9
परमेश्वरं इस्राएली जातियात ल्ययादीगु
1 जि ख्रीष्टयाम्ह मनू जूगुलिं जिं सत्य खँ ल्हानाच्वना। जिं मखुगु खँ धयाच्वनागु मखु। जिके पवित्र आत्मा दीगुलिं जिगु विवेकं थ्व खँ धात्थें खः धकाः साक्षी बी। 2 जितः यःपिं इस्राएली दाजुकिजापिं खनाः तसकं नुगः मछिनाः व हीसे च्वंगु दु। 3 इमिगु निंतिं परमेश्वरयागु सराः फयेमाःसां, अले ख्रीष्टलिसे बाय्माःसां बाय्, 4 छाय्धाःसा इपिं परमेश्वरं ल्यया तःपिं जातियापिं खः। वय्कलं इमित थः हे काय्पिं यानाः इमिगु दथुइ च्वनाः वय्कःयागु तःधंगु शक्ति क्यनादिल। इपिं नाप बाचा चिनाः व्यवस्था नं बियादिल। वय्कःया आराधना यायेगु स्यनादिल, अले बचं नं बियादिल।*९:४ प्रस ४:२२ 5 ख्रीष्टया तापाःबाज्यापिं इमि नं तापाःबाज्यापिं खः। ख्रीष्ट थः नं इपिं थें थ्व हे जातय् बूगु खः। वय्कः दक्वसित राज्य यानादीम्ह परमेश्वर खः, वय्कः सदां तःधनेमा। आमेन।
6 यहूदी जातयापिन्सं थौं तकं ख्रीष्टयात विश्वास मयाःसां परमेश्वरं बाचा चिनाः धयादीगु वचन सितिं वंगु जुइ मखु। छाय्धाःसा यहूदी जातय् बूपिं सकलें परमेश्वरया मनूत मखु। 7 अथे हे अब्राहामया सन्तान फुक्कं परमेश्वरया सन्तान जुइ मखु। छाय्धाःसा “इसहाकयापाखें हे छिमि सन्तान दइ” धकाः परमेश्वरं धयादीगु दु।*९:७ उत २१:१२ 8 अय्जूगुलिं अब्राहामया इच्छां दुपिं सन्तान जुइवं परमेश्वरया सन्तान जुइ मखु। बचंया सन्तान जक परमेश्वरया सन्तान खः। 9 उकिं हे ला खःनि, परमेश्वरं “थ्व हे इलय् थन लिहां वये, उबलय् छिमि कलाः साराया काय् दये धुंकी” धकाः धयादीगु।*९:९ उत १८:१०
10 थ्व काय् झी तापाःबाज्या इसहाक खः। वं रिबेका नापं ब्याहा याये धुंकाः वं निम्ह काय्पिन्त नापं बुकल। 11 अले निम्हं काय् बुइ न्ह्यः हे, अले भिंगु मभिंगु ज्याखँ मयाःनिबलय् हे थःत यःथें परमेश्वरं ल्ययादिल। 12 थथे धर्मकर्मकथं मखु, बरु परमेश्वरं ल्ययादीकथं रिबेकायात धयादिल --
“तःधिम्हय्सिनं चिधिम्हय्सिगु
सेवा याइ।”*९:१२ उत २५:२३
13 “याकूबयात माया याना,
एसावयात धाःसा मयय्का।”*९:१३ मला १:२-३
14 थ्व खँय् झीसं छु धाये फु? थथे धायेवं तुं परमेश्वरं अन्याय यानादी ला? अथे ला गुब्सं नं यानादी मखु। 15 वय्कलं मोशायात नं थुकथं धयादिल --
“जिं सुयात कृपा याये मास्ति वइ
वयात कृपा याये।
जिं सुयात दया याये मास्ति वइ
वयात दया याये।”*९:१५ प्रस ३३:१९
16 थुकिं सी दत, थ्व खँ फुक्कं परमेश्वरयागु दयां यानाः जक जूगु खः, मनूया कुतलं व मनूयात यःथें यानाः जूगु मखु। 17 धर्मशास्त्रय् परमेश्वरं फारोयात थथे धयादीगु दु --
“अय्नं जिगु शक्ति क्यनेत
व पृथ्वीइ न्यंक जिगु नां कायेमा धकाः हे
जिं छन्त म्वाकातयागु खः।”*९:१७ प्रस ९:१६
18 अय्जूगुलिं वय्कलं दया यानादी मास्ति वःम्हय्सित दया यानादी। अले सुयागु नुगः छाय्के मास्ति वः वयात छाय्कादी।
कुमाः व थलबल
19 छिमिसं जितः थथे न्ह्यसः याइ -- “अय्सा परमेश्वरं झीत छाय् दोष बियादीगु लय् सा?” वय्कःयागु इच्छायात पने फुम्ह सु दु?
20 मनू जुयाः परमेश्वरयात लिसः बीम्ह छ सु खः? जितः छाय् थथे दय्का धकाः दय्कातःगु सामानं दय्कुम्हय्सित न्ह्यसः याइ ला?*९:२० यशै २९:१६; ४५:९ 21 छु छम्ह कुमाःयात न्हायातःगु चां बुत्ता तयातःगु थल दय्केगु व बुत्ता तया मतःगु थल दय्केगु अधिकार मदु ला?*९:२१ यर १८:१-१०; २ तिमो २:२०-२१ 22 परमेश्वरया तं व थःगु शक्ति क्यनादी मास्ति वःसा वय्कःयात सुनां पने फइ? वय्कलं थःत हीमी चाय्का च्वंपिं मनूत खनाः नं तं चाया मदिसे सह याना तुं च्वनादिल। 23 वय्कलं झीत वय्कःयागु दया मायायागु धुकू सीके बीत थथे दया माया यानादीगु खः। वय्कलं झीत न्हापांनिसें थःगु नां तःधंकेत ल्ययादीगु खः। 24 थथे सःतेत ल्यया तःपिं झीपिं हे खः। यहूदीत जक मखु, यहूदीमखुपिन्त नं वय्कलं सःतादिल।
25 थ्व हे खँ होशेयागु सफुलिइ च्वयातःगु दु --
“थः मनू मखुपिन्त
जिं थः मनू याये,
अले माया मयानाम्हय्सित
जिं ‘माया याइम्ह’ धकाः धाये।”*९:२५ होशे २:२३
26 अले
“हानं थथे च्वयातःगु दु --
‘छिपिं थः मनूत मखु’ धकाः
धयातःगु थासय्
‘म्वाःम्ह परमेश्वरया काय्पिं
धकाः इमित धाइ।’ ”*९:२६ होशे १:१०
27 इस्राएलयात कयाः यशैयां थथे धाःगु दु --
“इस्राएलया सन्तान
समुद्रय् च्वंगु फि थें यक्व दुसां
ल्यं दुपिं जक बचय् जुइ,
28 छाय्धाःसा प्रभुं याकनं हे
थ्व पृथ्वीयागु न्याय यानादी।”*९:२७-२८ यशै १०:२२-२३
29 यशैयां हानं थथे धयातःगु दु --
“शक्ति दुम्ह परमेश्वरं
झीत सन्तान ल्यंका मदीगु जूसा
सदोम व गमोरायागु गति जूथें तुं
झीगु नं अथे हे गति जुइगु खः।”*९:२९ यशै १:९
यहूदीतय्सं विश्वास मयाःगु
30 थज्याःगु खँय् झीसं छु धायेगु लय्? धर्मी जुइत मस्वःपिं यहूदीमखुपिं मनूत इमिगु विश्वासं यानाः धर्मी जुल। 31 व्यवस्था मानय् यानाः धर्मी जुइत स्वयाः जूपिं यहूदीतय्सं धाःसा विश्वास मयानाः व व्यवस्था मानय् याये मफयाः धर्मी जुइ मफुत। 32 थथे जूगु छाय् लय्? विश्वास यानाः धर्मी जुइत मस्वसे धर्मकर्म जक यानाः धर्मी जुइत स्वःगुलिं इपिं थथे जूगु खः। लुफिं हाइगु ल्वहँतय् इपिं लुफिं हा हे हात। 33 थथे नं च्वयातःगु दु --
“जिं सियोनय्
इमित लुफिं हाकेत छगः ल्वहं
व क्वथलेत छगः ल्वहंधी
तया च्वना।
वय्कःयात विश्वास याना जुइपिन्सं धाःसा
गुब्सं लज्या चाय् माली मखु।”*९:३३ यशै ८:१४; २८:१६
*9:4 ९:४ प्रस ४:२२
*9:7 ९:७ उत २१:१२
*9:9 ९:९ उत १८:१०
*9:12 ९:१२ उत २५:२३
*9:13 ९:१३ मला १:२-३
*9:15 ९:१५ प्रस ३३:१९
*9:17 ९:१७ प्रस ९:१६
*9:20 ९:२० यशै २९:१६; ४५:९
*9:21 ९:२१ यर १८:१-१०; २ तिमो २:२०-२१
*9:25 ९:२५ होशे २:२३
*9:26 ९:२६ होशे १:१०
*9:28 ९:२७-२८ यशै १०:२२-२३
*9:29 ९:२९ यशै १:९
*9:33 ९:३३ यशै ८:१४; २८:१६