1 “मखुगु खँ ल्‍हाये मते। मभिंम्‍ह मनूलिसे जानाः मखुगु साक्षी बी मते।

2 “मखुगु ज्‍या यानाच्‍वंपिं मनूतय्‌गु हुलया ल्‍यूल्‍यू वने मते। साक्षी बीबलय् न्‍याय स्‍यनीकथं हुलयागु पंलिनाः साक्षी बी मते। 3 न्‍याय याइबलय् चीमि धकाः सुयागुं पंली मते।

4 “थः शत्रुया द्वहं वा गधा मदुथाय् वनाच्‍वंगु खन धाःसा छिमिसं वयात ज्‍वनाः वयाथाय् यंकाब्‍यु। 5 छिमिसं थःत मयःपिं मनूतय् गधायात कुं ल्‍हानाच्‍वंगु खन धाःसा वयात अथें त्‍वःताः वने मते। ग्‍वाहालि यानाः वयात थुनाब्‍यु।

6 “चीमिपिं मनूतय्‌त न्‍याय बीत लिचिले मते।

7 “मखुगु खँपाखें तापाक्‍क च्‍वँ। द्वं मदुम्‍ह व खःकथं जुइम्‍ह मनूयात स्‍याये मते, छाय्‌धाःसा द्वंयाःम्‍हय्‌सित जिं गुबलें नं द्वं मयाःम्‍ह ठहरे याये मखु।

8 “घुस नये मते छाय्‌धाःसा घुसं मनूतय्‌त कां यानाबी, अले खःगु खँयात अःखः यानाबी।

9 “परदेशीतय्‌त क्‍वत्‍यले मते। छिपिं थःपिं नं मिश्रय् परदेशी जुयाच्‍वने धुंकूगुलिं छिमिसं परदेशीतय्‌गु मन स्‍यू।

10 “खुदँ तक थःगु बुँइ पुसा ह्वलाः उकियागु बाली मुँ। 11 अले न्‍हय्‌दँय् दिपाः कयाः छुं नं पी मते। अन अथें बुयावःगु छिमिथाय् च्‍वंपिं चीमिपिं मनूतय्‌सं नइ। इमिसं नयाः ल्‍यं दुगु गुँपशुतय्‌सं नइ। छिमिसं थःपिनिगु दाखया क्‍यब व जैतूनया ख्‍यःयात नं अथे हे या।✡२३:१०-११ लेवी २५:१-७

12 “खुन्‍हु तक थःगु ज्‍या या, न्‍हय्‌न्‍हु खुन्‍हु झासु लँ। थुकिं छिमि द्वहं, गधा, थःथाय् छेँय् बूपिं दासतय्‌सं व परदेशीतय्‌सं नं झासु लनेदइ। ✡२३:१२ प्रस २०:९-११; ३१:१५; ३४:२१; ३५:२; लेवी २३:३; व्‍य ५:१३-१४

13 “जिं धयागु फुक्‍क खँ बांलाक न्‍यँ। मेपिं द्यःतय्‌गु पुजा याये मते। इमिगु नां तक नं काये मते।

14 “दँय् स्‍वक्‍वः छिमिसं जिगु निंतिं नखः हनेगु या।✡२३:१४-१९ प्रस ३४:१८-२६; व्‍य १६:१-१७

15 “छिमिसं सोडा मतःगु मरिया नखः हनेगु या। छिमित आज्ञा बिया थें आबीब लाया क्‍वःछिनातःगु इलय् न्‍हय्‌न्‍हु तक सोडा मतःगु मरि नयेगु या, छाय्‌धाःसा व हे लाय् छिपिं मिश्रं पिहां वःगु खः।

“सु नं जिगु न्‍ह्यःने ल्‍हातय् छुं मदय्‌क खनेदः वये मते।✡२३:१५ प्रस १२:१४-२०; लेवी २३:६-८; गन्‍ती २८:१७-२५

16 “थःगु बुँइ सःगु बालीया न्‍हापांगु फल छायाः सामाज्‍याया नखः हँ।

“अले दक्‍वसिबय् लिपा थःगु बुँइ सःगु फल खानाः ‘फल खायेगु नखः’ हँ।✡२३:१६ लेवी २३:१५-२१,३९-४३; गन्‍ती २८:२६-३१

17 “दँय् स्‍वक्‍वः फुक्‍क मिजंत परमप्रभुया न्‍ह्यःने खनेदः वयेमाः।

18 “जितः बलि ब्‍यूम्‍ह पशुयागु हि सोडा दुगु मरिनापं छाये मते।

“जिगु निंतिं नखःया बलि ब्‍यूम्‍ह पशुयागु दाः सुथय् तक तये मते।

19 “छिमिगु बुँइ सःगु दक्‍वसिबय् भिंगु न्‍हापांगु फल परमप्रभु थः परमेश्‍वरया छेँय् हजि।✡२३:१९ प्रस ३४:२६; व्‍य १४:२१; २६:२

“च्‍वलय्‌चिया मचायात वया मांयागु दुरुइ दय्‌के मते।”

20 परमप्रभुं धयादिल, “स्‍व, लँय् छिमिगु बिचाः यायेत अले जिं तयार यानागु थासय् छिमित हयेत जिं छम्‍ह दूत छिमि न्‍ह्यः न्‍ह्यः छ्वयाबी। 21 वयागु न्‍ह्यःने होश यानाच्‍वँ अले वं धाःगु खँ न्‍यँ। वयागु विरोधय् वने मते। छाय्‌धाःसा वयाके जिगु नां दुगुलिं वं छिमिगु अपराध क्षमा याइ मखु। 22 थथे छिमिसं वयागु खँ न्‍यन धाःसा अले जिं धाःथें यात धाःसा जि छिमि शत्रुतय् शत्रु व छिमि विरोधीतय् विरोधी जुइ। 23 जिमि दूत छिमि न्‍ह्यःने न्‍ह्यःने वनी, अले एमोरी, हित्ती, परिज्‍जी, कनानी, हिव्‍वी व यबूसीतय्‌गु देशय् छिमित हइ। अले जिं इमित नाश यानाबी। 24 इमि द्यःतय्‌त भागियाये मते, इमिगु पुजा याये मते। अय्‌नं उपिं द्यःतय्‌त स्‍यंकाब्‍यु। अले इमिसं पुजा याइगु ल्‍वहंतय्‌त तछ्यानाब्‍यु।

25 “छिमिसं परमप्रभु थः परमेश्‍वरयागु जक आराधना या अले वय्‌कलं छिमिगु नसा त्‍वंसाय् आशिष बियादी। अले जिं छिमिथासं ल्‍वय् चीकाछ्वये। 26 छिमिगु देशय् सु नं मचा क्‍वहां वइम्‍ह वा बाझः जुइ मखु। अले जिं छिमिगु आयु पूवंकाबी।

27 “छिमिगु विरोध याइपिं मनूतय्‌त जिं जिगु भय काइपिं यानाबी। छिपिं वनीगु देशयापिं मनूतय्‌त इतिमिति कंकाबी। जिं छिमि शत्रुतय्‌त छिमिगु न्‍ह्यःनं लिनाछ्वये। 28 जिं छिमिगु न्‍ह्यःने आतंक छ्वयाबी। इमिसं हिव्‍वी, कनानी व हित्तीतय्‌त छिमिगु लँपुं याकनं हे लिनाछ्वइ। 29 जिं इमित छगू हे दँय् पितिनाछ्वये मखु, मखुसा देशय् झिजांमिजां दनी। अले जंगलया पशुत ल्‍याखय् अप्‍वः दयावइ। 30 छिपिं न्‍ह्यज्‍यानाः व देश थःगु अधिकारय् मकातले भचा भचा यानाः जिं इमित छिमिगु न्‍ह्यःनं लिनाछ्वये।

31 “जिं छिमिगु सिमाना लाल समुद्रनिसें पलिश्‍तीतय्‌गु समुद्र तक,*२३:३१ समुद्र अथवा भूमध्‍यसागर अले मरुभूमिंनिसें यूफ्रेटिस तक हे क्‍वःछिनाबी। जिं व देशयापिं मनूतय्‌त छिमिगु ल्‍हातय् बी, अले छिमिसं इमित लिनाछ्वइ।

32 “छिमिसं इपिं नापं अले इमि द्यःत नापं स्‍वापु तये मते। 33 छिमिगु देशय् इमित च्‍वनेबी मते, मखुसा छिमित जिगु विरोधय् पाप याकेबी। छिमिसं इमि द्यःतय्‌त पुजायात धाःसा छिपिं धात्‍थे हे इमिगु जालय् तक्‍यनी।”