1 अले परमप्रभुं मोशायात धयादिल, “मेगु छगू महामारी जिं फारो व मिश्रय्‌ हये। अनंलिपा वं छिमित थनं वने बी। वं छिमित धात्‍थें हे थनं पितिनाछ्वइ। 2 मिजंत व मिसात फुक्‍कसित थः जःलाखःलापिन्‍के लुँ व वहःया तिसा फ्‍वँ धा।” 3 परमप्रभुं मिश्रीतय्‌त इस्राएलीप्रति बांलाःगु व्‍यवहार याइपिं यानादिल। अले मोशा फारोया भारदारतय्‌गु व मिश्रीतय्‌गु मिखाय्‌ तःधंम्‍ह मनू जूगु जुल।

4 वने न्‍ह्‍यः मोशां फारोयात धाल, “परमप्रभुं थथे धयादी, ‘बाचा इलय्‌ जि मिश्र देसय्‌ जुयाः वने। 5 मिश्रय्‌ न्‍हापां बूपिं काय्‌पिं फुक्‍कं सी। गद्दीइ च्‍वनिम्‍ह फारोया न्‍हापां बूम्‍ह काय्‌निसें घः क्‍यलिम्‍ह दासी मिसाया न्‍हापां बूम्‍ह काय्‌ तकं। अले पशुतय्‌ तकं न्‍हापां बूपिं दक्‍वं सी।†११:५ प्रस ४:२३ 6 मिश्र देय्‌ न्‍यंक हाहाकार जुइ। थुबलय्‌ थें न्‍हापा गुबलें जूगु मदु, लिपा गुबलें जुइ नं मखु। 7 इस्राएलीतय्‌गु दथुइ शान्‍त जुइ। खिचा छम्‍ह नं उइ मखु।’ थुकिं छिमिसं परमप्रभुं इस्राएलीत व मिश्रीतय्‌त पाकादी धकाः सी। 8 अले छिमि फुक्‍क भारदारत वयाः जितः भागि यानाः धाइ, ‘छिगु ल्‍यू ल्‍यू जुइपिं फुक्‍कसित ब्‍वनाः छि थनं पिहां झासँ।’ अले जि थनं पिहां वने।” अनंलि मोशा तसकं तं पिकयाः फारोयाथासं वन।

9 परमप्रभुं मोशायात धयादीगु दु, “मिश्रय्‌ जिं थःगु अजूचायापुगु ज्‍या झन अप्‍वः याये फय्‌केत फारोनं छंगु खँ न्‍यनी मखु।” 10 मोशा व हारुनं फारोया न्‍ह्यःने थज्‍याःगु अजूचायापुगु ज्‍या फुक्‍क यानाक्‍यन, अय्‌नं परमप्रभुं फारोया नुगः छाय्‌कादिल। अले वं इमित थःगु देसं वने मबिल।