1 अनंलि झीपिं फहिलाः बाशानपाखे वना। एद्रईलय् बाशानया जुजु ओग व वया सेना झीपिंलिसें ल्‍वायेत वल। 2 परमप्रभुं जितः धयादिल, “व खनाः ग्‍याये मते, छाय्‌धाःसा वयात, वया फुक्‍क सेना व देशनापं छिमिगु ल्‍हातय् बियागु दु। छिमिसं हेश्‍बोनय् राज्‍य याइम्‍ह एमोरीतय् जुजु सीहोनयात गथे यानागु खः वयात नं अथे हे या।”

3 थुकथं परमप्रभु झी परमेश्‍वरं बाशानया जुजु ओग व वया फुक्‍क सेनायात झीगु ल्‍हातय् बियादिल। झीसं छम्‍हय्‌सित नं मत्‍वःतुसें सकसितं स्‍यानाबिया। 4 उबलय् हे झीसं बाशानय् ओगया राज्‍य अर्गोबया फुक्‍क लागानापं इमि फुक्‍क खुइगू शहर त्‍याकाकया। झीसं छगू शहर नं मत्‍वःता। 5 थुपिं फुक्‍क शहरय् ततःजाःगु पःखाः ग्‍वयातःगु दु। अले शहरया मू ध्‍वाखाय् खगः दु। अन पःखाः ग्‍वयामतःगु यक्‍व गां नं दु। 6 हेश्‍बोनया जुजु सीहोनयात नाश यानागु थें इमि फुक्‍क शहर, मिजं मिस्‍त व मस्‍तय्‌त भज्‍यंक नाश यानाबिया। 7 अय्‌नं फुक्‍क पशुत व शहरय्‌ लुतय्‌ यानागु धनसम्‍पत्ति झीसं थःगु निंतिं कया।

8 उबलय् झीसं थुपिं निम्‍ह एमोरी जुजुतय्‌गु ल्‍हातिं अर्नोन खुसिया न्‍हसिकापंनिसें हेर्मोन पर्वत तक यर्दनया पुर्बपाखेया देश कया। 9 (हेर्मोनयात सीदोनीतय्‌सं सिरिओन व एमोरीतय्‌सं सेनीर धाइगु।) 10 तःजाःगु माथंवंगु थासय् लाःगु फुक्‍क शहर, गिलाद व बाशान अले बाशानय् दुगु ओगया देशयागु सलका व एद्रई शहर तक हे झीसं फुक्‍क कयाः। 11 (रपाईतय् दकलय् लिपांम्‍ह मनू बाशानया जुजु ओग खः। वयागु नँयागु खाताया हाकः गुंगू कु अले ब्‍या प्‍यंगू कु दु। व खाता*३:११खाता ४ मिटर ति हाकः दुगु व १.८ मिटर ति ब्‍या दुगु खाता खः आः तक नं अम्‍मोनीतय्‌गु शहर रब्‍बाय् दनि।)

12 उबलय् झीसं व देश त्‍याकाकयाबलय् अर्नोन खुसियागु न्‍हसिकाप च्‍वसं दुगु अरोएरंनिसें कयाः गिलाद पर्वतया बच्‍छि ब्‍व व उकिया शहर जिं रूबेनी व गादीतय्‌त बिया। 13 गिलादया ल्‍यं दुगु ब्‍व, अले ओगं राज्‍य यानाच्‍वंगु फुक्‍क बाशान जिं मनश्‍शेया बच्‍छि कुलयात बिया। (बाशानय् दुगु अर्गोबया फुक्‍क लागायात रपाईतय्‌गु देश धाइगु खः।) 14 मनश्‍शेया सन्‍तान याईरं गशूरीतय्‌गु व माकातीतय्‌गु सिमाना तक अर्गोबया फुक्‍क लागा कयाः उकियात थःगु हे नां बिल। अथे जुयाः थौं तक नं बाशानयात हब्‍बात-याईर†३:१४हब्‍बात-याईर याईरय् च्‍वंपिं मनूत धाइगु। 15 माकीरयात जिं गिलाद बिया। 16 जिं रूबेनी व गादीतय्‌त गिलादंनिसें अर्नोन खुसि तक (खुसिया दथु अम्‍मोनीतय् दच्‍छिन सिमाना खः) अले उत्तरय् अम्‍मोनीतय्‌गु सिमाना यब्‍बोक खुसि तक बिया। 17 उकियागु पच्‍छिमी सिमाना उत्तरय् किन्‍नरेत‡३:१७किन्‍नरेत गालील समुद्रया मेगु नां खः समुद्रंनिसें दच्‍छिनय् पिसगाया पाःचा क्‍वय् च्‍वंगु खारा समुद्र तक§३:१७ खारा समुद्र मृत सागर तक यर्दन खुसि खः।

18 उबलय् जिं यर्दन पुर्ब च्‍वनाच्‍वनिपिन्‍त*३:१८ यर्दन पुर्ब च्‍वनाच्‍वनिपिन्‍त रूबेनी, गादी, व मनश्‍शेया बच्‍छि कुल धकाः धाइ थ्‍व आज्ञा बिया, “परमप्रभु छिमि परमेश्‍वरं थ्‍व देश छिमित अधिकार यायेत बियादीगु खः। अय्‌नं छिमि सकलें सेना ल्‍वाभः ज्‍वनाः थः इस्राएली दाजुकिजातय्‌गु न्‍ह्यःने न्‍ह्यःने वनेमाः।✡३:१८ यहो १:१२-१५ 19 अय्‌नं छिमि कलाःपिं, मस्‍त व पशुत जिं छिमित बियागु शहरय् हे च्‍वनी। (छिमिके यक्‍व पशुत दु धकाः जिं स्‍यू।) 20 परमप्रभुं छिमित थें छिमि दाजुकिजापिन्‍त आराम बियामदीतले अले इमिसं नं परमप्रभु छिमि परमेश्‍वरं यर्दन पच्‍छिमय् इमित बियादीगु जमिन अधिकार मयातले छिमिसं थथे या। अनंलि जिं छिमिगु अधिकारय् बियागु देशय् फुक्‍क मिजंत लिहां वये फइ।”

21 उबलय् जिं यहोशूयात थ्‍व आज्ञा बिया, “परमप्रभु छिमि परमेश्‍वरं थुपिं निम्‍ह जुजुयात छु यानादिल व फुक्‍क छं थःगु हे मिखां खंगु दु। छिपिं खुसिया पच्‍छिमय् वनीबलय् उपिं फुक्‍क देशतय्‌त नं परमप्रभुं अथे हे यानादी। 22 इपिं खनाः ग्‍याये मते, छाय्‌धाःसा परमप्रभु छिमि परमेश्‍वर छिमिगु निंतिं ल्‍वानादी।”

23 उबलय् जिं परमप्रभुयात थथे धकाः बिन्‍ति याना,✡३:२३ गन्‍ती २७:१२-१४; व्‍य ३२:४८-५२ 24 “परमप्रभु परमेश्‍वर छिं थः दासयात थःगु महिमा व बल क्‍यनादीत्‍यंगु दु। स्‍वर्ग व पृथ्‍वीइ छिं यानादीगु थें ज्‍याःगु ज्‍या व शक्ति क्‍यनेफुम्‍ह सु द्यः दु धकाः? 25 यर्दनया उखेपाखे च्‍वंगु भिंगु देश, न्‍ह्याइपुसे च्‍वंगु पर्वतया देश व लेबनान स्‍वयेत जितः उखे वनेबियादिसँ।”

26 अय्‌नं छिमिसं यानाः परमप्रभु जिलिसें तंचायाः जिगु खँ न्‍यनामदी। परमप्रभुं जितः धयादिल, “गात! आः थुकिया बारे जिनापं मेगु खँ ल्‍हाये मते! 27 पिसगाया च्‍वकाय् हुँ अले पुर्ब, पच्‍छिम, उत्तर, दच्‍छिन प्‍यखेरं स्‍व। थःगु हे मिखां व देशयात स्‍व। छाय्‌धाःसा छ यर्दनया उखे वने खनी मखु। 28 अय्‌नं यहोशूयात आज्ञा ब्‍यु, वयात हःपाः बियाः बल्‍लाकि, छाय्‌धाःसा वं हे छं खंगु देश अधिकारय् हयेत थुपिं मनूतय्‌त यर्दन खुसिया उखे यंकी।” 29 अथे जुयाः झीपिं बेथ-पोरया न्‍ह्यःनेयागु ब्‍यासिइ च्‍वना।