1 संसार फुना वनिगु इलय्‌ तसकं दुःख जुइ धकाः सीका ति। 2 अबलय्‌यापिं मनूत थःत जक भिंका जुइपिं, धिबायागु लोभ याना जुइपिं, तःधंछुया जुइपिं, घमण्‍ड याना जुइपिं, कर्पिन्‍त क्‍वह्यंका जुइपिं, मांबौयागु खँ मन्‍यनीपिं, गुन मस्यूपिं, परमेश्वरयात वास्ता मयाःपिं, 3 दया माया याये मसःपिं, क्षमा याइ मखुपिं, मेपिन्‍त मभिंकाः खँ ल्‍हाः जुइपिं, थःत कःघाये मफुपिं, नुगः छाःपिं, भिंगु खँ मयय्‌कीपिं, 4 मुले तयाः गः कीपिं, थः यःथें सना जुइपिं, जि हे खः धया जुइपिं, परमेश्वर म्‍वाःपिं, मोजमज्‍जा जक याये दःसा गाःपिं, 5 पिनें परमेश्वरयात मानय्‌ याना जुइपिं, दुनुगलं धाःसा वय्‌कःयागु शक्तियात मानय्‌ मयाइपिं जुइ। थुपिं लिसे जुइ मते।

6 इपिं मध्‍ये गुलिसिनं ला छेँय्‌ छेँय्‌ वनाः पापं जाःपिं व पापयागु खँ मतिइ तया जुइपिं मिसातय्‌त ल्‍हातय्‌ काइ। 7 थ्‍व मिसातय्‌सं स्‍यनाः सय्‌का कायेत यक्‍व स्‍वइ। अय्‌नं सत्‍य छु खः धकाः गुब्‍सं सीके फइ मखु। 8 यान्‍नेस व याम्‍ब्रेसं मोशायात मभिंका जू थें इमिसं नं सत्‍य खँयात मभिंका जुइ। इमिगु बुद्धि स्‍यने धुंकल, अले इमिके विश्वास हे मदये धुंकल।*३:८ प्रस ७:११ 9 इपिं ताः च्‍वनी मखु, छाय्‌धाःसा यान्‍नेस व याम्‍ब्रेसयागु थें इमिगु मूर्ख ज्‍या नं मनूतय्‌सं सीकी।

10 छं जिं स्‍यनेकने यानागु, जिगु चालचलन, जिगु लक्ष्य, जिगु विश्वास, जिं गथे सह याना च्‍वना, जिं गुलि माया याना च्‍वना, 11 जितः गुलि दुःखकष्‍ट बिल, जिं गुलि सास्‍ति नये माल, एन्‍टिओखियाय्‌, आइकोनियनय्‌ अले लुस्‍त्राय्‌ जितः छु छु जुल धयागु फुक्‍कं छं स्‍यू। गज्‍याः गज्‍याःगु दुःखकष्‍ट जिं फये माल अले प्रभुं फुक्‍क दुःखकष्‍टं जितः बचय्‌ याना तयादिल।*३:११ प्रे १३:१४-५२; १४:१-७,८-२० 12 ख्रीष्‍ट येशूयात मानय्‌ यानाः वय्‌कलं धाःथें च्‍वनिपिन्‍त ला थथे दुःखकष्‍ट जू हे वइ। 13 मभिंपिं व थकाहाः मनूतय्‌सं कर्पिन्‍त थगय्‌ यायां थःत हे थगय्‌ याका च्‍वने माली। अले थुपिं झन झन स्‍यना वनी।

14 छं जक थ्‍व खँ सुया पाखें स्‍यना कयागु खः, व सीकाः थःम्‍हं सय्‌कागु व विश्वास यानागु खँय्‌ जुया च्‍वँ। 15 मचांनिसें हे छं धर्मशास्‍त्रयागु खँ सीकातःगु दु। थुकिं हे छन्‍त ख्रीष्‍ट येशूयात विश्वास यानाः दइगु मुक्तियागु खँ थुइके फय्‌का बी। 16 परमेश्वरं बियादीगु धर्मशास्‍त्रयागु फुक्‍क खं स्‍यनेकने यायेत, न्‍वायेत, द्वंगु भिंकेत व खः कथं म्‍वायेत तिबः बी। 17 परमेश्वरया मनूतय्‌सं न्‍ह्याथें ज्‍याःगु भिंगु ज्‍याखँ नं याये फये मा धकाः धर्मशास्‍त्र बियातःगु खः।