69
ग्वाहालिया निंतिं बिन्ति
दाऊदया भजन, लय् तइम्हय्सिगु निंतिं -- “लिलि स्वां” रागय्
1 हे परमेश्वर,
जितः बचय् यानादिसँ।
जिगु गःपतय् थ्यंक लः
थहां वयेधुंकल।
2 जि तःजाःगु ध्याचलय्
दुनावनाच्वनागु दु।
जिगु तुतिं बँय् चुइ मफयाच्वन।
जि तःजाःगु लखय्
लानाच्वनागु दु।
किसिद्वम्बलय्
जि दुनावनाच्वनागु दु।
3 ग्वाहालिया निंतिं
हाहां जि न्यलेधुन,
जिगु सः सुइधुंकल।
परमेश्वरयागु लँ स्वस्वं
जिगु मिखा त्यानुइधुंकल।
4 जितः म्वाय्कं म्वाय्कं
मयय्काच्वंपिं
जिगु छेनय् च्वंगु सँ स्वयाः
अप्वः दु।
इमिसं मखुगु मखुगु द्वपं बियाः
जितः स्यंकेत स्वयाच्वंगु दु।
जिं का हे मकयागु नं
लित हिँ धकाः
जिलिसे ल्वापु थःवयाच्वन।*६९:४ भज ३५:१९; यूह १५:२५
5 हे परमेश्वर,
जि गुलि मूर्ख धकाः छिं स्यू।
जिगु पाप छिगु पाखें
सुलाच्वंगु मदु।
6 जिगु कारणं
छितः विश्वास याइपिन्त
मछालापुके मते,
हे दकसिबय् बल्लाःम्ह
परमप्रभु!
हे इस्राएलया परमेश्वर, छितः
मालाजुइपिं जिगु कारणं
क्वह्यंकाच्वने म्वाःलेमा।
7 छिगु हे निंतिं
जिं क्वह्यंकाच्वने माल,
अले मछालापुके मालाच्वन।
8 जिमि थः हे दाजुकिजापिन्सं
जितः म्हमस्यू थें याइगु।
जि थःगु हे परिवारय्
परदेशी थें जुयाच्वनागु दु।
9 छिगु देगःया जोशं जितः
छ्वय्कूगु दु।
छितः क्वह्यंकीपिन्सं
जितः क्वह्यंकाहःगु दु।*६९:९ यूह २:१७; रोम १५:३
10 जि अपसं च्वनाः ख्वयेबलय्
मनूतय्सं जितः हिस्याइ।
11 भांग्रा लं फिनाः दुःखं
च्वनेबलय् नं
इपिं जितः खनाः न्हिली।
12 लँय् लँय् हे इमिसं जिगु खँ
ल्हानाजुइ।
अय्लाःगुलुतय्सं जितः
ध्याचू नकाः म्ये हालाजुइ।
13 जि धाःसा छिगु प्रार्थना
यानाच्वना, हे परमप्रभु।
जितः छिं ल्ययादीगु इलय् लिसः
बियादिसँ, हे परमेश्वर!
छिगु न्ह्याबलें दयाच्वनिगु
मायाया कारणं
छिगु धात्थेंया उद्धारं जितः
लिसः बियादिसँ।
14 जि दुना मवनेमा धकाः जितः
तःजाःगु ध्याचलं थकयादिसँ।
जिमि शत्रुतय्पाखें
बचय् यानादिसँ
जितः लःया किसिद्वम्बलं
बचय् यानादिसँ।
15 खुसिबालं जितः चुइके मयनेमा
जि लखं दुना मवनेमा
जि सीगालय् दुसुना मवनेमा।
16 हे परमप्रभु,
जितः लिसः बियादिसँ।
छाय्धाःसा छिगु
सदां दयाच्वनिगु माया तःधं।
जिगु सः न्यनादिसँ
छाय्धाःसा छि धात्थें
दयां जाःम्ह खः।
17 जि पाखे स्वयादिसँ।
जि तःधंगु दुःखय् लानाच्वंगु दु,
जितः आः हे
लिसः बियादिसँ।
18 जितः वयाः बचय् यानादिसँ
जितः जिमि शत्रुतय् पाखें
त्वःतकादिसँ।
19 जितः मनूतय्सं गुलि
क्वह्यंकातःगु दु धकाः
छिं स्यू।
जि गुलि हेला याकाः
मछालापुक च्वने मालाच्वंगु दु
धकाः छिं स्यू।
जिमि शत्रुतय्सं छुछु
यानाच्वन धकाः
छिं फुक्कं स्यू।
20 हेलां जिगु नुगः
तज्यायेधुंकल।
छम्हय्सिनं धकाः जितः
हःपाः व लिधंसा ब्यू मवः।
21 नयेपित्याःबलय् इमिसं
जितः विष नकेहल।
प्याःचाःबलय् इमिसं
जितः चुपाउँ त्वंकेहल।*६९:२१ मत्ती २७:४८; मर्क १५:३६; लूक २३:२६; यूह १९:२८-२९
22 इमिगु भ्वजं इमित
नाश यायेमा,
इमिगु पवित्र भ्वय्
इमिगु निंतिं स्वःतिपाँय् जुइमा।
23 इमिगु मिखा कां जुइमा,
इमिगु दुगःक्वँय् चाःतुइमा।*६९:२२-२३ रोम ११:९-१०
24 छिगु तं इमित प्वंकादिसँ
छिगु तमं इमित भस्म यायेमा।
25 इमिगु छाउनी नाश जुइमा
इमिगु पालय् सुं हे मदयेमा।*६९:२५ प्रे १:२०
26 छाय्धाःसा छिं सजाँय
ब्यूम्हय्सित इमिसं लितुली।
छिं घाःपाः याःम्हय्सिगु
दुःखया बारे खँ ल्हाइ।
27 इमिगु पापया ल्याःचाः
तयादिसँ।
छिं उद्धार यानादीबलय्
इपिं दुमथ्यायेमा।
28 जीवनया सफुलिं
इमिगु नां हुयादिसँ।
धर्मीतय्गु धलखय्
इमिगु नां च्वयादी मते।*६९:२८ प्रस ३२:३२; प्रका ३:५; १३:८; १७:८
29 तर जि ला दुःखय्
लानाच्वंगु दु,
अले जितः सास्ति
जुया च्वंगु दु।
हे परमेश्वर,
जितः थःगु शक्तिं
बचय् यानादिसँ।
30 जिं परमेश्वयागु नांयात
तःधंकाः भजन हाले
दुनुगलंनिसें सुभाय् बियाः
वय्कःयात तःधंके।
31 थुकिं परमप्रभु थुसा,
न्यकू व तुतिख्वः
दयेधुंकूम्ह द्वहंचिया
होमबलि बीबलय् स्वयाः
अप्वः लय्ताइ।
32 क्वत्यय्काः च्वनेमाःपिं
थ्व खनाः लय्ताइ,
परमेश्वरयात माला जुइपिनि
नुगःयात हःपाः दइ।
33 परमप्रभुं मगाःमचाःपिनिगु
सः न्यनादी।
अले कुनातःपिं थः मनूतय्त
ल्वःमंकादी मखु।
34 स्वर्ग, पृथ्वी, समुद्र
व अन दुपिं सकसिनं
वय्कःयात प्रशंसा या।
35 छाय्धाःसा वय्कलं
यरूशलेमयात बचय् यानादी
यहूदाया शहरत हानं दय्कादी।
वय्कःया मनूत अन च्वनी,
अले उकियात अधिकार याइ।
36 अले व थाय् वय्कःयागु
आज्ञा मानय् याइपिनि
सन्तानयागु हे जुइ।
वय्कःयात माया याइपिं
अन च्वनी।