24
परमप्रभुया बाचा पक्का जूगु
1 हानं परमप्रभुं मोशायात धयादिल, “छ हारुन, नादाब, अबीहू व न्हयेम्ह (७०) थकालित नापं जिथाय् च्वय् थहां वा अले तापाक्कं हे आराधना या। 2 अय्नं छ जक जिथाय् वा, मेपिं न्ह्यःने मवयेमाः। मनूत धाःसा च्वय् थहां हे मवयेमाः।”
3 अले मोशां मनूतय्थाय् वनाः परमप्रभुयागु फुक्कं वचन व नियम न्यंकल, अले इमिसं छसलं थथे धाल, “परमप्रभुं धयादीगु फुक्कं वचन व नियम जिमिसं मानय् याये।” 4 अले मोशां परमप्रभुं धयादीगु फुक्कं आज्ञा बांलाक च्वल।
कन्हय्खुन्हु सुथ न्हापां दनाः वं पर्वतयागु क्वसं छगू वेदी दय्कल। अले इस्राएलया झिंनिगू कुलकथं झिंनिगः ल्वहंयागु थां थन। 5 अले वं इस्राएली ल्याय्म्हतय्त छ्वल, इमिसं परमप्रभुया निंतिं होमबलि व द्वहंयागु मेलबलि छाल। 6 मोशां उकिया बच्छि हि कयाः ख्वलचाय् तल, बच्छि हि धाःसा वेदीइ छ्वाकल।
7 वया लिपा वं बाचाया सफू कयाः मनूतय्गु न्ह्यःने ब्वन। इमिसं लिसः बिल, “परमप्रभुं धयादीगु फुक्क खँ जिमिसं याये, अले वय्कःया आज्ञायात मानय् याये।”
8 अले मोशां हि कयाः मनूतय्त छ्वाकाः थथे धाल, “थ्व परमप्रभुं छिपिं नापं फुक्कं वचनकथं चिनादीगु बाचायागु हि खः।”*24:8 मत्ती २६:२८; मर्क १४:२४; लूक २२:२०; १ कोर ११:२५; हिब ९:१९-२०; १०:२९
मोशा सीनै पर्वतय्
9 अनंलिपा मोशा, हारुन, नादाब, अबीहू व न्हयेम्ह (७०) थकालित च्वय् थहां वन। 10 इमिसं इस्राएलया परमेश्वरयात खन। परमेश्वर दनादीगु थाय् आकाश थें यचुगु नीलमणी थें खने दु। 11 दक्व इस्राएली नायःतय्सं परमेश्वरयात खंसां वय्कलं इमित नाश याना मदी। अन हे इमिसं नयेगु त्वनेगु यात।
12 परमप्रभुं मोशायात धयादिल, “पर्वतय् जिथाय् थहां वा अले थन च्वँ। छं इमित स्यनेत जिं च्वयागु व्यवस्था व आज्ञायागु ल्वहं पै छन्त बी।” 13 अले मोशा व वयात ग्वाहालिबीम्ह यहोशू परमेश्वरयागु पर्वतय् थहां वन।
14 वने न्ह्यः मोशां थकालितय्त थथे धाल, “जिपिं मवतले छिपिं थन पिया च्वना च्वँ। हारुन व हूर छिपिं नापं च्वनी। सुयागुं ल्वापु ख्यापु दःसा इमिथाय् वने मा।”
15 मोशा पर्वतय् थहां वन अले सुपाँचं पर्वतयात त्वपुल। 16 परमप्रभुया जः सीनै पर्वतय् च्वन। अले सुपाँय्चं खुन्हु तक पर्वतयात त्वपुया तल। न्हय्न्हुखुन्हु परमप्रभुं सुपाँचं मोशायात सःतादिल। 17 इस्राएलीतय्गु मिखाय् परमप्रभुयागु जः पर्वतयागु च्वकाय् भस्मयाइगु मि थें खने दत। 18 अले मोशा सुपाँय्या दथुं पर्वतया च्वकाय् थहां वन। व अन पीन्हु व पीचा तक च्वन। *24:18 व्य ९:९