16
मरुभूमिइ “मन्न” बियादीगु
1 सकल इस्राएली मनूत एलीमं न्यासि वन। मिश्र त्वःतूगु निगूगु लाया झिंन्यान्हुखुन्हु इपिं एलीम व सीनैया दथुइ लाःगु सीनया मरुभूमिइ थ्यंकल। 2 सकल इस्राएलीतय्सं अन मोशा व हारूनयात कच्कच् यात।
3 इमिसं थथे धाल, “जिमित परमप्रभुं मिश्रय् हे स्यानादीगु जूसा ला ज्यूगु नि। मिश्रय् दुबलय् जिमिसं ला व मरि प्वाजाय्क नये दु। जिपिं फुक्कसित नयेमखंक स्यायेत छिकपिन्सं जिमित थ्व हे मरुभूमिइ छाय् हयादियागु?”
4 अले परमप्रभुं मोशायात धयादिल, “स्व, जिं छिमिगु निंतिं स्वर्गं मरि गाय्काहये। मनूतय्सं न्हियान्हिथं पिने वनाः उखुन्हुयात थःत माक्व नसा मुने माः। थुकथं इपिं जिं धया कथं जुइ कि मजुइ धकाः जिं स्वये।*१६:४ यूह ६:३१ 5 खुन्हुया दिइ इमिसं मेबलय् स्वयाः निदुगं अप्वः हयाः ज्वरय् याये माः।”
6 अले मोशा व हारुनं इस्राएलीत फुक्कसित धाल, “बहनी छिमिसं छिमित मिश्रं पितहयादीम्ह परमप्रभु हे खः धकाः सी। 7 अले सुथय् छिमिसं परमप्रभुया महिमा खनी, छाय्धाःसा परमप्रभुयागु विरोधय् छिमिसं याःगु कच्कच् वय्कलं न्यनादीगु दु। जिपिं सु खः धकाः छिमिसं जिमित कच्कच् यायेत?” 8 मोशां हानं धाल, “परमप्रभुं छिमित बहनिइ नयेत ला व सुथय् माक्व नसा बीबलय् छिमिसं थ्व फुक्क वय्कलं यानाच्वंगु खः धकाः सी। छाय्धाःसा वय्कलं छिमिसं वय्कःया विरोधय् याःगु कच्कच् न्यनादीगु दु। छिमिसं जिमिगु विरोधय् मखु, बरु परमप्रभुया विरोधय् कच्कच् यानाच्वंगु दु।”
9 अले मोशां हारूनयात धाल, “इस्राएलीत फुक्कसित धयाब्यु, ‘परमप्रभुया न्ह्यःने वा, छाय्धाःसा वय्कलं छिमिगु कच्कच् न्यनादीगु दु।’ ”
10 हारूनं इस्राएलीतय्त थथे धयाच्वंबलय् इमिसं मरुभूमिपाखे स्वल। अन सुपाँचय् परमप्रभुया महिमा खनेदयाच्वन।
11 परमप्रभुं मोशायात धयादिल, 12 “इस्राएलीतय्गु कच्कच् जिं न्यनागु दु। इमित धा, ‘बहनी छिमिसं ला नये खनी, अले सुथय् नसां प्वाः जाइ। अले जि परमप्रभु छिमि परमेश्वर खः धकाः छिमिसं सी।’ ”
13 उखुन्हु बहनी बट्टाइ झंगः वयाः ख्यः त्वपुक च्वन। सुथय् ख्यःया चाकःछिं सुतिलः गायाच्वन। 14 सुतिलः तनेधुंकाः मरुभूमिइ न्यंक पुगाःगु थें च्वंक बजिपै थें च्वंगु खनेदत। 15 व खनाः इस्राएलीतय्सं थः थवय् धाल, “थ्व छु खः?”
व छु खः धकाः इमिसं मस्यूगुलिं मोशां धाल, “थ्व परमप्रभुं छिमित बियादीगु नसा खः।*१६:१५ १ कोर १०:३ 16 परमप्रभुं आज्ञा बियादीगु दु, ‘सकसिनं थःत माक्व मुंकि। फुक्क पालय्च्वंपिं छम्ह छम्हय्सिगु निंतिं प्यम्ना प्यम्ना†१६:१६ प्यम्ना प्यम्ना धयागु २ लिटर खः। मुंकि।’ ”
17 इस्राएलीतय्सं इमित धा थें हे यात। गुलिंसिनं यक्व गुलिंसिनं म्हो मुन। 18 इमिसं व दानास्वःबलय् अप्वः मुंकूपिनि अप्वः मजू, म्हो मुंकूपिनि मगाः मजू। फुक्कसिनं माःछि जक मुन।*१६:१८ २ कोर ८:१५
19 अले मोशां इमित धाल, “सुनानं कन्हय् सुथय् तक छुं नं ल्यंकातये मते।”
20 अय्नं गुलिं गुलिंसिनं मोशां धाःगु खँ मन्यंसे सुथय् तकं ल्यंकातल। सुथय् उकी त्वँ दायाः नवया च्वन। थ्व खनाः मोशा इपिंलिसे तंम्वल।
21 सकसिनं सुथय् थःत माक्व मुनिगु। अले निभाः छाइबलय् ल्यं दुगु नायावनीगु। 22 खुन्हुया दिइ इमिसं निदुगं अप्वः मुन, छम्हय्सिगु निंतिं च्याम्ना च्याम्ना खः। नायःतय्सं वयाः मोशायात थ्व खँ कन। 23 अले वं इमित धाल, “परमप्रभुं थथे हे धयादीगु खः, ‘कन्हय् विश्रामवार खः। थ्व परमप्रभुया निंतिं पवित्र शबाथ खः। उकिं मनूतय् छु छुइ यः, व हे छु, छु दय्के यः व हे दय्कि। ल्यं दुगु कन्हय् सुथय् तक तयाति।’ ”*१६:२३ प्रस २०:८-११
24 मोशां आज्ञा ब्यू थें इमिसं सुथय् तक ल्यंकातल। उकी त्वँ नं मदाः, नँ नं मवः। 25 मोशां कन्हय् सुथय्खुन्हु धाल, “थौं छिमिसं थ्व न, थौं परमप्रभुया शबाथ खः। थौं छिमिसं बँय् छुं नं लुइके फइमखु। 26 खुन्हु तक छिमिसं मुंकि, न्हय्न्हुखुन्हु शबाथ जूगुलिं छुं नं दइमखु।”
27 अय्नं गुलिंगुलिंसिनं न्हय्न्हुखुन्हु नं माःवन, अय्नं छुं लुइके मफुत। 28 अले परमप्रभुं मोशायात धयादिल, “गुबले तक छिमिसं जिगु नियमयात मानय् मयायेगु? 29 स्व, परमप्रभुं छिमित शबाथ बियादीगु दु। उकिं परमप्रभुं छिमिगु निंतिं खुन्हुया दिइ निन्हुयात नयेगु नसा बियादी। न्हय्न्हुखुन्हु छिपिं सकलें थःथःगु थासय् हे च्वना च्वने माः सुं नं थःगु थासं पिहां वने मज्यू।” 30 अथे जुयाः मनूतय्सं न्हय्न्हुखुन्हु झासु लन।
31 इस्राएलीतय्सं व नसाया नां “मन्न”†१६:३१ “मन्न” या अर्थ “थ्व छु खः?” तल। व धन्यापु थें च्वं। उकियागु सवाः धाःसा कस्तिइ दय्कातःगु मरि थें च्वं।*१६:३१ गन्ती ११:७-८
32 मोशां धाल, “परमप्रभुं आज्ञा बियादीगु दु, ‘छिमित मिश्रं पित हयाबलय् मरुभूमिइ गज्याःगु नसा नकागु खः, लिपा वइपिं पुस्तातय्सं नं खनेमा धकाः इमिगु निंतिं प्यम्ना मन्न कयाः तयाति।’ ”
33 उकिं मोशां हारूनयात धाल, “छगः थल कयाः उकी प्यम्ना मन्न तयादिसँ। लिपाया पुस्ताया निंतिं ल्यंका तयेत उकियात परमप्रभुया न्ह्यःने तयादिसँ।”*१६:३३ हिब ९:४
34 अले परमप्रभुं मोशायात आज्ञा बियादीगु कथं हारुनं बाचाया सनूया न्ह्यःने दया च्वनेमा धकाः मन्न तल। 35 इस्राएलीतय्सं बाचा चिनातःगु देसय् मथ्यंतले पीदँ तक मन्न नयाच्वन। कनान देसय् मथ्यंतले इमिसं मन्न नयाच्वन।*१६:३५ यहो ५:१२
36 छगू ओमेर धयागु प्यम्ना ति खः।