5
भ्याःचा व भ्वंथू
1 सिंहासनय् फ्यतुना च्वंम्हय्सिगु जव ल्हातय् दुने नं पिने नं च्वया तःगु भ्वं छथू खना। उकी न्हय्थाय् छाप तया तःगु दु।*५:१ इज २:९-१०; यशै २९:११ 2 छम्ह तसकं बल्लाःम्ह स्वर्गदूतं ततसलं थथे धयाच्वंगु जिं ताया -- “थ्व भ्वंथुइ तयातःगु छाप तछ्यानाः फ्यने फुम्ह सु दु?” 3 स्वर्गय्, पृथ्वीइ व पृथ्वी क्वय् नं थ्व भ्वंथू फ्यने फुम्ह व थुकी दुने स्वये फुम्ह छम्ह हे मदु।
4 थ्व भ्वंथू फ्यने फुम्ह वा स्वये फुम्ह सुं हे मदुगुलिं जि तसकं हे ख्वया। 5 अले छम्ह थकालिं जितः धाल -- “ख्वय् मते, यहूदा कुलयाम्ह सिंह, दाऊदया तःधंम्ह सन्तानं थ्व भ्वंथू फ्यनेत व थुकी च्वंगु न्हय्गू छाप प्वलेत त्याकाः वये धुंकल।”*५:५ उत ४९:९; यशै ११:१,१०
6 अले जिं सिंहासन, प्यम्ह जीवात्मा व थकालिपिनिगु दथुइ स्याना तये धुंकूम्ह थें च्वंम्ह छम्ह भ्याःचा दनाच्वंगु खना। थ्व भ्याःचायाके न्हय्पु नेकू व न्हय्गः मिखा दु। थ्व फुक्क पृथ्वीइ छ्वया हःपिं परमेश्वरया न्हय्म्ह आत्मा खः।*५:६ यशै ५३:७; जक ४:१० 7 अले वं वनाः सिंहासनय् फ्यतुना च्वंम्हय्सिगु जव ल्हातय् च्वंगु भ्वंथू काल। 8 थुकथं वं थ्व भ्वंथू काये धुंकाः प्यम्ह जीवात्मा व नीप्यम्ह थकालिपिं भ्याःचायागु न्ह्यःने क्वछुत। इपिं फुक्कसिके वीणा व गुंगू थना तःगु लुँयागु मकः दु। थ्व विश्वासीतय्गु प्रार्थना खः।*५:८ भज १४१:२ 9 इमिसं थथे धकाः छपु न्हूगु म्ये हाल --
“थ्व भ्वंथुइ च्वंगु छाप
तछ्यानाः छिं हे जक
फ्यनादी फु,
छाय्धाःसा
छितः स्याये धुंकल,
अले छिगु हिं परमेश्वरया लागि
फुक्क कुलयापिं,
फुक्क भासं नवाइपिं,
फुक्क देशयापिं
व फुक्क जात जातियापिन्त
न्यानादिल।*५:९ भज ३३:३; ९८:१; यशै ४२:१०
10 छिं हे इमित झी परमेश्वरया
सेवा यायेत छगू राज्य
व पुजाहारीत दय्कादिल।
अले इमिसं संसारय् राज्य याइ।”*५:१० प्रस १९:६; प्रका १:६
11 जिं हानं स्वयाबलय् लखंलख व करोडौं करोड स्वर्गदूततय्सं सिंहासन, जीवात्मा व थकालिपिनिगु चाकःछिं दनाः*५:११ दान ७:१० 12 थथे म्ये हाला च्वंगु खना --
“स्याये धुंकूम्ह भ्याःचा हे
शक्ति, धन, बुद्धि, बल,
महिमा, हनाबना
व च्वछाये बहःम्ह खः।”
13 अले अन सृष्टि यानातःपिं स्वर्गय् च्वंपिं, पृथ्वी व पृथ्वी तःले व समुद्रय् च्वंपिं दक्वसिनं थथे धयाच्वंगु जिं ताया --
“सिंहासनय् फ्यतुना च्वंम्ह
व भ्याःचाया सदां
जय जय जुइमा।
अले न्ह्याबलें मान, इज्जत,
शक्ति व राज्य दयाच्वनेमा।”
14 प्यम्ह जीवात्मां धाल -- “आमेन!” अले थकालिपिन्सं क्वछुनाः भागि यात।