4
स्वर्गय् परमेश्वरयात तःधंकूगु
1 थुलि जुइ धुंकाः जिं थस्वयाबलय् स्वर्गया लुखा चालाच्वंगु खना। दकलय् न्हापालाक तुरही पुया हःगु सः थें च्वंक जिं थथे धयाहःगु ताल -- “थन थहां वा, अले छु छु जुइतिनि धकाः जिं छन्त क्यने।” 2 अले जि छक्कलं आत्मां जाल। जिं स्वर्गय् छगू सिंहासन तयातःगु व उकी सुं छम्ह फ्यतुनाच्वंगु खना। 3 अन फ्यतुनाच्वंम्ह जास्पर व कार्नेलेन मणि थें खने दु। सिंहासनया जवंखवं पन्ना थेंज्याःगु कपं दु।*४:२-३ इज १:२६-२८; १०:१ 4 अले हानं छचाखेरं नीप्यंगू सिंहासन तयातःगु दु। लुँयागु श्रीपेच पुया तःपिं व तुयुगु वसतं पुनातःपिं नीप्यम्ह थकालिपिं व सिंहासनय् फ्यतुनाच्वंगु दु। 5 सिंहासनं प्वालाक्क प्वालाक्क मि च्यानाच्वंगु, न न्याःथें सः वयाच्वंगु दु। सिंहासनया न्ह्यःने न्हय्प्वाः मिप्वाः च्यानाच्वंगु दु। थ्व परमेश्वरया न्हय्म्ह आत्मा खः।*४:५ प्रस १९:१६; प्रका ८:५; ११:१९; १६:१८; इज १:१३; प्रका १:४; जक ४:२ 6 सिंहासनया न्ह्यःने न्हाय्कंयागु समुद्र थें यचुसे खने दु।
सिंहासनया छचाखेरं ल्युने नं न्ह्यःने नं मिखाया मिखा दुपिं प्यम्ह जीवात्मा दु। 7 न्हापांम्ह सिंह थें च्वं, निम्हम्ह द्वहं थें च्वं, अले स्वम्हम्हय्सिगु ख्वाः मनूयागु ख्वाः थें च्वं, प्यम्हम्ह ब्वया च्वंम्ह इमा थें च्वं।*४:६-७ इज १:५-१०; १०:१४ 8 थ्व प्यम्ह जीवात्मातय्के खुपा खुपा पपू दु, अले दुनेपिने फुक्कभनं मिखाया मिखा दु। थुमिसं चच्छि न्हिच्छिं मदिक्क थथे म्ये हालाच्वनी।
“पवित्र, पवित्र, पवित्रम्ह
दक्वसिबय् तःधंम्ह
व शक्ति दुम्ह
परमप्रभु परमेश्वर।
वय्कः न्हापांनिसें दीम्ह,
आः नं दीम्ह,
अले लिपा नं दीम्ह खः।”*४:८ इज १:१८; १०:१२; यशै ६:२-३
9 सिंहासनय् फ्यतुनादीम्ह न्ह्याबलें म्वाना च्वनिम्हय्सिगु महिमा, हनाबना व सुभाय्या म्ये इपिं जीवात्मातय्सं हालाच्वन। 10 इपिं म्ये हालाच्वंबलय् सिंहासनय् दीम्हय्सिगु न्ह्यःने नीप्यम्ह थकालिपिन्सं क्वछुनाः भागि यात। अले थः थःगु श्रीपेच वय्कःया सिंहासनया न्ह्यःने तयाः थथे धाल --
11 “जिमि प्रभु परमेश्वर,
छिं हे फुक्कं खँ
सृष्टि यानादीगु खः।
छिगु इच्छाकथं हे
फुक्कं दुगु खः,
छिं हे सृष्टि यानादीगु खः।
उकिं परमप्रभु जिमि परमेश्वर,
छि महिमा, हनाबना
व शक्ति दुम्ह खः।”