1 चीधिकःम्‍ह भ्‍याःचां न्‍हय्‌गू मध्‍ये छगू छाप प्‍वःगु जिं खना। अले प्‍यम्‍ह मध्‍ये छम्‍ह जीवात्‍मां नँ न्‍याः थें तःसलं “वा” धाःगु जिं ताया। 2 अले जिं छम्‍ह तुयुम्‍ह सल खना। थ्‍व सल गया च्‍वंम्‍हय्‌सिके छगू धनु दु। वयात श्रीपेच बिल। अले व त्‍याकुकुं अझ त्‍याकेत वन।✡६:२ जक १:८; ६:३,६

3 चीधिकःम्‍ह भ्‍याःचां निगूगु छाप प्‍वःबलय् निम्‍हम्‍ह जीवात्‍मां “वा” धकाः धाःगु जिं ताया। 4 अले हानं प्‍वालाप्‍वाला थीक ह्याउँसे च्‍वंम्‍ह छम्‍ह सल पिहां वल। थ्‍व सल गया वःम्‍हय्‌सिनं पृथ्‍वीइ शान्‍ति मदयेका बिल। अले मनूतय्‌सं मनूतय्‌त स्‍याकेत वयात छपु ताहाकःगु तरवार नं बिल।✡६:४ जक १:८; ६:२

5 चीधिकःम्‍ह भ्‍याःचां हानं मेगु स्‍वंगूगु छाप प्‍वःबलय् हानं स्‍वम्‍हम्‍ह जीवात्‍मां थथे धाल – “वा।” अले हानं छम्‍ह हाकुम्‍ह सलयात खना। थ्‍व सल गया च्‍वंम्‍हय्‌सिगु ल्‍हातय् छज्‍वः ताल्‍जु दु।✡६:५ जक ६:२,६ 6 प्‍यम्‍ह जीवात्‍मातय्‌गु दथुं थुकथं धयाहःगु सः जिं ताया – “न्‍हिच्‍छि ज्‍या याइम्‍हय्‌सित छगू किलो छ्वचुं ज्‍यालाबीमाः। अले तछ्व काइम्‍हय्‌सित जूसा स्‍वंगू किलो ज्‍यालाबीमाः। चिकं व दाखमद्ययात धाःसा स्‍यंके मते।”

7 हानं प्‍यंगूगु छाप प्‍वःबलय् प्‍यम्‍हम्‍ह जीवात्‍मां थथे धाःगु जिं ताया – “वा।” 8 अले जिं म्‍हासुसे च्‍वंम्‍ह छम्‍ह सलयात खना। थ्‍व सल गया च्‍वंम्‍हय्‌सिगु नां मृत्‍यु खः। उकिं नरक धाःम्‍ह वयागु ल्‍यूल्‍यू वःगु खः। इमित पृथ्‍वीयागु प्‍यब्‍वय् छब्‍व तरवारं पालेगु, नये मखंकाः स्‍यायेगु, ल्‍वचं स्‍यायेगु, अले जंगलय् च्‍वंपिं पशुतय्‌सं स्‍याकेगु अधिकार बिल।✡६:८ इज १४:२१

9 न्‍यागूगु छाप प्‍वःबलय् जिं परमेश्‍वरयात मत्‍वःतुसे वय्‌कःयागु वचन न्‍यंकूगुलिं स्‍याःपिनिगु आत्‍मातय्‌त होम यायेगु थाय्‌यागु तःले खना। 10 थुपिं तसकं हाला हल – “शक्ति दुम्‍ह, पवित्रम्‍ह व सत्‍यम्‍ह परमप्रभु, पृथ्‍वीइ च्‍वंपिन्‍त छिं गुबलय् जिमित स्‍याःगु पलेसा कायेत न्‍याय यानादीगु?” 11 अले इपिं फुक्‍कसितं छपाः छपाः तुयुगु लं बिल। इपिं थें तुं स्‍याके मानिपिं परमेश्‍वरया दासत व इमि दाजुकिजापिन्‍त नं मस्‍यातले पियाच्‍वँ धकाः इमित धाल।

12 हानं खुगूगु छाप प्‍वःगु जिं खना। अबलय् तसकं हे भ्‍वखाय् ब्‍वल। हाकुगु भांग्रा थें सूर्य हाकुसे च्‍वना वन। तिमिला छपातं हि थें ह्याउँसे च्‍वना वन।✡६:१२ प्रका ११:१३; १६:१८; यशै १३:१०; योए २:१०,३१; ३:१५; मत्ती २४:२९; मर्क १३:२४-२५; लूक २१:२५ 13 ग्‍वःफसं पाकय् मजूनिगु यःमरि कुतुं वंकु थें आकाशय् च्‍वंगु नगु नं पृथ्‍वीइ कुतुंवल। 14 भ्‍वंथू तुला वं थें आकाश नं थूतुला वन। पहाडत व टापुत फुक्‍कं चिला वन।✡६:१३-१४ यशै ३४:४; प्रका १६:२०

15 अले पृथ्‍वीइ च्‍वंपिं जुजुपिं, ततःधंपिं मनूत, सेनापतित, तःमिपिं, बल्‍लाःपिं, दास व दासमखुपिं, फुक्‍कं गुफा व तःग्‍वःगु ल्‍वहंया कापिचाय्‌ सुचूवन।✡६:१५ यशै २:१९,२१ 16 इमिसं पहाड व तःग्‍वःगु ल्‍वहंयात थथे धाल – “सिंहासनय् फ्‍यतुना च्‍वंम्‍हय्‌सिगु मिखां सुचुकाः व चीधिकःम्‍ह भ्‍याःचायागु तं फये म्‍वायेक जिमित ल्‍हाका छ्वयाब्‍यु।✡६:१६ होशे १०:८; लूक २३:३० 17 छाय्‌धाःसा वय्‌कलं न्‍याय व सजाँय याइगु दिं वये धुंकल, उकिं सु जक बचय् जुयाः च्‍वने फइ?” ✡६:१७ योए २:११; मला ३:२