2
येशू झीत ग्वाहालि याइम्ह खः
1 आय् जि यःपिं मस्त, छिपिं ला जिम्ह मस्त थें खः। छिमिसं पाप याये मते धकाः थ्व खँ जिं च्वयाच्वनागु खः। छुं जुयाः छिमिसं पाप याये लात धाःसा निरास जुइ मते, छाय्धाःसा झीत ग्वाहालि याइम्ह येशू ख्रीष्टं बाःया न्ह्यःने झीगु निंतिं बिन्ति यानादी। 2 झीगु पापयागु निंतिं जक मखु, संसारय् च्वंपिं फुक्क मनूतय्गु पापया निंतिं वय्कः बलिदान जुयादीगु खः।
3 परमेश्वरयागु आज्ञा मानय् याना च्वंसा जक वय्कःयात बांलाक म्हस्यू धकाः झीसं धाये फइ। 4 परमेश्वरयात बांलाक म्हस्यू धकाः धयाः वय्कःयागु आज्ञा मानय् याना मजूम्ह मनू फताहा खः। वयाके सत्य धयागु हे दइ मखु। 5 परमेश्वरयागु वचन मानय् याना च्वंम्ह मनू जक धात्थें परमेश्वरया मायां जाःम्ह जुइ। थुकिं हे झीपिं परमेश्वरया मनू खः धकाः सी दइ। 6 परमेश्वरया मनू खः धकाः धया जुइम्ह मनुखं येशू ख्रीष्ट थें जुइ फय्के माः।
न्हूगु आज्ञा
7 यःपिं दाजुकिजापिं, जिं छिमित च्वयाच्वनागु थ्व आज्ञा न्हूगु मखु, पुलांगु हे खः। थ्व आज्ञा परमेश्वरयात विश्वास याःबलय्निसें छिमित न्यंकूगु खः, आः नं न्यनाच्वंगु हे दु।* २:७ यूह १३:३४ 8 अय्नं थन धाःसा जिं छिमित छगू न्हूगु हे आज्ञा च्वयाच्वनागु दु। थ्व सत्य खः धकाः ख्रीष्ट पाखें हे सी दःवःगु दु, छाय्धाःसा खिउँ तना वनाच्वंगु दु, अले धात्थेंगु जः लुयावःगु दु।
9 ख्रीष्टं जिगु नुगः यचुक सिलादीगु दु धकाः धया जुइम्ह मनुखं दाजुकिजापिन्त हेला यानाच्वन धाःसा आः तक नं वयागु नुगः हाकुसे हे च्वं नि। 10 दाजुकिजापिन्त माया याना जुइम्ह मनूयागु नुगः ख्रीष्टं यचुकादीगु दु धकाः सी दु, उकिं वयागु नुगलय् हाकु धयागु हे दये फइ मखु। अय्जूगुलिं वं सुयातं पाप याकी मखु। 11 अय्नं दाजुकिजापिन्त हेला याना जुइम्ह मनू खिउँथाय् लाइ। अले खिउँथाय् हे जुइ। वं थः गन वनाच्वना धकाः सी मखु, छाय्धाःसा वयागु मिखा खिउँगुलिं कां जुइ।
12 आय् जि यःपिं मस्त,
ख्रीष्टयागु नामं यानाः
छिमिसं याःगु फुक्क पाप
परमेश्वरं क्षमा यानादिल।
13 जिं बौपिन्त नं थ्व खँ
च्वयाच्वनागु खः,
छाय्धाःसा छिमिसं
न्हापांनिसें दीम्ह
ख्रीष्टयात बांलाक म्हस्यू।
शैतानयात त्याके धुंकूपिं
ल्याय्म्ह व ल्यासेपिन्त नं
जिं थ्व खँ च्वयाच्वना।
14 मस्तय्सं नं झी परमेश्वर
बाःयात म्हस्यूगुलिं छिमित नं
जिं थ्व खँ च्वयाच्वनागु खः।
बौपिन्सं न्हापांनिसें दुम्ह परमेश्वर
बाःयात म्हस्यूगुलिं
जिं थ्व खँ च्वयाच्वना।
बल्लाःपिं ल्याय्म्ह व ल्यासेपिं,
छिमिगु नुगः परमेश्वरयागु
वचनं जाया च्वंगु दु।
उकिं छिमिसं शैतानयात
त्याके फत।
उकिं जिं छिमित नं
च्वयाच्वनागु दु।
संसारयात माया याये मते
15 थ्व संसारयात माया याये मते। थ्व संसारय् च्वंगु चिजबिजयात नं ल्वःवंके मते। संसारयात माया याना जुइम्ह मनुखं परमेश्वरयात माया याइ मखु। 16 थ्व संसारय् च्वंगु फुक्क ज्याखँ गथे बांमलाःगु मभिंगु ज्याखँ याये मास्ति वय्केगु, मिखां खंक्व काये मास्ति वय्केगु, अले तःधंछुयाः फुइँफाँय् याना जुइगु। थ्व फुक्क परमेश्वर बाःया पाखें मखु, संसारया पाखें हे दया वःगु खः। 17 थ्व संसार व थ्व संसारय् च्वंगु मनूतय्सं यय्का जुइगु नं फुक्कं मदया वनीतिनि। तर परमेश्वरयागु इच्छाकथं जुइम्ह मनू न्ह्याबलें दयाच्वनी।
ख्रीष्टया शत्रु
२ थेसलोनिकी २:१-१२
18 अय् जि यःपिं मस्त, थ्व संसार याकनं हे फुना वनिन। ख्रीष्टया शत्रु वइतिनि धकाः छिमिसं न्यना तःगु दु। ख्रीष्टया शत्रुत खने दया वये धुंकल। अय्जूगुलिं थ्व संसार याकनं हे फुना वनिन धकाः झीसं सीके फु। 19 इपिं झीगु पुचलं पिहां वने धुंकल, छाय्धाःसा इपिं झी मनूत मखु। इपिं झी मनूत खःसा झीपिं नाप हे च्वनिगु खः। झीगु पुचलं पिहां वंगुलिं इपिं झी मनूत मखु धकाः सी दत।
20 ख्रीष्टं छिमित पवित्र आत्मा बियादीगु दु, उकिं छिपिं थुपिं थें मखु। अय्जूगुलिं सत्य छु खः धयागु छिमिसं स्यू। 21 छिमिसं सत्ययात मस्यू धकाः जिं थ्व च्वया च्वनागु मखु। सत्ययात स्यूगुलिं हे जिं थ्व च्वयाच्वनागु खः, छाय्धाःसा सत्य पाखें मखुगु खँ पिहां वइ मखु धकाः छिमिसं सि हे स्यू। 22 अय्सा मखुगु खँ ल्हाना जुइम्ह सु खः ले सा? येशू धाःम्ह मुक्ति बीम्ह ख्रीष्ट मखु धकाः धया जुइम्ह मनू हे मखुगु खँ ल्हाइम्ह खः। थज्याःम्ह मनू ख्रीष्टया शत्रु खः। थज्याःम्ह मनुखं परमेश्वर बाः व वय्कःया काय् निम्हय्सितं इन्कार याइ। 23 परमेश्वरया काय्यात मानय् मयाइम्ह मनुखं परमेश्वर बाःयात नं मानय् याइ मखु। अले वय्कःया काय्यात मानय् याइम्ह मनुखं परमेश्वर बाःयात नं मानय् याइ।
24 अय्जूगुलिं छिमिसं न्हापांनिसें न्यना तःगु परमेश्वरयागु वचनयात दुनुगलय् तया ति। अथे याःसा छिपिं परमेश्वर बाः व परमेश्वरया काय् नाप च्वने दइ। 25 ख्रीष्टं झीत बी धकाः धयादीगु अनन्त जीवन थ्व हे खः।
26 थज्याःपिं ख्रीष्टया शत्रुतय्सं छिमित मखुगु लँय् यंकी धकाः कनाबीत थ्व खँ च्वयाच्वनागु खः। 27 अय्नं ख्रीष्टं छिमिगु नुगलय् पवित्र आत्मायात तयादीगु दु, उकिं सुनानं छिमित स्यने माःगु मदु। पवित्र आत्मां छिमित फुक्कं स्यनादी। वय्कः सत्य खः, गुबलें मखुगु खँ ल्हानादी मखु। पवित्र आत्मां गथे स्यनादिल, अथे हे यानाः छिपिं ख्रीष्ट नाप च्वना च्वँ।
28 अय् जि यःपिं मस्त, ख्रीष्ट नाप च्वना च्वँ। अले जक ख्रीष्ट हानं थन झायादीबलय् झीपिं ग्याये माली मखु, अले वय्कः खनाः लज्या चाये माली मखु।
29 ख्रीष्ट भिंम्ह खः धकाः छिमिसं स्यू। अय्जूगुलिं छिमिसं भिंगु बांलाःगु जक याना जुइपिं मनूत परमेश्वरया सन्तान खः धकाः सीका ति।