यूहन्नां च्वःगु न्हापांगु पौ
म्हसीका
थ्व पतिइ निता मूखँ दु -- साहस यानाः परमेश्वर व वय्कःया काय् येशू ख्रीष्टलिसे छप्पँ जुइगु व थथे छप्पँ जुइगु पाखें अलग याइगु फताहा गुरूतय्गु शिक्षा पाखें बचय् जुया च्वनेगु ख्याच्वः। थज्याःगु शिक्षा कथं संसारय् च्वंपिं फुक्क मनूत चिप जुइ, उकिं येशू धात्थेंनं मनू खइ मखु। इमिगु शिक्षा कथं मुक्ति कायेत संसारयागु च्यूताः तयेम्वाः, अले मुक्ति काये धुंकूम्ह मनूयागु चालचलन न्ह्याथे जूसां ज्यू।
यूहन्नां थज्याःगु शिक्षाया विरोध यानाः येशू ख्रीष्ट धात्थेंयाम्ह मनू हे खः धकाः बांलाक ध्वाथुइका तःगु दु। अले येशूयात विश्वास याइपिं व परमेश्वरयात माया याइपिं मनूतय्सं थःथवय् नं माया याना च्वनेमाः धकाः बः बियातःगु दु।
थ्व पौ ई.स. ९० पाखे च्वःगु खः। यूहन्नाया सुसमाचार च्वःम्ह प्रभु येशूया चेला यूहन्नां हे थ्व पौ च्वःगु खः। व प्रभु येशूयात खंम्ह, थ्यूम्ह व वय्कःया सः न्यंम्ह चेला खः। थ्व पौ च्वःगु इलय् व बुह्रा जूइ धुंकूगु खः। अथेजूया वं थ्व पतिइ चेलातय्त मस्तय्त थें धयाच्वंगु दु।
धलः पौ
न्ह्यखँ ............................................. १:१-४
जः व खिउँ ..................................... १:५–२:२९
परमेश्वरया मस्त व शैतानया मस्त ....... ३:१-२४
सत्य व द्वंबिद्वं .................................. ४:१-६
माया यायेगु ..................................... ४:७-२१
विश्वासं त्याकेगु ............................... ५:१-२१
१ यूहन्ना
1
जीवन बीगु वचन
1 न्हापांनिसें जीवन बीगु वचन दु। थ्व हे वचनया बारे जिमिसं च्वयाच्वनागु दु। थ्व हे वचन जिमिसं न्यनागु नं दु। जिमिगु हे मिखां खनागु नं दु, बांलाक स्वयागु नं दु, ल्हातं थियागु नं दु।*१:१ यूह १:१ 2 गुबले थ्व वचन जीवन जुयाः जिमिथाय् खनेदय्कः झाल, उबलय् थ्व जीवनयात जिमिसं खना, जिमिसं साक्षी बी, अले छिमित नं धाये। थ्व बाःयाके दुगु अनन्त जीवन जिमिथाय् खनेदय्कः झाल।*१:२ यूह १:१४ 3 जिमिसं न्यनागु व खनागु फुक्कं न्यंकागु दु। जिमिगु संगति बाः नाप व परमेश्वरया काय् येशू ख्रीष्ट नाप दुगुलिं छिमिसं नं जिपिं नाप संगति याये फयेमा धकाः थथे धयाच्वनागु खः। 4 थथे जिमिसं छिमित च्वयाः कना च्वने दुगुलिं जिपिं तसकं लय्ताः।
परमेश्वर जः खः
5 परमेश्वरया काय्नं बियादीगु शिक्षा हे जिमिसं छिमित बियाच्वना। परमेश्वर जः खः। वय्कःयाके खिउँ हे मदु। 6 झी वय्कःयागु संगतिइ दु धयाः खिउँगुलिइ तुं च्वनाच्वन धाःसा झीपिं ज्याखँ निताय् नं फताहा जुइ। 7 वय्कः जः जूथें, झीपिं नं जलय् च्वनाच्वन धाःसा छम्ह मेम्हनापं संगतिइ जुइ, अले परमेश्वरया काय्यागु हिं झीगु दक्व पाप पाखें शुद्ध यानादी।
8 झीसं “झीके पाप मदु” धकाः धाःसा झीसं थःपिन्त हे ध्वखा ब्यूगु जुइ, अले सत्ययात मानय् मयाःगु जुइ। 9 अय्नं झीसं थःगु पाप मानय् यात धाःसा परमेश्वरं झीगु पाप क्षमा यानादी, अले झीगु मनय् च्वंगु फुक्क पाप नं च्वत्तुक हुयादी, छाय्धाःसा वय्कः भरोसा याये बहःम्ह व धर्मीम्ह खः। 10 “झीसं गुबलें हे पाप मयाना” धकाः धाल धाःसा झीसं परमेश्वरयात फताहा याःगु जुइ। अले वय्कःयागु वचन झीके दइ मखु।