3 थ्‍व कुं पृथ्‍वीइ क्‍वःबुइँचात पिहां वल। इमित पृथ्‍वीइ च्‍वंपिं बिच्‍छितय्‌गु थेंज्‍याःगु शक्ति बिल।*९:३ प्रस १०:१२-१५ 4 पृथ्‍वीइ च्‍वंगु घाँय्‌, सिमा व वाउँगु छुं नं स्‍यंके मते धकाः इमित धाल। तर कपालय्‌ परमेश्वरयागु छाप मदुपिं मनूतय्‌त जक कष्‍ट ब्‍यु धकाः इमित धाल।*९:४ इज ९:४ 5 इमित स्‍यायेत हे ला मखु, न्‍याला तक सह याये हे मफय्‌क सास्‍ति बीत अधिकार बिया तःगु दु। इमित सास्‍ति जुइबलय्‌ बिच्‍छिं न्‍याः थें जुइ। 6 थुबलय्‌ मनूत सीत सनी, अय्‌नं सी फइ मखु। इमिसं सीत कुतः याःसां काल इपिं खनाः बिस्‍युं वनी।*९:६ अयू ३:२१; यर ८:३

7 थ्‍व क्‍वःबुइँचात लडाइँलय्‌ वने त्‍यंपिं सल थें च्‍वं। इमिगु छेनय्‌ लुँयागु श्रीपेच थें च्‍वंगु खने दु। इमिगु ख्‍वाःपाः मनूतय्‌गु ख्‍वाःपाः थें च्‍वं।*९:७ योए २:४ 8 इमिगु सँ नं मिसातय्‌गु सँ थें ताहा। इमिगु वा नं सिंहयागु वा थें च्‍वं।*९:८ योए १:६ 9 इमिगु छातिइ नयागु पातां चिनातःगु थें च्‍वं। इमिगु पपू संकूबलय्‌ वःगु सः ला लडाइँलय्‌ यक्‍व सलं सालिगु रथयागु सः थें च्‍वं।*९:९ योए २:५ 10 इमिगु न्‍हिप्‍यं व कं बिच्‍छियागु थें च्‍वं। इमिगु न्‍हिप्‍यनय्‌ मनूतय्‌त न्‍याला तक सास्‍ति बियातय्‌गु शक्ति दु। 11 तसकं तःजाःगु गाःयाम्‍ह दूत इमि जुजु थें खः। वयागु नां हिब्रू भासं एबाड्डोन, अले ग्रीक भासं अपोल्‍लियोन खः।

12 थुकथं न्‍हापांगु विपत्ति फुत, अय्‌नं निगू विपत्ति ला ल्‍यं हे दनि।

13 अले खुम्‍हम्‍ह स्‍वर्गदूतं थःगु तुरही पुल। परमेश्वरयागु न्‍ह्यःने च्‍वंगु लुँयागु गुंगू थनेगु वेदीया प्‍यंगू नेकुतिं थुकथं तुरही पूम्‍ह खुम्‍हम्‍ह स्‍वर्गदूतयात धया हःगु सः जिं ताल --*९:१३ प्रस ३०:१-३ 14 “यूफ्रेटिस खुसिइ चिना तःपिं प्‍यम्‍ह दूततय्‌त फ्‍यना ब्‍यु।” 15 अले वं प्‍यम्‍ह दूततय्‌त फ्‍यना बिल। स्‍वब्‍वय्‌ छब्‍व मनूतय्‌त स्‍यायेत थ्‍व हे घौ, न्‍हि, महिना व दँया लागि तयार याना तःपिं थुपिं हे खः। 16 इमिगु सल गया वनिपिनिगु फौज २००,०००,००० (नीगू करोड) दु धाःगु जिं न्‍यना।

17 जिं दर्शनय्‌ सल व सल गया च्‍वंपिं खना। सल गया च्‍वंपिनिगु छातिइ नयागु पातां चिना तःगु दु। थुकियागु रंग मि थें ह्याउँसे, निलम थें वँचुसे व गन्‍धक थें म्‍हासुसे च्‍वं। सलतय्‌गु छ्यं सिंहतय्‌गु थें च्‍वं। इमिगु म्‍हुतुं मि, कुँ, व गन्‍धक पिहां वयाच्‍वंगु दु। 18 इमिगु म्‍हुतुं पिहां वयाच्‍वंगु नाश याइगु मि, कुँ व गन्‍धकया विपत्तिं स्‍वब्‍वय्‌ छब्‍व मनूतय्‌त स्‍याना बिल। 19 छाय्‌धाःसा सलतय्‌गु शक्ति इमिगु म्‍हुतुइ व न्‍हिप्‍यनय्‌ जुयाच्‍वन। इमिगु न्‍हिप्‍यं सर्पयागु छ्यं थें च्‍वं। थुकिं हे इमिसं मनूतय्‌त न्‍यानाः स्‍याइ।

20 थुकिं मस्‍याःपिं मनूतय्‌सं अझ नं थःगु ल्‍हातिं याःगु ज्‍यायागु पश्‍चाताप मयाः। इमिसं भूतयात पुजा यायेगु व लुँ, वहः, सिजः, ल्‍वहं व सिँयागु मूर्तियात पुजा यायेगु मत्‍वःतू। थ्‍व द्यःतय्‌सं मखं, मताः, अले न्‍यासि जुइ मफु।*९:२० भज ११५:४-७; १३५:१५-१७; दान ५:२३ 21 अले इमिसं मनू स्‍यायेगु, जादुक्‍यनिगु, व्‍यभिचार यायेगु व खुइगु ज्‍याया पश्‍चाताप मयाः।