11
बाबेलया धरहरा
1 उबलय् पृथ्वी न्यंक मनूतय्सं छगू हे भाय् व छगू हे कथंया खँग्वः छ्यलिगु खः। 2 पुर्ब पाखे न्ह्यज्याज्यां वंबलय् इपिं शिनार देशया छगू मैदानय् थ्यन। अले अन हे च्वन।
3 इमिसं थःथवय् खँ ल्हात-- “आः झीसं अप्पा दय्काः मिइ छुये।” अले इमिसं ल्वहंया थासय् अप्पा व चाया थासय् अलकत्रा छ्यल। 4 अले इमिसं धाल-- “आः छगू शहर दय्के, अले सर्गः थीगु धरहरा दय्काः झीगु नां तये। थुकथं झी पृथ्वी न्यंक छ्यालब्याल जुइ मखु।”
5 परमप्रभु मनूतय्सं दय्कूगु शहर व धरहरा स्वयेत कुहां झाल। 6 अले वय्कलं धयादिल-- “थुपिं फुक्क छगू हे जातियापिं व छगू हे भाय् ल्हाइपिं जुयाच्वन। थ्व ला इमिसं यायेत्यंगु ज्याया शुरु जक खः। आवंलि थुमिसं मनंतुंगु न्ह्यागुं याये फइ। 7 कुहां वने नु, अले झीसं इमिगु भाय्यात ल्वाकः बुकः याये। अले इमिसं थवं थवय् धाःगु खँ थुइ मखु।”
8 थुकथं परमप्रभुं इमित पृथ्वी न्यंक छ्यालब्याल यानाबिल। अले शहर दय्केगु ज्या नं दित। 9 उगु शहरयागु नां बाबेल†11:9 हिब्रु भासय् “बाबेल” धयागु खँग्वः “ल्वाकःबुकः” खँग्वःलिसे ज्वःलाः। च्वन। छाय्धाःसा परमप्रभुं अन मनूतय्गु भाय्यात ल्वाकःबुकः यानादीगु खः, अले इमित पृथ्वी न्यंक छ्यालब्याल यानादीगु खः।
शेमया सन्तान
10 शेमया सन्तानया धलः थुकथं दु --
खुसिबाः वःगु निदँ लिपा सच्छि दँ दुबलय् शेमया अर्पक्षद धाःम्ह काय् बुल। 11 अनंलि व मेगु ५०० दँ म्वात। वया मेमेपिं काय्पिं व म्ह्याय्पिं बुल।
12 अर्पक्षद ३५ दँ दुबलय् वया शेलह नांयाम्ह काय् बुल। 13 अनंलि व मेगु ४०३ दँ म्वात। वया मेमेपिं नं काय्पिं व म्ह्याय्पिं बुल।
14 शेलह ३० दँ दुबलय् वया एबेर नांयाम्ह काय् बुल। 15 अनंलि व मेगु ४०३ दँ म्वात। वया मेमेपिं नं काय्पिं व म्ह्याय्पिं बुल।
16 एबेर ३४ दँ दुबलय् वया पेलेग नांयाम्ह काय् बुल। 17 अनंलि व मेगु ४३० दँ म्वात। वया मेमेपिं नं काय्पिं व म्ह्याय्पिं बुल।
18 पेलेग ३० दँ दुबलय् वया रऊ नांयाम्ह काय् बुल। 19 अनंलि व मेगु २०९ दँ म्वात। वया मेमेपिं नं काय्पिं व म्ह्याय्पिं बुल।
20 रऊ ३२ दँ दुबलय् वया सरुग नांयाम्ह काय् बुल। 21 अनंलि व मेगु २०७ दँ म्वात। वया मेमेपिं नं काय्पिं व म्ह्याय्पिं बुल।
22 सरुग ३० दँ दुबलय् वया नाहोर नांयाम्ह काय् बुल। 23 अनंलि व मेगु २०० दँ म्वात। वया मेमेपिं नं काय्पिं व म्ह्याय्पिं बुल।
24 नाहोर २९ दँ दुबलय् वया तेरह नांयाम्ह काय् बुल। 25 अनंलि व मेगु ११९ दँ म्वात। वया मेमेपिं नं काय्पिं व म्ह्याय्पिं बुल।
26 तेरह ७० दँ दुबलय् वया अब्राम, नाहोर व हारान नांयापिं काय्पिं बुल।
तेरहया सन्तान
27 तेरहया खँ थथे दु-- व अब्राम, नाहोर व हारानया बौ खः। हारानया काय् लोत खः। 28 हारान वया बौ तेरह म्वानाच्वंबलय् हे थः बूगु थाय् ऊरय् सित। थ्व थाय् कल्दीतय्गु खः। 29 अब्रामं साराईलिसे ब्याहा यात। नाहोरं हारानया म्ह्याय् मिल्कालिसे ब्याहा यात। हारान यिस्काया नं बौ खः। 30 साराई थारिम्ह मिसा खः। वया मस्त मदु।
31 तेरह थः काय् अब्राम, हारानया काय् थः छय् लोत, अब्रामया कलाः थः भौ साराईयात ज्वनाः कनानपाखे वनेत कल्दीतय्गु शहर ऊर त्वःतावन। तर इपिं हारान शहरय् थ्यनाः अन हे च्वन। 32 तेरह २०५ दँ दुबलय् अन हे मन्त।