21
Yohanis ladhe nèdhi liru dènge rai-haha rupa hiu
1 Hèia jaꞌa ladhe kèdhi liru dènge rai-haha rupa hiu, te liru dènge rai-haha dhu dhui ele aaꞌi le. Dhasi aadꞌo heka kahèi.✡Yesaya 65:17, 66:22, 2 Petrus 3:13 2 Ka jaꞌa kèdhi kota mola-mèci unu Ama Lamatua, nuka Yerusalem Hiu, puru mai nèti sorga. Kota ne, dhu paꞌèra mema, sama sèmi bhèni dhu neo leo-èmu hiu, dhu lalau nare le iisi, ho laꞌe soru mone dhu neo jꞌajꞌi dhèu èmu na.✡Yesaya 52:1, Rai-haha Rupa Hiu 3:12, Yesaya 61:10 3 Ka jaꞌa tadèngi lii dhu kapai èci mai nèti kadera paredha ne, peka na,
“Ladhe paie-iie!
Karèi nèti deo neꞌe ne, Èmu Ama Lamatua ètu talora aae dhèu rai-haha.
Karèi nèti deo neꞌe ne, Lamatua mamuri paꞌèci dènge dhèu unu Na.
Te Nèngu jꞌajꞌi le Ama Lamatua ra.
Aa rèngu jꞌajꞌi le ana-ana Na.
Bèli-camèdꞌa Nèngu bera-bera dènge ra.
Aa Na palere-lere dènge rèngu taa-taa.✡Yeskial 37:27, Atora nèti Ama-ama Agama 26:11, 12
4 Bèli-camèdꞌa Na seka pamango èi madha aaꞌi-aaꞌi ra,
sèna ka rèngu roma iisi heka.
Lula ètu era èèna, abhu heka papèdꞌa-tarègu.
Aa ètu era èèna, abhu heka mamadhe.
Ngaa-ngaa dhu uru èèna rèti sasusa, aadꞌo heka èci sa.
Ngaa-ngaa dhu uru èèna rèti jꞌajꞌèra, ele aaꞌi si le.”✡Yesaya 25:8, 35:10, 65:19
5 Hèia Nèngu dhu madhèdi ètu kadera paredha èèna, peka na, “Ladhe paie-iie, te Jaꞌa tao pahiu aaꞌi le.” Ka Na padhai lii hari dènge jaꞌa, peka na, “Suri ka! Dhèu aaꞌi-aaꞌi bisa parcaya Lii Holo-Nori Jaꞌa ne, te aaꞌi-aaꞌi se mema lèke tareꞌa-reꞌa!”
6 Ka Na peka hari dènge jaꞌa, na,
“Aaꞌi-aaꞌi dhu Jaꞌa pajaji sèra, jꞌajꞌi aaꞌi le.
Te Jaꞌa ne,
Alpa toke Omega,
Aa Jaꞌa ne,
A toke Z,
Aaꞌi-aaꞌi ra jꞌajꞌi nèti Jaꞌa,
karèi nèti uru ka, toke dꞌai èle.
Dhèu aaꞌi-aaꞌi dhu koko-kamango,
pe Jaꞌa hia ra rinu iia-iia dꞌara,
nèti madha èi dhu nèti mamuri hia dhèu, sèna ka dhèu sèra bisa mamuri dènge tareꞌa.✡Yesaya 55:1
7 Dhèu aaꞌi-aaꞌi dhu taha madhutu jꞌara Lamatua dhu mola,
bèli-camèdꞌa rèngu unu mèngi-nale aaꞌi-aaꞌi ra.
Pe Jaꞌa jꞌajꞌi Ama Lamatua ra,
aa rèngu jꞌajꞌi ana-ana Jaꞌa.✡2 Samuel 7:14, Lii Sodꞌa Koa-Kio 89:26-27
8 Te ngaa abhu kahèi dhèu dhu èèna na lèke core si,
asa dꞌara dhasi ai èi nasu dhu heo na maꞌète boe ciki sa.
Nuka sèmi: dhèu dhu madhaꞌu leli,
dhèu dhu soro kabodho mi Lamatua Yesus,
dhèu dꞌara kajꞌalu,
dhèu dhu tao jꞌara makae dènge dhèu dhu jꞌajꞌi boe dhèu èmu-kamali ra,
dhèu pamadhe dhèu,
dhèu sogo-tagu nidhu,
dhèu suagi,
aa dhèu kapodꞌe-kabèli.
Bèli-camèdꞌa rèngu aaꞌi-aaꞌi lèke pèci asa dꞌara dhasi ai,
dhu ra peka na, ‘era mamadhe ka dua.’ ”
Yohanis ladhe nèdhi kota Yerusalem rupa hiu
9 Ka jaꞌa ladhe kèdhi ca dhèu nèti ana pajuu dhèu pidhu nèti sorga, dhu uru èèna rèdꞌu bokor dhu isi dènge nanasa Lamatua. Na mai paraga dènge jaꞌa, ka na lii, peka na, “Mai ku sa neꞌe! Te jaꞌa neo padꞌelo dènge èu bhèni dhu neo kabꞌi dènge Ana Kalèbho.”
10 Hèia jaꞌa abhu Roh Lamatua, ka ana pajuu ca dhèu nèti sorga mai nedhe nèti jaꞌa asa kolo ledhe dhu dedha aae èci. Nèti era neꞌe, na padꞌelo jaꞌa kota Yerusalem, nuka kota Ama Lamatua dhu mola-mèci, dhu puru mai nèti Ama Lamatua ètu sorga.✡Yeskial 40:2 11 Kota ne saraga titu kèna! Abhu saraa dhu kalua nèti dadedha Ama Lamatua sèmi hadhu intan dhu kaleꞌe, toke kota aaꞌi-aaꞌi heo loꞌa-loꞌa. 12 Abhu tedhe dhu dedha aae oke nare kota ne, dènge canguru dua babèdho. Abhu kahèi canguru dua ana pajuu nèti sorga dhu madhenge babèdho kapai se. Ètu canguru dua babèdho se, dhu suri ngara-ngara nèti canguru dua udhu-rasa Israꞌel.*Madhutu dhèu dꞌèlu-mèu Alkitab, angka canguru dua èèna, peka na, dhèu mèci. 13 Tèlu babèdho tangara asa dhimu. Tèlu tangara asa haa. Tèlu tangara asa badae. Aa tèlu hari tangara asa balèu.✡Yeskial 48:30-35 14 Tedhe ne dhu patitu ètu canguru dua hadhu fanderen dhu kapai. Ètu hadhu se èci-èci dhu suri ngara nèti canguru dua dhèu pajuu-paleha Ana Kalèbho dhu lalau-laloꞌo Ne ètu rai-haha.
15 Ka ana pajuu dhu padhai lii dènge jaꞌa, kèpe nare tatea aꞌuku nèti hualaa èci, ho neo uku kota ne dènge hèbꞌa babèdho kapai, aa dènge tedhe na.✡Yeskial 40:3 16 Na uku uru tedhe kota. Madhera, bhabhèla dènge katitu na, èci èèna ka. Nuka, aaꞌi-aaꞌi ra, 2.220 (dua riho dua ngasu dua nguru) kilometer.†Alkitab lii Yunani peka canguru dua riho stadia. 17 Hèia na uku maꞌaa tedhe, madhutu aꞌuku dhèu rai-haha. Maꞌaa na, èna nguru lèmi meter.‡Akitab lii Yunani suri, peka na, “144 (ca ngasu èpa nguru èpa) peihon”. Ca peihon, sama sèmi dua ègꞌa. Canguru dua kali canguru dua, nuka cangasu èpa nguru èpa. De ladhe canguru dua èèna, sasoa na, tesa, na, 144 sasoa na, dhu tesa risi eele. 18 Tedhe ne, tao nèti hadhu kaleꞌe, ngara na yaspis. Aa aaꞌi-aaꞌi ètu dꞌara kota ne, tao nèti poe dènge pai, dhu mèu aadha-aadha nuka sèmi tèru.
19 Canguru dua hadhu fanderen sèra, tao nèti rupa-rupa hadhu kaleꞌe dhu kabꞌua. Fanderen ka èci, tao nèti hadhu yaspis, dhu mangèru kaleꞌe. Ka dua, nèti hadhu nilam dhu kaleꞌe mangèru bhidhu-bhidhu. Ka tèlu, tao nèti hadhu mirah dhu mea kaleꞌe. Ka èpa, tao nèti hadhu samrud, dhu mangèru kaleꞌe. 20 Ka lèmi, tao nèti hadhu unam dhu pakatanga dènge karara mea sanama pudhi. Ka èna, dhu tao nèti hadhu sardius, dhu mea kaleꞌe. Ka pidhu, tao nèti ratna cempaka dhu karara hualaa. Ka aru, dhu tao nèti hadhu beril, dhu kaleꞌe mangèru aae. Ka ceo, tao nèti hadhu krisolit, dhu karara moce-moce. Ka canguru, tao nèti hadhu krisopras dhu mangèru mudꞌa. Ka canguru èci, tao nèti hadhu lasuardi, dhu mangèru dhasi. Aa ka canguru dua, tao nèti hadhu kecubung, dhu kaleꞌe mea sanama mangèru. 21 Aa babèdho kapai canguru dua bua sèra, tao nèti canguru bua mutiara. Babèdho èci tao nèti mutiara cue. Jꞌara oka-hoo ètu dꞌara kota ne, tao nèti poe-pai dhu kaleꞌe sèmi tèru.✡Yesaya 54:11-12
22 Te ngaa jaꞌa kèdhi boe Èmu Manèngi-Mangajꞌi ètu dꞌara kota ne. Lula Ama Lamatua dhu koasa kapai risi dènge Ana Kalèbho pea taa-taa ètu dꞌara kota ne. Nèti èèna ka, dhèu pahaha iisi mema mi Rèngu. 23 Kota èèna, parluu boe madha lodꞌo dènge hèru ho pasaraa ne, lula saraa Ama Lamatua ka dhu pasaraa ne. Aa Ana Kalèbho ne jꞌajꞌi nuka sèmi labhu dhu heo.✡Yesaya 60:19-20 24 Dhèu nèti suku aaꞌi-aaꞌi ètu rai-haha, èèna na kako lasi mai ètu dꞌara saraa èèna. Dhèu aae-dhèu aae nèti rai-haha, rèti kakaja-sasuꞌi ra asa nèi kahèi.✡Yesaya 60:3 25 Ètu era nèi, abhu boe mèda. Nèti èèna ka, parluu boe bèdho hèbꞌa tedhe. 26 Pe asa dꞌara kota ne, dhèu rèti aaꞌi-aaꞌi dhu beꞌa kahèi, dènge hormat aaꞌi-aaꞌi nèti rai-rai ètu rai-haha.✡Yesaya 60:11 27 Te ngaa dhu bisa boe maso asa nèi, nuka aaꞌi-aaꞌi dhu karehe, nuka sèmi: dhèu sogo-tagu nidhu, dhèu dhu tao jꞌara makae, dènge dhèu kapodꞌe-kabèli. Dhu bisa maso, nuka rèngu dhu ngara ra abhu ètu dꞌara sasuri Ana Kalèbho. Rèngu seꞌe ka dhu mamuri taa-taa dènge Ama Lamatua.✡Yesaya 52:1, Yeskial 44:9
✡21:1 Yesaya 65:17, 66:22, 2 Petrus 3:13
✡21:2 Yesaya 52:1, Rai-haha Rupa Hiu 3:12, Yesaya 61:10
✡21:3 Yeskial 37:27, Atora nèti Ama-ama Agama 26:11, 12
✡21:4 Yesaya 25:8, 35:10, 65:19
✡21:6 Yesaya 55:1
✡21:7 2 Samuel 7:14, Lii Sodꞌa Koa-Kio 89:26-27
✡21:10 Yeskial 40:2
*21:12 Madhutu dhèu dꞌèlu-mèu Alkitab, angka canguru dua èèna, peka na, dhèu mèci.
✡21:13 Yeskial 48:30-35
✡21:15 Yeskial 40:3
†21:16 Alkitab lii Yunani peka canguru dua riho stadia.
‡21:17 Akitab lii Yunani suri, peka na, “144 (ca ngasu èpa nguru èpa) peihon”. Ca peihon, sama sèmi dua ègꞌa. Canguru dua kali canguru dua, nuka cangasu èpa nguru èpa. De ladhe canguru dua èèna, sasoa na, tesa, na, 144 sasoa na, dhu tesa risi eele.
✡21:21 Yesaya 54:11-12
✡21:23 Yesaya 60:19-20
✡21:24 Yesaya 60:3
✡21:26 Yesaya 60:11
✡21:27 Yesaya 52:1, Yeskial 44:9