2 अले हारुनं इमित धाल, “छिमि कलाः व काय्‌ म्‍ह्याय्‌पिनिगु न्‍हाय्‌पने च्‍वंगु लुँया चाःचा त्‍वःकाः जिथाय्‌ हजि।”

3 अले फुक्‍कं मनूतय्‌सं थःथःगु न्‍हाय्‌पने च्‍वंगु लुँयागु चाःचा त्‍वःयाः हारुनयाथाय्‌ हल। 4 वं उकियात इमिगु ल्‍हातं कयाः नाय्‌काः कतां कियाः उकिं छम्‍ह द्वहंचाया मूर्ति दय्‌कल। अले मनूतय्‌सं थः थवय्‌ धाल, “हे इस्राएलीत, छिमित मिश्रं पित हःम्‍ह छिमि द्यः थ्‍व हे खः।” *32:4 १ राज १२:२८; प्रे ७:४१

5 थ्‍व खनाः हारुनं द्वहंचाया न्‍ह्‍यःने छगू वेदी दय्‌कल। वं थथे धकाः च्‍वय्‌कल, “कन्‍हय्‌ परमप्रभुया निंतिं छगू नःख जुइ।”

6 अले कन्‍हय्‌ खुन्‍हु सुथय्‌ न्‍हापां मनूतय्‌सं होम बलि छाल, अले मेलबलि नं हल। इपिं फेतुनाः भ्‍वय्‌ नये त्‍वनेधुंकाः दनाः यःयःथें सन। *32:6 १ कोर १०:७

7 अले परमप्रभुं मोशायात धयादिल, “याकनं क्‍वय्‌ क्‍वहां हुँ छाय्‌धाःसा छं मिश्रं पित हःपिं मनूत स्‍यना वने धुंकल। 8 इपिं जिं उजं बियागु लँपु पाखें याकनं हे फहिलाः मेखे पाखे वंगु दु। आः ला इमिसं थःगु निंतिं छम्‍ह द्वहंचाया मूर्ति दय्‌काः वयागु पुजा यात, अले बलि छानाः थथे धाल, ‘हे इस्राएलीत, छिमित मिश्रपाखें पितहःम्‍ह द्यः थ्‍व हे खः।’ ”

9 परमप्रभुं मोशायात धयादिल, “जिं थुपिं मनूतय्‌त खनागु दु, थुपिं जिराः मनूत खः। 10 आः जितः पने मते, छाय्‌धाःसा जिगु तं मि थें च्‍याना च्‍वंगु दु। जिं इमित भस्‍म याना छ्वये। अले छ पाखें हे जिं तःधंगु जाति दय्‌के।”

11 मोशां परमप्रभु थः परमेश्वरयात इनाप यानाः धाल, “हे परमप्रभु, छिगु तःधंगु शक्तिं व बल्‍लाःगु ल्‍हातं मिश्रं पित हयादीपिं थः मनूत पाखे छाय्‌ मि थें च्‍याःगु तं पिकया दियागु?*32:11-14 गन्‍ती १४:१३-१९ 12 छिं इमित पर्वतय्‌ स्‍यानाः थ्‍व पृथ्‍वीं इमिगु नां हे हुया छ्वयेगु मभिंगु बिचालं पित यंकादीगु खः धकाः मिश्रीतय्‌त छाय्‌ धाय्‌के बियेगु? छिगु व मि थें च्‍याःगु तंयात शान्‍त यानादिसँ। अले थःगु मन हिकाः थः मनूतय्‌त नाश जुइगु पाखें बचय्‌ यानादिसँ। 13 अब्राहाम, इसहाक व याकूबयात छिं थःगु नामं पाफयाः ‘जिं छिमि सन्‍तान आकाशय्‌ च्‍वंगु नगु थें अप्‍वः दय्‌का बी। जिं बाचा यानागु थ्‍व हे देस छिमि सन्‍तानयात बी अले इमिसं न्‍ह्‍याबलें अन हे अधिकार याइ धकाः धयादीगु खँ लुमंकादिसँ।’ ”*32:13 उत २२:१६-१७; १७:८

14 अले परमप्रभुं थः मनूतय्‌त स्‍यंकेगु बिचाःयात हीकादिल।

15 अनंलिपा मोशा थःगु ल्‍हातय्‌ बाचाया निपाः ल्‍वहंपौ ज्‍वनाः पर्वतं क्‍वहां वल। व ल्‍वहंपौतय्‌ निखें च्‍वया तःगु दु। 16 थ्‍व ल्‍वहंपौ परमेश्वरं दय्‌कादीगु खः। उकी च्‍वयातःगु आखः नं वय्‌कलं हे किया च्‍वयादीगु खः।

17 यहोशूं मनूत तस्‍सलं हाःगु सः तायाः मोशायात धाल, “छाउनीइ ल्‍वापु जूगु थें सः ताये दया च्‍वंगु दु।”

18 मोशां लिसः बिल, “थ्‍व सः त्‍याःपिनिगु नं मखु बूपिनीगु नं मखु। जिं धाःसा म्‍ये हाःगु सः थें ताया च्‍वनागु दु।”

19 मोशां छाउनी न्‍ह्‍यः वयेवं द्वहंचा व प्‍याखं हुला च्‍वंगु खनाः तसकं तं पिकाल। अले वं ल्‍वहंपौ गुँया क्‍वय्‌ वांछ्वयाः तछ्याना बिल। 20 अले इमिसं दय्‌कूगु द्वहंचा कयाः वं मिइ छ्वय्‌काः उकियात चुं चुं यानाः लखय्‌ ल्‍वाकछ्याना बिल। अले वं इस्राएलीतय्‌त त्‍वंके बिल।

21 अनंलि मोशां हारूनयात धाल, “थुपिं मनूतय्‌सं छितः छु याःगु दु धकाः छिं थुमित थुलि तःधंगु पाप याके बियागु?”

22 हारुनं लिसः बिल, “छसपोल तंचायादीमते। थुपिं मनूतय्‌त छिं बांलाक म्‍ह हे स्‍यू। थुमिगु मन मभिं पाखे वनाच्‍वंगु दु। 23 इमिसं जितः धाल, ‘जिमि न्‍ह्यःन्‍ह्यः वनेत छम्‍ह द्यः दय्‌कि, छाय्‌धाःसा जिमित मिश्रं पित हःम्‍ह मोशायात छु जुल धकाः जिमिसं मस्‍यू।’ 24 अथे जुयाः जिं इमित धया, ‘सुयाके सुयाके लुँयागु तिसा दु, व त्‍वयाः हजि।’ अले इमिसं जितः लुँ बिल। जिं लुँयात मिइ तया बियाः अले थ्‍व द्वहंचा पिहां वल।”

25 मोशां मनूत थः यःथें जुया च्‍वंगु खन। हारुनं इमित कःमघासें थः यःथें वने ब्‍यूगु जुया च्‍वन, थुलितक कि इपिं थः शत्रुतय्‌ न्‍ह्‍यःने न्‍हिलेगु हुनि जूगु जुल। 26 अथे जुयाः मोशां छाउनीया ध्‍वाखाया लिक्‍क दनाः तसलं हाला धाल, “परमेश्वरयापाखेयापिं जिथाय्‌ वा।” अले लेवीया कुलयापिं फुक्‍कं वयाथाय्‌ मूं वल।

27 मोशां इमित धाल, “परमप्रभु इस्राएलीया परमेश्वरं थथे धयादी, ‘छिपिं फुक्‍कसिनं थःथःगु तरवार ज्‍वनाः छाउनीयागु छगू कुन्‍चा निसें मेगु कुन्‍चाय्‌तक लुखा लुखाय्‌ वनाः थःकिजा, थः पासा व थः जःलाखःलायात स्‍या स्‍यां हुँ।’ ” 28 अले लेवीतय्‌सं मोशां धाःथें यात। व हे दिं स्‍वद्वःति मनूत सित।

29 अले मोशां धाल, “थौं छिमिसं थः काय्‌ व किजापिन्‍त स्‍यानाः थःपिन्‍त परमप्रभुया निंतिं सेवा यायेत लःल्‍हाना ब्‍यूगु दु। थौं वय्‌कलं छिमित तःधंगु आशिष बियादीगु दु।”

30 कन्‍हय्‌ खुन्‍हु मोशां मनूतय्‌त धाल, “द्वहंचायात पुजा यानाः छिमिसं तःधंगु पाप याःगु दु। जि परमप्रभुयाथाय्‌ पर्वतय्‌ थहां वने। जिं छिमिगु पापया प्रायश्‍चित याये फइ ला?”

31 अले मोशा परमप्रभुयाथाय्‌ थहां वनाः थथे धाल, “मनूतय्‌सं गुलि तःधंगु पाप याःगु दु। इमिसं थःगु निंतिं लुँयाम्‍ह द्यः दय्‌कूगु दु। 32 अय्‌जूसां थुमिगु पाप क्षमा यानादिसँ, मखुसा छिं च्‍वयादीगु सफुतिं जिगु नां हुयादिसँ।”*32:32 भज ६९:२८; प्रका ३:५

33 अले परमप्रभुं मोशायात धयादिल, “सुनानं जिगु विरोधय्‌ पाप याःगु दु, वयागु नां हे जिं थःगु सफुतिं हुया छ्वये। 34 हुँ, जिं छन्‍त धयागु देसय्‌ मनूतय्‌त ब्‍वना यंकि। जिम्‍ह दूत छंगु न्‍ह्‍यः न्‍ह्‍यः वनी। अथेजुसां जिं सजाँय बीगु ई वइबलय्‌ इमित पापया सजाँय बी।”

35 हारुनं दय्‌कूम्‍ह द्वहंचायात पुजा याःगुलिं परमप्रभुं इमिथाय्‌ महामारी छ्वयादिल।