33
सीनै पर्वत त्वःतेगु आज्ञा
1 अले परमप्रभुं मोशायात धयादिल, “छ व छं मिश्रं पित हःपिं मनूत थ्व थाय् त्वःताः जिं अब्राहाम, इसहाक व याकूबयात ‘छिमि सन्तानयात बी’ धकाः बचं बियागु देसय् हुँ।*33:1 उत १२:७; २६:३; २८:१३ 2 जिं छम्ह दूतयात छिमिगु न्ह्यः न्ह्यः छ्वया बी अले कनानी, एमोरी, हित्ती, परिज्जी, हिव्वी व यबूसीतय्त लिना छ्वये। 3 दुरु व कस्ति न्ह्याना च्वंगु देसय् हुँ। अय्नं जि छिपिं नापं वनेमखु। छिपिं जिराः मनूत जूगुलिं जिं छिमित लँय् हे नाश यायेगु जुइ।”
4 मनूतय्सं थ्व मभिंगु खँ न्यंबलय् इमिसं नुगः मछिंकल। अले सुनानं थःगु तिसा मतिल। 5 छाय्धाःसा परमप्रभुं मोशायात धयादीगु दु, “इस्राएलीतय्त धा, ‘छिपिं जिराः मनूत खः। जि पलख जक छिमिगु दथुइ वःसा जिं छिमित भस्म याना बी। आः छिमिसं थःथःगु तिसा त्वः, अले छिमित छु यायेमा जिं बिचाः याये।’ ” 6 अथे जुयाः होरेब पर्वतय् इस्राएलीतय्सं थः थःगु तिसा त्वल।
मुनेगु पाल
7 मोशां छपा पाल कयाः छाउनी पिने भचा तापाक्क ग्वइ। उकियात मुनेगु पाल धकाः धाइगु। सुं मनुखं परमप्रभुलिसे छुं न्यने माःसा व छाउनी पिने थ्व हे मुनेगु पालय् वनीगु जुया च्वन।
8 मोशा पिहां वनिबलय् फुक्कं मनूत थःथःगु पालया लुखाय् दनी, मोशा व पालदुने दुहां मवंतले वयात हे स्वयाच्वनी। 9 मोशा पाल दुने दुहां वने धुंकाः परमप्रभुं मोशालिसे खँ ल्हानादीबलय् सुपाँय्यागु थां पालया क्वय् लुखाय् दनी। 10 मनूतय्सं सुपाँय्या थां पालया लुखाय् च्वंगु खनीबलय् इमिसं थःथःगु पालया लुखाय् पिने क्वपुसां पुयाः आराधना याइ। 11 परमप्रभु मोशालिसे थुकथं चुलिंचू थः पासापिंनापं थें खँ ल्हानादीगु जुया च्वन। मोशा हाकनं छाउनीइ लिहां वनी। वयात ग्वाहालि याइम्ह ल्याय्म्ह नूनया काय् यहोशू धाःसा पालय् च्वना च्वनी।
मोशां परमप्रभुया महिमा खंगु
12 मोशां परमप्रभुयात धाल, “छिं जितः थुपिं मनूतय्त ब्वना यंकि धकाः धयादीगु दु, अय्नं जि नापं सुयात छ्वया दी धकाः धयादीगु मदुनि। छिं धयादीगु दु, ‘जिं छन्त म्हस्यू, अले जिगु दया छंके दु।’ 13 छि जि नापं लय्ताःसा जितः लँपु क्यनादिसँ। छितः म्हसीके फयेमा अले छिगु दया जिके दयाच्वनेमा। लुमंकादिसँ, थ्व जाति छिकपिनि हे मनूत खः।”
14 परमप्रभुं लिसः बियादिल, “जि थःहे छ नापं वने अले जिं छन्त विश्राम बी।”
15 वं वय्कःयात धाल, “छि थःहे जिपिं नापं मझायेगु जुसा जिमित थनं न्ह्यःने यंकादी मते। 16 जिपिं नापं मवंतले जि व जिमि मनूतय्सं छिगु दया जिमिके दु धकाः गथेयाना सीकेगु? मेगु छु खं जि व छिकपिनि मनूत पृथ्वी च्वंपिं मनूत स्वयाः ब्यागल जुइ?”
17 अले परमप्रभुं मोशायात धयादिल, “छं धाःथें जिं याये, छाय्धाःसा जि छ खनाः लय्ताः, अले जिं छन्त बांलाक हे म्हस्यू।”
18 वं धाल, “आः जितः छिगु महिमा क्यनादिसँ।”
19 वय्कलं धयादिल, “जिं छंगु न्ह्यःने हे थःगु फुक्कं भिंगु क्यने, अले छंगु न्ह्यःने हे परमप्रभुया नां च्वय्के। जिं सुयात कृपा यायेमास्ति वइ वयात कृपा याये। सुयात जिं दया यायेमास्ति वइ वयात दया याये।”*33:19 रोम ९:१५ 20 अले वय्कलं धयादिल, “अय्नं छं जिगु ख्वाः स्वये फइ मखु, छाय्धाःसा जिगु ख्वाः स्वयाः सुं नं मनूत म्वाना च्वने फइ मखु।” 21 अले परमप्रभुं धयादिल, “जिगु लिक्क तग्वःगु ल्वहँतय् छ दँ। 22 जिगु महिमा अनं जुया वनीबलय् जिं छन्त व ल्वहंयागु कापिइ तया बी। अले अनं जुया मवंतले छन्त जिगु ल्हातं हे त्वपुया तये। 23 हानं जिं ल्हाः लिकाये, अले छं जिगु म्हया ल्युने पाखे जक खनी। जिगु ख्वाः धाःसा खने दइमखु।”