8
ख्रीष्टपाखें न्हूगु जीवन
1 अय्जूगुलिं ख्रीष्ट येशू नाप मिलय् जुयाच्वंपिं दोषी जुइ मखु। 2 आः ला झीत येशू ख्रीष्टपाखें न्हूगु जीवन बियादीम्ह परमेश्वरया आत्मां पाप व मृत्युयागु व्यवस्थां मुक्त यानादीगु दु। 3 झीपिं बमलाःबलय् व्यवस्थां याये माःगु ज्या याये मफुगुलिं परमेश्वरं थः काय्यात छ्वया हयादिल। वय्कः झीपिं थें तुं मनू जुयाः झीगु पाप सिला छ्वयेत बलिदान जुयादिल। थथे यानाः वय्कलं झीगु शरीरय् पापयागु दोष क्यनादिल। 4 अय्जूगुलिं व्यवस्थां धाःगु खँ पूवनेमा झीपिं मनूतय्गु ज्याखं धाःथें यायेत मखु, बरु पवित्र आत्मां धाःथें याना जुइपिं खः।
5 शरीरयात यःथें याना जुइपिं मनूतय्सं शरीरयागु ज्याखँय् हे मन तया जुइ। आत्मायात यःथें याना जुइपिं मनूतय्सं आत्मायागु ज्याखँय् हे मन तया जुइ। 6 शरीरयात यःथें यानाजुइपिं मनूत सी। पवित्र आत्मायात यःथें यानाजुइपिं मनूतय्त न्हूगु जीवन व शान्ति दइ। 7 शरीरयात यःथें यानाजुइपिं परमेश्वरया शत्रु खः, छाय्धाःसा थज्याःपिं मनूतय्सं परमेश्वरयागु व्यवस्था मानय् याइ मखु, अले हानं मानय् याये फइ नं मखु। 8 शरीरयात यःथें यानाजुइपिं मनूतय्सं परमेश्वरयात लय्ताय्के फइ मखु।
9 धात्थें परमेश्वरयागु आत्मा छिमिके दु धयागु जूसा शरीरयात यःथें यानाजुइपिं मखु, बरु आत्मायात यःथें यानाजुइपिं छिपिं खत, अले ख्रीष्टयागु आत्मा मदुम्ह मनू ख्रीष्टयाम्ह मनू जुइ फइ मखु। 10 ख्रीष्ट छिमिके च्वनादीगु दुसा पापं यानाः छिमिगु शरीर सी धुंकूसां परमेश्वरया न्ह्यःने धर्मी ठहरय् जूगुलिं छिमिगु आत्मा म्वाना च्वनी। 11 सी धुंकूम्ह येशूयात म्वाकादीम्ह परमेश्वरया आत्मा छिमिके दुसा ख्रीष्ट येशूयात सीगु पाखें म्वाकादीम्हय्सिनं छिमिगु सी माःगु शरीरयात नं म्वाकादी।*८:११ १ कोर ३:१६
12 अय्जूगुलिं यःपिं दाजुकिजापिं, झीसं शरीरयात यःथें याना जुइत म्वाना च्वने माःगु मन्त। 13 छिमिसं शरीरयात यःथें याना जुया च्वंसा छिपिं सी। शरीरयात यःथें याना मजुसे बरु परमेश्वरया आत्मायात यःथें याना जूसा छिपिं म्वाइ। अथे याना जूसा आत्मां छिमिगु यःत्थेंज्याःगु चालचलन त्वःतकादी। 14 थुकथं परमेश्वरया आत्मायात यःथें याना जुइपिं मनूत फुक्कं परमेश्वरया सन्तान खः।
15 थथे खः धयागु जूसा परमेश्वरया न्ह्यःने दास थें ग्याना च्वने माःगु मन्त, बरु काय् जुइगु आत्मा झीत बियादीगुलिं झीपिं वय्कःया सन्तान खः धकाः झीसं धाये दत। थथे झीसं “अब्बा, बाः” धकाः धाये दत।*८:१५ मर्क १४:३६; गला ४:६ 16 झीगु आत्मानाप मिलय् जुयाः परमेश्वरयागु आत्मां झीपिं परमेश्वरया सन्तान खः धकाः साक्षी बी। 17 थथे झीपिं परमेश्वरया सन्तान खःसा झीपिं हक दुपिं नं जुल। परमेश्वरया हक दुपिं व ख्रीष्ट नापं पूरा हक दुपिं झीपिं नं खत। वय्कः नाप दुःख सिल धाःसा झीपिं नं वय्कः नापं तुं तःधनी।*८:१५-१७ गला ४:५-७
लिपा दइगु महिमा
18 जिं स्वय्बलय् थौंकन्हय् झीत जुया च्वंगु दुःखकष्ट ला लिपा झीत दइ तिनिगु सुख नाप दाना स्वयेबलय् छुं हे मखु। 19 फुक्क सृष्टि परमेश्वरं थः सन्तानतय्त क्यनिगु दिं स्वयेत आय्बुया च्वंगु दु। 20 छाय्धाःसा सृष्टि ज्यालगय् मजुइ धुंकल। थ्व खँ सृष्टिया इच्छां जूगु मखु, बरु परमेश्वरं हे थथे यानादीगु खः।*८:२० उत ३:१७-१९ 21 सृष्टि थःहे नं स्यनेगु पाखें बचय् जुयाः लिपा परमेश्वरया सन्तानलिसें तःधनी तिनि धयागु आशा दु। 22 आः तक फुक्क सृष्टिं मचा बू ब्यथा जूथें दुःखकष्ट सी मालाच्वंगु दु धयागु खँ झीसं स्यू। 23 सृष्टि जक मखु, झीपिं नं आत्माया न्हापांयागु फल दुपिं झीपिं थःपिं हे नं परमेश्वरया लहिनातःपिं सन्तान थें जुयाः उद्धारया निंतिं आय्बुयाच्वना।*८:२३ २ कोर ५:२-४ 24 थ्व हे आशा याना च्वनेत ला खःनि, झीत अनन्त जीवन बियादीगु। खने दुगु आशा ला आशा हे मखु। खने दुगुयागु सुनानं आशा याइ ला? 25 झीसं खंके मफुगु आशा यानागु खः धयागु जूसा थ्व आशाय् संका मयासे, अले हथाय् मचासे झीसं पिया च्वने माः।
26 गथे यानाः प्रार्थना याये माः धकाः झीसं मस्यूगुलिं व झीगु विश्वास बमलाःगुलिं पवित्र आत्मां झीत ग्वाहालि यानादी। थथे पवित्र आत्मा थःम्हय्सिनं हे माक्व खँ धयाः झीगु निंतिं बिन्ति यानादी। 27 मनूतय्गु मन सीके फुम्ह परमेश्वरं पवित्र आत्मायागु खँ नं स्यू। वय्कःयात गथे यइ अथे आत्मां नं विश्वासीतय्गु निंतिं परमेश्वरयात बिन्ति यानादी। 28 परमेश्वरयात माया याइपिं, अले वय्कलं थःगु इच्छा पूवंकेत ल्यया तःपिन्त दक्व ज्या मिलय् यानाः भिं जुइ कथं हे वय्कलं ज्या यानादी धकाः झीसं स्यू। 29 परमेश्वरं न्हापांनिसें म्हस्यूपिन्त वय्कःया काय् थें यानादीत न्हापांनिसें हे ल्यया तयादिल। वय्कः यक्व किजापिं मध्य जेठाम्ह जुइमा धकाः थुकथं यानादीगु खः। 30 वय्कलं न्हापांनिसें ल्ययातःपिन्त सःता नं दिल। थथे वय्कलं सःतादीपिन्त धर्मी ठहरय् यानादिल। थुकथं वय्कलं धर्मी ठहरय् याःपिन्त तःधं नं यानादिल।
ख्रीष्टयागु माया
31 आः थ्व खँयात झीसं छु धायेगु? परमेश्वर झी नाप दीसा झी नाप ल्वाइपिं सु? 32 सुनां थः काय्यात हे ल्यंका मतसे झी सकसिगु निंतिं स्याकेत बियादीम्ह परमेश्वरं वय्कःया काय्पाखें झीत माःगु फुक्कं गथे बिया मदी? 33 परमेश्वरं ल्यया तःपिन्त सुनां दोषी याये फइ? धर्मी यानादीम्ह परमेश्वर हे खः धाःसा 34 सुनां इमित दोषी याइ? दोषी यानादीम्ह ला सिनाः म्वानादीधुंकूम्ह ख्रीष्ट येशू हे खः। थ्व हे येशू परमेश्वरया जव ल्हाः पाखे दी। अले वय्कलं झीगु निंतिं परमेश्वरयात बिन्ति यानादी।
35 ख्रीष्टयागु मायां झीत सुनां फाये फइ? छु झीत दुःखकष्ट जुल धकाः, म्वाय् थाकुल धकाः, सास्ति बिल धकाः, नयेमखन धकाः, पुनेगु मन्त धकाः, ग्यानपुगु वल धकाः, अले तरवारं पाली धकाः झीसं ख्रीष्टयात त्वःते जिल ला? 36 थ्व हे खँ भजन सफुलिइ नं थथे च्वयातःगु दु --
“अय्नं जिपिं छिगु लागि
न्हिथं सीमालाच्वंगु दु।
स्यायेत हःपिं फैचातय्त थें
जिमित व्यवहार याइगु।”*८:३६ भज ४४:२२
37 अय्नं झीसं दुःखकष्ट सी माःसां झीत माया यानादीम्हय्सिनं यानाः झीपिं त्याका वःपिं स्वयाः नं तःधंपिं खः।
38 सुनानं अले छुकिं हे नं परमेश्वरयागु मायां झीत त्वःतके फइ मखु धकाः जिं स्यू। न मृत्युं, न जीवनं, न स्वर्गदूततय्सं, न शैतानया दूततय्सं, न संसारयागु शक्तिं, न थौंकन्हय् जुयाच्वंगु खं, न लिपा जुइतिनिगु खं, 39 न च्वय्यागु, न क्वय्यागु, न सृष्टिया छुं नं शक्तिं झीत प्रभु येशू ख्रीष्टयाके दुगु वय्कःया मायां फाये फइ।