1 मिश्र देसय्‌ परमप्रभुं मोशा व हारूनयात धयादिल,*१२:१-२ लेवी २३:५; गन्‍ती ९:१-५; २८:१६; व्‍य १६:१-२ 2 “थ्‍व ला छिमिगु निंतिं न्‍हापांगु ला, दँया न्‍हापांगु ला जुइ। 3 इस्राएलीतय्‌ फुक्‍क मनूतय्‌त थथे धा – थ्‍व लाया झिन्‍हु दुखुन्‍हु छिपिं फुक्‍कसिनं थथःगु परिवारया निंतिं छम्‍ह छम्‍ह भ्‍याःचा हयेमाः। 4 सुयागु परिवारय्‌ छम्‍ह भ्‍याःचा नयेत मनूत म्‍हो जूसा वं थः छेँया सतिक च्‍वंम्‍ह जःलाखःलालिसे मिलय्‌ जुयाः मनूतय्‌गु ल्‍याःकथं भ्‍याःचा हयेमाः। सुनां गुलि नयेफु, व हे ल्‍याखं ग्‍वःम्‍ह भ्‍याःचा माः क्‍वःछ्यु। 5 भ्‍याःचा ल्‍ययेबलय्‌ छिमिसं खुं मदुम्‍ह, दच्‍छि दुम्‍ह मिजंम्‍ह भ्‍याःचा ल्‍ययेमाः। च्‍वलेचा व फैचाया दथुं ल्‍ययेमाः।

6 “लाया झिंप्‍यन्‍हुखुन्‍हुतक भ्‍याःचायात बांलाक बिचाः यानाः ति। थ्‍वखुन्‍हु हे इस्राएलया फुक्‍क मनूत जानाः सन्‍ध्‍याकाः इलय्‌ भ्‍याःचायात स्‍यायेमाः। 7 अले भ्‍याःचाया हि कयाः भ्‍वय्‌ नइगु छेँया लुखाया जवंखवं व फुसय्‌ इलाबीमाः। 8 उखुन्‍हु हे चान्‍हय्‌ छिमिसं भ्‍याःचाया ला मिइ छुयाः खायुगु वाउँचा व सोडा मतःगु मरिनापं नयेमाः। 9 लायात कचिकं नयेमते, अले लखय्‌ दय्‌काः नं नयेमते। छ्यं तुति, म्‍ह दुने च्‍वंगु ला फुक्‍कं मिइ छुयाः न। 10 सुथय्‌ जुइ न्‍ह्यः ला फुक्‍कं फुकेमाः, ला ल्‍यं दुसा व ला फुक्‍कं मिइ छ्वय्‌काछ्वयेमाः।

11 “छिमिसं थ्‍व ला नयेबलय्‌ छिमिगु जँय्‌ जँनी, तुतिइ लाकां व ल्‍हातिइ कथि दयेमाः। अले व हथासं नयेमाः। थ्‍व हे परमप्रभुया छुत्‍काराया नखः खः।

12 “उखुन्‍हु हे चान्‍हय्‌ जि मिश्र जुयाः वने। अले मिश्रया न्‍हापां बूपिं मनूत व पशुत फुक्‍कं स्‍याना बी। मिश्रया फुक्‍क द्यःतय्‌त सजाँय बी। जि परमप्रभु खः। 13 हि इलातःगु छेँ छिपिं च्‍वनाच्‍वंगु छेँया चिं जुइ। व स्‍वयाः जिं छिमित त्‍वःता बी। जिं मिश्र देसयापिं मनूतय्‌त स्‍याइबलय्‌ छिमित छुं जुइ मखु।”

14 “थ्‍व दिं छिमिगु निंतिं लुमन्‍तिया दिं जुइ। थ्‍व खुन्‍हु छिमिसं परमप्रभुया नखः हनेमाः। थ्‍व छिमित पुस्‍तां पुस्‍ता तकया निंतिं नियम जुल।*१२:१४-२० प्रस २३:१५; ३४:१८; लेवी २३:६-८; गन्‍ती २८:१७-२५; व्‍य १६:३-८ 15 न्‍हय्‌न्‍हु तक छिमिसं सोडा मतःगु मरि नयेमाः। न्‍हापांगु दिंखुन्‍हु छिमिसं थःथःगु छेँनं सोडा वांछ्वयेमाः। सुनानं थ्‍व न्‍हय्‌न्‍हुया दुने सोडा तयातःगु छुं नं नल धाःसा वयात इस्राएली मनूत पाखें पितिना छ्वःगु जुइ। 16 न्‍हापांगु दिंखुन्‍हु व न्‍हय्‌न्‍हुखुन्‍हु परमप्रभुया आराधना यायेत मुंज्‍या या। उखुन्‍हु छिमिसं नसात्‍वँसा दय्‌केगु ज्‍या त्‍वःताः मेगु छुं हे ज्‍या याये मते।

17 “छिमिसं सोडा मतःगु मरिया नखः हँ। छाय्‌धाःसा थ्‍वखुन्‍हु हे जिं छिमित पुचः पुचः यानाः मिश्रं पितहयागु खः। लिपा वइगु पुस्‍तायात तकं सदांया नियम कथं थ्‍व दिंयात हनेगु या। 18 न्‍हापांगु लाया झिंप्‍यन्‍हुखुन्‍हुया बहनिनिसें नीछन्‍हुखुन्‍हुया बहनितक सोडा मतःगु मरि न। 19 न्‍हय्‌न्‍हु तक छिमिगु छेँय्‌ सोडा दुगु मरी मदयेमाः। सुनां नं सोडा दुगु छुं नल धाःसा इस्राएली जूसां विदेशी जूसां वयात इस्राएलं पितिनाछ्वइगु जुइ। 20 छिमिसं सोडा तयातःगु छुं नं नयेमते। छिमिसं न्‍ह्याथाय्‌ च्‍वंसां सोडा मतःगु मरि नयेमाः।”

21 अले मोशां इस्राएलया फुक्‍क थकालितय्‌त सःतके छ्वयाः धाल, “छिमिसं वनाः थः छेँजःपिनिगु निंतिं भ्‍याःचा ल्‍ययाः छुत्‍काराया नखःया निंतिं स्‍या।” 22 हिसप घाँयमायात प्‍वाँय्‌ चिनाः उकियात हिइ थुनाः लुखाया जवंखवं व फुसय्‌ इलाब्‍यु। छिपिं सुं नं थःपिनिगु छेँनं सुथय्‌ मजुतले पिहां वने दइमखु। 23 परमप्रभु मिश्रीतय्‌त स्‍यायेत मिश्र जुया झाइबलय्‌ गुगु लुखाया जवंखवं व फुसय्‌ हि इलातःगु खनि वय्‌कलं उगु लुखायात त्‍वःताः न्‍ह्यःज्‍यानादी। अले नाश यायेत छ्वयाहःम्‍हय्‌सित छिमित स्‍यायेत छिमिगु छेँय्‌ दुहां वने बीमखु।*१२:२३ हिब ११:२८

24 “छिमिसं थ्‍वयात थः व थः सन्‍तानया निंतिं न्‍ह्याबलेंया नियम कथं मानय्‌ या। 25 परमप्रभुं बी धयादीगु देसय्‌ दुहां वने धुंकाः नं छिमिसं थ्‍व नखः हँ। 26 छिमि काय्‌ म्‍ह्याय्‌पिन्‍सं छिमित ‘थ्‍व नखःया मतलब छु’ धकाः न्‍यन धाःसा 27 इमित धा, ‘थ्‍व परमप्रभुयात हनेत छुत्‍काराया पशु बां बीगु खः। वय्‌कलं मिश्रय्‌ न्‍हापां बूपिन्‍त स्‍याःबलय्‌ इस्राएलीतय्‌गु छेँय्‌ दुहां मवंसे झीत व झीगु छेँयात बचय्‌ यानादीगु खः।’ ” अले मनूतय्‌सं छ्यं क्‍वछुकाः आराधना यात।

28 अले इस्राएलीतय्‌सं परमप्रभुं मोशा व हारूनयात उजं बियादी थें हे यात।

29 चान्‍हय्‌सिया बाचा इलय्‌ सिंहासनय्‌ च्‍वंम्‍ह फारोया न्‍हापां बूम्‍ह काय्‌निसें झ्‍यालखानाय्‌ च्‍वंम्‍ह कैदीया न्‍हापां बूम्‍ह काय्‌ तकं, अले पशुतय्‌ न्‍हापां बूपिं फुक्‍कसित परमप्रभुं स्‍यानादिल।*१२:२९ प्रस ४:२२-२३ 30 मिश्र न्‍यंक तसकं हाहाकार जुल। फारो, वया भारदारत व मिश्रीत सकलें चान्‍हय्‌ दन, छाय्‌धाःसा अन मनू मसी धयागु छखा छेँ हे मदु।

31 फारोनं चान्‍हय्‌ हे मोशा व हारूनयात सःतके छ्वयाः धाल, “छिपिं व छिमि इस्राएलीत फुक्‍कं जिमिगु देसं पिहां हुँ। वनाः छिमिसं धाःकथं हे परमप्रभुया आराधना या। 32 छिमिसं धाःकथं हे थःपिनि फैच्‍वलय्‌, साद्वहं फुक्‍कं ज्‍वनाः हुँ। अले जितः नं आशिष ब्‍यु।”

33 अले मिश्रीतय्‌सं इस्राएलीतय्‌त थत्‍थें देस त्‍वःता ब्‍यु धकाः बिन्‍ति यात। इमिसं धाल, “मखुसा जिपिं फुक्‍कं सी।” 34 उकिं इस्राएलीतय्‌सं थःपिन्‍सं न्‍हायाच्‍वंगु छ्वचुं सोडा तये न्‍ह्यः हे थल नापं कापतय्‌ प्‍वःचिनाः ब्‍वहलय्‌ पाछाल। 35 इस्राएलीतय्‌सं मोशां धाः थें यात। इमिसं मिश्रीतय्‌के लुँ, वहः, तिसा व वसः फ्‍वन।*१२:३५-३६प्रस ३:२१-२२ 36 अले परमप्रभुं मिश्रीतय्‌त इस्राएलीतप्रति बांलाःगु व्‍यवहार याइपिं यानादिल। इमिसं छु छु फ्‍वनाः मिश्रीतय्‌सं दक्‍वं बिल। थुकथं इस्राएलीतय्‌सं मिश्रीतय्‌गु धन ज्‍वनाः वइ।

37 इस्राएलीत रामसेसंनिसें सुक्‍कोत तक न्‍यासि वन, मिस्‍त व मस्‍त त्‍वःताः खुगू लाख ति मनूत दु। 38 इपिं नापं मेपिं मनूत नं यक्‍व हे वन, अले यक्‍व साद्वहं, फैच्‍वलय्‌ नं वन। 39 इमिसं सोडा मतसे हे मिश्रं ज्‍वनावःगु न्‍हायातःगु छ्वचुंया मरि छुल। मिश्रं हथासं पितछ्वयाहःगुलिं इमिसं न्‍हायातःगु छ्वचुंया मरि दय्‌केमलाःगु खः।

40 इस्राएलीत मिश्रय्‌ च्‍वनाच्‍वंगु प्‍यसः व स्‍विदँ दयेधुंकल।*१२:४० उत १५:१३; गला ३:१७ 41 प्‍यसः व स्‍विदँ लिपा उखुन्‍हु हे परमप्रभुया फुक्‍क मनूतय्‌सं मिश्र देस त्‍वःतल। 42 उखुन्‍हु चान्‍हय्‌ हे परमप्रभुं इस्राएलीतय्‌त मिश्र देसं पित हयात्‍यन थःगु बचं पूवंकादिल। उकिं व चा वय्‌कःया निंतिं हनेमाः। थ्‍व परमप्रभुयागु चा खः। थुकियात पुस्‍तां पुस्‍ता तक इस्राएलीतय्‌सं हनेमाः।

43 परमप्रभुं मोशा व हारूनयात धयादिल, “छुत्‍काराया नखःया विधि थुकथं दु -- सुं विदेशीं थ्‍व नखःया भ्‍वय्‌ नये मज्‍यू। 44 न्‍यानाहःम्‍ह दासं धाःसा म्‍हय्‌ चिं तये धुंकाः नयेफु। 45 अय्‌नं विदेशीं व ज्‍यामितय्‌सं थ्‍व भ्‍वय्‌ नयेदइमखु।

46 “भ्‍वय्‌ ज्‍वरय्‌ याःगु थासय्‌ हे व फुक्‍क नयाः सिधय्‌के माः। व छेँनं ला छकू नं पित हय्‌ मज्‍यू। व भ्‍वय्‌या निंतिं स्‍याःम्‍ह पशुया क्‍वँय्‌ छकू नं त्‍वःथुले मज्‍यू।*१२:४६ गन्‍ती ९:१२; यूह १९:३६ 47 इस्राएलया फुक्‍क मनूतय्‌सं थ्‍व नखः हनेमाः।

48 “छिपिं नापं च्‍वनाच्‍वंपिं पिनेयापिं मनूतय्‌सं परमप्रभुया छुत्‍काराया नखः हनेगु मनंतुन धाःसा इमि फुक्‍क मिजं मनूतय्‌सं म्‍हय्‌ चिं तयेमाः। अले इमिसं नं अन हे बूपिन्‍सं थें नखः हने फइ। म्‍हय्‌ चिं मतःपिन्‍सं थ्‍व भ्‍वय्‌ नयेदइमखु। 49 नियम धाःसा अन हे बूपिं व पिनें वयाच्‍वंपिं निखलःयात नं छगू हे जुइ।”

50 परमप्रभुं मोशा व हारूनयात उजं बियादी थें इस्राएलीतय्‌सं यात। 51 परमप्रभुं उखुन्‍हु हे इस्राएलीतय्‌त इमिगु पुचः पुचः यानाः मिश्रदेशं पितहयादिल।