8
न्हय्गूगु छाप व लुँयागु गुंगू
थनिगु वेदी
थनिगु वेदी
1 भ्याःचां न्हय्गूगु छाप प्वःबलय् बाघौ तक स्वर्गय् सुनसान जुल। 2 अले परमेश्वरया न्ह्यःने दना च्वंपिं न्हय्म्ह स्वर्गदूततय्त जिं खना। इमित न्हय्पु तुरही बिल।
3 मेम्ह छम्ह स्वर्गदूत ल्हातिइ लुँयागु गुंगू थनिगु मकः ज्वनाः वेदीया लिक्क दं वल। विश्वासीतय्गु प्रार्थना लिसें सिंहासनया न्ह्यःने च्वंगु लुँयागु वेदीइ च्याकेत धकाः वयात यक्व गुंगू बिल।*८:३ आमो ९:१; प्रस ३०:१,३ 4 विश्वासीतय्सं याःगु प्रार्थना नाप नापं स्वर्गदूतयागु ल्हातिइ च्यानाच्वंगु गुंगूया कुँत्याः च्वय् थहां वनाच्वन। 5 अले स्वर्गदूतं गुंगू मकः कयाः उकी वेदीइ च्वंगु मि जाय्क तयाः पृथ्वीइ वांछ्वया हल। अले ग्राङ्गग्रुङ्ग सः वल प्वालाक्क पिलाक हावलासा त्वल। अले हानं भ्वखाय् ब्वल।*८:५ लेवी १६:१२; इज १०:२; प्रस १९:१६; प्रका ११:१९; १६:१८
न्हय्पु तुरही पुया हःगु
6 थुलि जुइ धुंकाः न्हय्पु तुरही ज्वना च्वंपिं न्हय्म्ह स्वर्गदूततय्सं तुरही पुइत्यन।
7 न्हापांम्ह स्वर्गदूतं तुरही पूबलय् हि ल्वाकज्याःगु प्वँ व मि पृथ्वीइ वांछ्वया हल। अले स्वब्वय् छब्व पृथ्वी च्यात, स्वब्वय् छब्व सिमा नं च्यात, अले वाउँगु घाँय् नं फुक्क च्याना वन।*८:७ प्रस ९:२३-२५; इज ३८:२२
8 निम्हम्ह स्वर्गदूतं थःगु तुरही पुल। अले दनदन मि च्यानाच्वंगु पहाड थेंज्याःगु छुं छगू समुद्रय् वांछ्वया हल। स्वब्वय् छब्व समुद्र हि जुल। 9 अले समुद्रय् च्वंपिं स्वब्वय् छब्व जीवजन्तुत नं सित। स्वब्वय् छब्व लःजहाज नं स्यन।
10 हानं स्वम्हम्ह स्वर्गदूतं थःगु तुरही पुल। अले ला मिप्वाः थें च्यानाः तःग्वःगु नगु छगः आकाशं कुतुं वयाः स्वब्वय् छब्व खुसि व बुंगाःचाय् लात।*८:१० यशै १४:१२ 11 थ्व नगुयागु नां “खायु” खः। अले थुकिं यानाः स्वब्वय् छब्व लः खाइसे च्वना वन। थथे लः खाइसे च्वना वंगुलिं व लखं यानाः यक्व हे मनूत सित।*८:११ यर ९:१५
12 अले प्यम्हम्ह स्वर्गदूतं थःगु तुरही पुल। स्वब्वय् छब्व सूर्य व स्वब्वय् छब्व तिमिला व स्वब्वय् छब्व नगुयात स्यंका ब्यूगुलिं स्वब्वय् छब्व न्हि खिउँसे च्वना वन, स्वब्वय् छब्व चा नं अथे हे जुल।*८:१२ यशै १३:१०; इज ३२:७; योए २:१०,३१; ३:१५
13 थुलि जुइ धुंकाः जिं आकाशय् ततसलं थथे हालाः ब्वया च्वंम्ह छम्ह इमायात खना। “आवंनिसें पृथ्वीइ च्वंपिन्त तसकं धिक्कार, धिक्कार, धिक्कार, छाय्धाःसा अझनं स्वम्ह स्वर्गदूततय्सं थःथःगु तुरही पुयाहइतिनि।”