70
ग्वाहालिया निंतिं प्रार्थना
दाऊदया भजन, लय् तइम्हय्सिगु निंतिं
1 हे परमेश्वर!
जितः बचय् यानादिसँ।
हे परमप्रभु,
जितः ग्वाहालि यायेत
याकनं झासँ।*७०:१-५ भज ४०:१३-१७
2 जितः स्यायेत स्वःपिं
लज्या चाये मालेमा,
अले इतिमिति कनेमा।
जिगु दुःखय् लय्तायाजूपिं
लिज्यां वनेमा,
अले मछालाः जुइमा।
3 “हः” धकाः
जितः लाय्बुयाजूपिं मछालाः
आछु-आछु कनाजुइमा।
4 छितः मालाजुइपिं धाःसा
छिके लय्तायाच्वनेमा।
अले छिं मुक्ति बीगु यःपिन्सं
सदां थथे धयाच्वनेमा --
“परमेश्वर गुलि तःधं!”
5 तर जि ला चीमिम्ह
व छुं मदुम्ह मनू खः।
हे परमप्रभु,
छि जितः उद्धार याइम्ह
व जिम्ह परमेश्वर खः।
जितः ग्वाहालि यायेत
याकनं झासँ।