëlíifí luufa lec Koope tokke tal ëlíifë meeya ra. Ɗon yúhúté biti baa yii yooɓay ti lah maan ? Wa fi yëwúɗɗë nék daa yaꞌ yi tal ëlíifë meeya. Koope ay waa lukee yooɓpi tokaat tal ëlíifë koluu wa ra na.
Mújí ɓëy Israyel
25 Koy-yaayyi ƴeh, mi fahaꞌ teeɓon yee waaƴ Koope te ow húmú yéeh yin na ra, toñeh ɗon ay habee affon ɓëewí ñaañute : hatin yínë di ɓëy Israyel keeññi wa ay súhé súhë níi ɓëewë nay múcé heetti kayya ra ɓéeɓ non ɓëewí Koope. 26 Ɗaaha, ɓëy Israyel ɓéeɓ ay múc, ti di bíníyúu rí Téerëe nen bitih :
« Sëmlëhë ay ɗúhée Siyoŋ,
ɗi ay nís séttí Yakop
kaañi Koope fa homuu wa ra.
27 Baa daa yee nay mii poke hanndal ki funi wa ra
biti mi ƴahti waa nísíɗ bakaaɗɗi wa. »✡11.27 Saame Isayii 59.20-21
28 Wa ƴíirúun kaaꞌa kaaꞌuu wa tahi Uni Neba raa, wa homuu kaaꞌoh yi Koope te baa daa yee wun ɗon na ra ; ndaa wa ƴíirúun biti Koope tanis wa tanso raa, ɗeef wa lísúu fahuu ndah caacci wa. 29 Koope na naafeh yee liil rii onaꞌ ra, te na líkéh ɓëewë ɗi dëek wë rë. 30 Ɗon húmú kaaꞌuute ñee woni Koope ɗéɓëenë ; ndaa leegi ɗon liilute naaꞌi keeñ Koope af biti yëwúɗɗë kaaꞌuute ñee woni Koope. 31 Ti ɗaaha nen, wa kaaꞌuute ñee woni Koope leegi, nda ɗon liil naaꞌi keeñ Koope, te wa fi ƴaaha ɓal mín liil naaꞌi keeñ Koope leegi. 32 Nagajek, Koope daa ɓek ɓëewë ɓéeɓ kaaꞌaꞌi baaha, nda ri teeɓ wa ɓéeɓ naaꞌ-keeñ.
Koope daa mit kañ
33 Koope lahay man kan ! Ɗee naaꞌaꞌ ri keeñ a ɗee ñaañaꞌ ri a ɗee lahaꞌ ri ham-ham ra lahay teem ! Daa mín poysaꞌ yee ham ri biti ay page ri ra ? Daa mín yúh yee waaƴ ɗi ra ? 34 Bíníyúté Téerëe bitih :
« Daa yúh nuf Yíkëe ?
Daa mín ɗíi ɓaat nuf ? »✡11.34 Saame Isayii 40.13
Bíníyúté biti ɓal :
35 « Daa yeɗ ɗi yin
níi rí waɗti yíníl ɓëyí baaha ? »✡11.35 Saame Yop 41.3
36 Iña ɓéeɓ ɗúhëꞌ ɗii na, daa ri tah iña ɓéeɓ lah, iña ɓéeɓ homiɗ ɗi. Koope laha ndam dee níi kiri fi kirih ! Ɗémíin !